မင်းအောင်လှိုင် တက်မည့် ပြင်ဦးလွင် ရုက္ခဗေဒဥယျာဉ် နှစ် ၁၀၀ ပြည့်ပွဲ နှင့် ပန်းပွဲတော် လုံခြုံရေးအတွက် ပြည်သူများကို စစ်တပ်က အဝတ်ပါချွတ်ခိုင်း၍ စစ်ဆေးနေပြီး ကန်တော်ကြီး ဥယျာဉ်သို့ အများပြည်သူများ လာရောက်ခွင့် ပိတ်ပင်

မင်းအောင်လှိုင် တက်မည့် ပြင်ဦးလွင် ရုက္ခဗေဒဥယျာဉ် နှစ် ၁၀၀ ပြည့်ပွဲ နှင့် ပန်းပွဲတော် လုံခြုံရေးအတွက် ပြည်သူများကို စစ်တပ်က အဝတ်ပါချွတ်ခိုင်း၍ စစ်ဆေးနေပြီး ကန်တော်ကြီး ဥယျာဉ်သို့ အများပြည်သူများ လာရောက်ခွင့် ပိတ်ပင်

ရန်ကုန်၊ ဒီဇင်ဘာ ၁၄

အကြမ်းဖက် စစ်ခေါင်းဆောင် မင်းအောင်လှိုင်တို့ လင်မယား ယနေ့ တက်ရောက် ရန်ရှိနေသည့် မင်းအောင်လှိုင် တက်ရောက်မည့် ပြင်ဦးလွင် ရုက္ခဗေဒ ဥယျာဉ် နှစ် ၁၀၀ ပြည့် ပွဲတော် နှင့် ပန်းပွဲတော် ဖွင့်ပွဲ အခမ်းအနား လုံခြုံရေးအတွက် ပြည်သူများကို စစ်တပ်က အဝတ်အစားများပါချွတ်ခိုင်း၍ စစ် ဆေးနေပြီး ကန်တော်ကြီး ဥယျာဉ်သို့ အများပြည်သူများ လာရောက်ခွင့် ယာယီပိတ်ပင်ထားကြောင်း ပြင်ဦးလွင် ဒေသပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုသည်။

ယနေ့ ဒီဇင်ဘာလ ၁၄ ရက်နေ့ ပြင်ဦးလွင် ရုက္ခဗေဒ ဥယျာဉ် နှစ် ၁၀၀ ပြည့် ပွဲတော် နှင့် ၁၇ ကြိမ်မြောက် ပန်းပွဲတော် ဖွင့်ပွဲ အခမ်းအနား ပြုလုပ်မည်ဖြစ်ကြောင်း၊ ထိုအခမ်းအနားသို့ အကြမ်းဖက် စစ်ခေါင်းဆောင် မင်းအောင်လှိုင် လင်မယားတက်ရောက်ရန် ရှိနေကြောင်း၊ ပြင်ဦးလွင်ရှိ မြို့တွင်း အဝင်အထွက် လမ်းများပိတ်ဆို့ထားပြီး ပြင်ဦးလွင်မြို့ပြင်ပတွင် လုံခြုံရေးများ ထူထပ်စွာ ချထားကြောင်း သိရှိရသည်။

“မအလတို့ လင်မယား ပန်းပွဲတော်ဖွင့်ပွဲ လာမယ်ပြောတယ်။ မနက်ပိုင်း ပြင်ဦးလွင် မြို့တွင်းဝင်လို့ရမယ့် လမ်းမှန်သမျှ ပိတ်ထားပါတယ်။ မိုးကြိုး၊ သိမ်အင်း၊ ထုံးကုန်း၊ မြိုင်ကြီးဘက်ပဲသွားခွင့်ရှိပြီး မြို့တွင်းမဝင်ရပါ ။ အထူးသဖြင့် ရေငယ်လမ်းဆုံ မဟာအံ့ထူးကံသာဘုရားကြီးအဆင်းလမ်း မြို့ရှောင်လမ်း Xray ဂိတ်ဟောင်းအနီး လမ်းပိတ်ပြီး ပြည်သူတွေကို အဝတ်အစားတွေပါချွတ်ခိုင်းပြီး စစ်ဆေးနေပါတယ်။ ဗိုက်ကြီးသည်ဆိုရင်တောင် ဗိုက်လှန်ပြခိုင်းပါတယ်။ လုံခြုံရေးက အရမ်းကိုတင်းကျပ်ထားတယ်” ဟု ဒေသပြည်သူတချို့က ပြောဆိုသည်။

