ကလေးဝ-မော်လိုက် လမ်းပိုင်းကို စစ်တပ်က စစ်ကြောင်းထိုးနေ၍ တိုက်ပွဲများ အချိန်မရွေး ဖြစ်ပွားနိုင်သောကြောင့် ပြည်သူများ ကုန်းလမ်းနှင့်ရေလမ်း အသုံးမပြုရန် ကလေးခရိုင် ပကဖ အသိပေး
ရန်ကုန်၊ နိုဝင်ဘာ ၂၇
စစ်ကိုင်းတိုင်း၊ ကလေးဝ-မော်လိုက် လမ်းပိုင်းကို အကြမ်းဖက် စစ်တပ်က စစ်ကြောင်းထိုးနေ၍ တိုက်ပွဲများ အချိန်မရွေး ဖြစ်ပွားနိုင်သောကြောင့် ပြည်သူများ ကုန်းလမ်းနှင့်ရေလမ်း အသုံးမပြုရန် ကလေးခရိုင် ပြည်သူ့ကာကွယ်ရေး အဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
နိုဝင်ဘာလ ၂၆ ရက်နေ့တွင် ဒေသကွပ်ကဲမှုစစ်ဌာနချုပ်မှ ထွက်လာသော သံပြာကာကား ၄ စီးသည် တိုက်ခိုက်ရေး ဒရုန်းနှင့် လက်နက် သေတ္တာများပါ ပါဝင်ပြီး လူအင်အား အပြည့် တင်ဆောင်လာကာ ကလေးဝ-မော်လိုက် လမ်းပိုင်းကို ရောက်ရှိနေခြင်းဖြစ်ကြောင်း သိရသည်။
ထို့ကြောင့် ဒေသတွင်း တော်လှန်ရေး တပ်ဖွဲ့များနှင့် အကြမ်းဖက် စစ်တပ် စစ်ကြောင်းတို့ အချိန်မရွေး တိုက်ပွဲများဖြစ်ပွားလာနိုင်ခြင်းကြောင့် နိုဝင်ဘာလ ၂၇ ရက်နေ့မှစ၍ ကလေးဝ-မော်လိုက် အကြားရှိ ကုန်းလမ်း၊ ရေလမ်းများကို ကလေးခရိုင် ပြည်သူ့ကာကွယ်ရေး အဖွဲ့က ပိတ်ပင်လိုက်ခြင်းဖြစ်ကြောင်း သိရှိရသည်။
“ဒကစက ထွက်လာတဲ့ သံပြာကာကား ၄ စီး MA-4 ၊ MA-3 တွေပါ ဒရုန်းပါ လက်နက်သေတ္တာများပါ သယ်ဆောင်လာပြီး စစ်ခွေး အပြည့်နဲ့ မနေ့က မြို့ထွက်ကို ရောက်သွားတာ ခွေးတွေရှိတော့ အဲလမ်းပိုင်းမှာ တော်လှန်ရေးတပ်တွေနဲ့ အချိန်မရွေး တိုက်ပွဲဖြစ်နိုင်တဲ့ အခြေအနေကြောင့်မို့လို့ လမ်းပိုင်းကို ပိတ်ပင်လိုက်တာပါ” ဟု ကလေးခရိုင် ပြည်သူ့ကာကွယ်ရေး အဖွဲ့မှ တာဝန်ရှိသူ တစ်ဦးက ပြောဆိုသည်။
အဆိုပါ လမ်းပိုင်းကို ပြန်လည်သွားလာခွင့်ပြုမည့် အချိန်ကိုလည်း ဆက်လက် ထုတ်ပြန်ပေးသွားမည်ဖြစ်ကြောင်း ကလေးခရိုင် ပြည်သူ့ကာကွယ်ရေး အဖွဲ့မှ တာဝန်ရှိသူ တစ်ဦးက ဆက်လက် ပြောဆိုသည်။
