မြိုင်မြို့နယ်၊ သရက်ကွရွာ ပျူစောထီးစခန်းကို တိုက်ခိုက်သိမ်းပိုက်ပြီး စစ်တပ် စစ်ကူများကို ချေမှုန်းမှု စစ်ဗိုလ် ၁ ဦးအပါအဝင် ၁၄ ဦးသေဆုံး
မကွေးတိုင်း၊ မြိုင်မြို့နယ်၊ သရက်ကွရွာ ပျူစောထီးစခန်းကို တိုက်ခိုက်သိမ်းပိုက်ပြီး စစ်တပ် စစ်ကူများကို ချေမှုန်းခဲ့ရာ စစ်ဗိုလ် ၁ ဦးအပါအဝင် ၁၄ ဦးသေဆုံးကြောင်း မြိုင်ပကဖ က ထုတ်ပြန်သည်။
ဒီဇင်ဘာလ ၁၉ ရက်နေ့ နံနက် ၆ နာရီအချိန် မှစ၍ မြိုင်မြို့နယ်၊ သရက်ကွရွာ ပျူစောထီးစခန်းကို တော်လှန် ရေးတပ်ဖွဲ့များ ပူးပေါင်းပြီး ထိုးစစ်ဆင်တိုက်ခိုက်ခဲ့ရာ အကြမ်းဖက်စစ်ကောင်စီတပ်က လေကြောင်း ပစ်ကူပေး၍လည်းကောင်း၊ မြိုင်မြို့၌တပ်စွဲထားသော အင်အား ၁၅၀ ခန့်ပါ စစ်ကူစစ်ကြောင်းလွှတ်၍ လည်းကောင်း အပြင်းအထန်ခုခံခဲ့သော်လည်း ဒီဇင်ဘာလ ၂၁ ရက်နေ့တွင်အပြီးသတ် သိမ်းပိုက်ရရှိခဲ့ ကြောင်း သိရသည်။
မြိုင်မြို့မှ စစ်ကူပေးရန်လာသည့် အကြမ်းဖက်စစ်တပ် စစ်ကြောင်းကို ဒီဇင်ဘာလ ၁၉ ရက် နံနက် ၇ နာရီခန့်တွင် တစ်ကြိမ်၊ မွန်းတည့် ၁၂ နာရီခန့်တွင် တစ်ကြိမ် ထိတွေ့တိုက်ပွဲဖြစ်ခဲ့ပြီး အကြမ်းဖက်စစ် ကောင်စီတပ်မှ ဗိုလ် ၁ ဦးအပါအဝင် ၁၄ ဦးသေဆုံးကာ ၃၀ ခန့်အပြင်းအထန် ထိခိုက်ဒဏ်ရာ ရရှိခဲ့ပြီး မြိုင်မြို့အတွင်းသို့ ပြန်ဆုတ်သွားကြောင်း သိရသည်။
အကြမ်းဖက်စစ်ကောင်စီတပ်၏ လေကြောင်းတိုက်ခိုက်မှုကြောင့် လူနေအိမ် ၁၀ လုံးခန့်ပျက်စီးခဲ့ပြီး သရက်ကွရွာ ပျူစောထီးစခန်းကို သိမ်းပိုက်စဉ် ပြည်သူ့ကာကွယ်ရေးတပ်ဖွဲ့ဝင် ၂ ဦး တိုင်းပြည်နှင့် ပြည်သူလူထုအတွက် မြင့်မြတ်စွာ အသက်ပေးလှူသွားကြောင်း သိရသည် ။
အဆိုပါ စစ်ဆင်ရေးကို မြိုင် ပကဖ ၊ပေါက် ပကဖ ၊ (မြိုင် ပေါက် ကမ္မ) ပကဖ တပ်ရင်း အမှတ် ၁ ၊ ၂ တပ်ရင်း ၊ ပခုက္ကူခရိုင် အမှတ် ၂ /၆/၇/၁၄/၁၅/၁၇ တပ်ရင်းများ ၊ အညာမြေတပ်ပေါင်းစု ၊ ကမ္မ တပ်ပေါင်းစု ၊ PLC တပ်ပေါင်းစု ၊ 8+ စုဖွဲ့မှု ၊ ပခုက္ကူစုဖွဲ့မှုတပ်ရင်း ၊ဝံပုလွေပြောက်ကျားတပ်ဖွဲ့ ၊ ဂဠုန်ပြည်သူ့ကာကွယ် ရေးတပ်ဖွဲ့ ၊ ဓားမင်းကြီးတပ်ဖွဲ့ ၊ ကိုအောင်ကြီးတပ်ဖွဲ့တို့ ပူးပေါင်းကာ တိုက်ခိုက်ခဲ့ခြင်းဖြစ်ကြောင်း သိရသည်။
ပခုက္ကူခရိုင်အတွင်းရှိ အကြမ်းဖက်စစ်တပ်စခန်းများ၊ ပျုစခန်းကို အရှိန်အဟုန်မြှင့် တိုက်ခိုက်သိမ်းပိုက်သွားမည်ဖြစ်ပြီး အသက်မ သေလိုသူ ၊ အလင်းဝင်လိုသူ ၊ ကောင်းမွန်စွာ လုပ်ကိုင် စားသောက်လိုသူ ပျုစောထီးများ ၊ စစ်သား များအနေဖြင့် အမြန်ဆုံးအလင်းဝင် ပူးပေါင်းကြ ရန် တိုက်တွန်းထားသည်။