တပ်သတင်းရင်းမြစ်တချို့ကမူ ပြင်ဦးလွင်သို့ စစ်ခေါင်းဆောင် လာရောက်တိုင်း နေပြည်တော်၊ မိတ္တီလာရှမ်းတဲနှင့် ပြင်ဦးလွင်အကြားတွင် လုံခြုံရေးအတွက် လေတပ်က သယ်ပို့ဆောင်ရေးများ တောက်လျှောက်လုပ်ပြီး ရဟတ်ယာဉ်များဖြင့် ကင်းလှည့်မှုများကို အမြဲမပြတ်လုပ်ဆောင်ပေးရ ကြောင်း ပြောဆိုသည်။

“တပ်ချုပ်လာရင် ပြင်ဦးလွင်မှာ အရင်ကလို ညမအိပ်ဘဲ နေ့ပိုင်း ပြင်ဦးလွင်မှာ နေပြီး ညနေဆို လေကြောင်းခရီးစဉ်နဲ့ မိတ္ထီလာ ရှမ်းတဲ ဧည့်ရိပ်သာဖြစ်ဖြစ်၊ နေပြည်တော် အိမ်ကို ဖြစ်ဖြစ် ပြန်လေ့ရှိပါတယ်။ သူ ပြင်ဦးလွင် လာရင် လေတပ်က သယ်ပို့ရော လုံခြုံရေးအတွက်ရော အမြဲတမ်းအသင့် ပြင်ဆင် လုပ်ဆောင်ပေးရပါတယ်” ဟု လေတပ်သတင်းရင်းမြစ်တစ်ခုကဆိုသည်။

ယနေ့ ပြင်ဦးလွင် ရုက္ခဗေဒဥယျာဉ် နှစ် ၁၀၀ ပြည့် ပွဲတော် နှင့် ပန်းပွဲတော် ဖွင့်ပွဲ အခမ်းအနားအတွက် ဌာနဆိုင်ရာများနှင့် စစ်တပ်မိသားစုများကို မဖြစ်မနေ တက်ရောက်ရန် စစ်ကောင်စီက ညွှန်ကြားထားပြီး ပြည်သူများကို ယနေ့ ယာယီ လာရောက်ခွင့် ပိတ်ပင်ထားကြောင်း ဌာနဆိုင်ရာ အသိုင်းအ၀ိုင်းက ပြောဆိုသည်။

“ဖွင့်ပွဲ အခမ်းအနားမှာ လူမရှိဘူးလည်းမဖြစ်ရအောင် လုံခြုံရေးလည်း စိတ်ချရအောင် တပ်မိသားစုနဲ့ ဌာနဆိုင်ရာ မိသားစုတွေအားလုံး ပန်းပွဲတော်ကို လာတက်ခိုင်းပါတယ်။ ကန်တော်ကြီး ပန်းပွဲတော်ကို လူကြီးတွေ လာကြမှာမို့ ပြည်သူတွေကတော့ ယာယီတော့ ဒီနေ့ ကန်တော်ကြီးဝန်းကျင် လာလို့မရဘူး။ လူမစည်ကားဘူး မဖြစ်ရအောင် တပ်မိသားစုနဲ့ ဝန်ထမ်းမိသားစု ပြည်သူအတုတွေကို ကန်တော်ကြီး ဥယျာဉ်မှာ စာရင်းဇယားနဲ့ နေရာချထားတယ်” ဟု ပြင်ဦးလွင်မှ ဌာနဆိုင်ရာ ဖရဲသီးဝန်ထမ်း သတင်းရင်းမြစ်တစ်ခုက ဆိုသည်။

ရခိုင်ပြည်အပါအဝင် တစ်နိုင်ငံလုံးတွင် စစ်ရှုံးနေသော်လည်း မင်းအောင်လှိုင်မှာ အခမ်းအနားနှင့်ဖွင့်ပွဲများကို နေ့စဉ် မပြတ် တက်ရောက်လျက်ရှိကြောင်း စစ်တပ်သတင်းရင်းမြစ်များက ဆိုကြသည်။