ရန်ကုန်၊ ဧပြီ ၂၃
ကရင်နီပြည်နယ်တွင် ၂၀၂၂ ခုနှစ်၊ ဧပြီလ တတိယတပတ်အတွင်း အကြမ်းဖက်စစ်ကောင်စီတပ်နှင့် ကရင်နီပူးပေါင်းတပ်ဖွဲ့များကြား တိုက်ပွဲများ ဆက်လက်ပြင်းထန်နေခဲ့ပြီး စစ်ကောင်စီဘက်မှ စစ်သား ၁၆ ဦးသေဆုံးကာ၊ စစ်သားအချို့ ကရင်နီအမျိုးသားများကာကွယ်ရေးတပ်ထံ လာရောက်ခိုလှုံခဲ့ကြောင်း KNDF က ယနေ့ သတင်းထုတ်ပြန်သည်။
ဧပြီလ တတိယအပတ်တွင် မိုးဗြဲ၊ ဝါရီဆူးပလိုင်နှင့်ဝါရီကောခူကျေးရွာ၊ ဒီးမော့ဆိုမြို့နယ် ဒေါကမီးနှင့် ဥခူရီကျေး ရွာ၊ ဖရူဆိုနှင့်ဘောလခဲနယ်စပ်ရှိ ထားလဲနှင့် နန်းဖဲစသည့် ဒေသတို့တွင် တိုက်ပွဲများဖြစ်ပွားလျက်ရှိကြောင်း ကရင်နီ ပူးပေါင်းတပ်များ၏ တိုက်ခိုက်မှုကြောင့် ဒီးမော့ဆိုမြို့နယ်၊ နောင်ပုလဲနှင့် ဥခူရီနှင့် ဒေါကမီးမှ အကြမ်း ဖက်စစ်ကောင်စီတပ်များ ပြန်လည်ဆုတ်ခွာနေကြောင်း KNDF က ဆိုသည်။
ကရင်နီပူးပေါင်းတပ်ဖွဲ့က စစ်ကောင်စီတပ်ကို ပြောက်ကျားစနစ်ဖြင့် နေ့စဥ်နှင့်အမျှ တိုက်ခိုက်နေပြီး ဖရူဆိုမြို့နယ် ထားလဲနှင့် နန်းဖဲအကြားတွင် စစ်ကြောင်း ထိုးလာသော စစ်ကောင်စီစစ်ကြောင်းမှ တပ်သားများ ဖရိုဖရဲဖြစ်ကာ တပ်သား ၁၇ ဦး စွန့်ခွာထွက်ပြေးခဲ့ကြောင်း တပ်သားအချို့ ကရင်နီပူးပေါင်းတပ်ထံ ခိုလှုံခဲ့ကြောင်း သိရှိရသည်။
ဧပြီလ (၁၆) ရက်နေ့တွင် စစ်ကောင်စီတပ်ဖွဲ့က လွိုင်ကော်မြို့ ချီကယ်ရပ်ကွက်ရှိ အသက် ၈ နှစ်အရွယ် ကလေးငယ်တဦးကို ပစ်ခတ် သတ်ဖြတ်ခဲ့သည့်အပြင် အကြမ်းဖက်စစ်ကောင်စီတပ်ဖွဲ့များ၏ လက်နက်ကြီးပစ်ခတ်မှုများ မီးရှို့ဖျက်ဆီးမှုများကြောင့် ဒီးမော့ဆို၊ လွိုင်ကော်၊ ဖရူဆိုမြို့နယ်များမှ အများပြည်သူနေအိမ် ၈ လုံး ပျက်စီးခဲ့ကြောင်း KNDF က ဆိုသည်။
ကရင်နီပူးပေါင်းတပ်ဖွဲ့ဘက်မှလည်း တိုက်ပွဲအတွင်း ထိခိုက်သေဆုံးမှုအချို့ ရှိခဲ့ပြီး ဒေါခမီးတိုက်ပွဲအတွင်း KNDF ရဲဘော် ၂ ဦး ကျဆုံးသွားကြောင်း ကရင်နီအမျိုးသားများကာကွယ်ရေးတပ်က အတည်ပြုသည်။
