နွားထိုးကြီးမြို့နယ်၊ ဒေါင်ဘိုးကျေးရွာကို စစ်တပ်က လေယာဉ်ဖြင့် ဗုံးကျဲမှု အသက် ၆၃ နှစ်အရွယ် ဦးအေးထွန်း သေဆုံးပြီး ၃ ဦးဒဏ်ရာရ၊ နေအိမ်၊ ကားနှင့်ဆိုင်ကယ်များအပါအဝင် ပျက်စီးဆုံးရှုံးမှု များပြား
ရန်ကုန်၊ ဒီဇင်ဘာ ၂၅
မန္တလေးတိုင်း၊ နွားထိုးကြီးမြို့နယ်၊ ဒေါင်ဘိုးကျေးရွာကို စစ်တပ်က လေယာဉ်ဖြင့် ဗုံးကျဲချခဲ့ရာ အသက် ၆၃ နှစ်အရွယ် ဦးအေးထွန်း သေဆုံးပြီး ၃ ဦးဒဏ်ရာရကာ နေအိမ်၊ ကားနှင့်ဆိုင်ကယ်များအပါအဝင် ပျက်စီးဆုံးရှုံးမှု များပြားကြောင်း ဒေသပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုကြသည်။
ဒီဇင်ဘာလ ၂၃ ရက်နေ့ ညနေ ၆ နာရီအချိန် နွားထိုးကြီးမြို့နယ်၊ ဒေါင်ဘိုးကျေးရွာပေါ်သို့ ဗုံးများကျဲချခဲ့ရာ ကျေးရွာအတွင်းနေထိုင်သော အသက် ၆၃ နှစ်အရွယ် ဦးအေးထွန်း ပွဲချင်းပြီး သေဆုံးပြီး ဦးအေးထွန်း၏ ဇနီး ဒေါ်စန်းယု ဦးခေါင်းဒဏ်ရာ အပြင်းအထန်ရရှိကြောင်း၊ မမာမသီ အသက် ၄၅ နှစ်နှင့် မဒေါ တို့မှာလည်း ဒဏ်ရာများရရှိသဖြင့် ဆေးရုံတင် ဆေးကုသမှု ခံယူနေရကြောင်း သိရှိရသည်။
ထို့ပြင် နေအိမ်များ ပျက်စီးဆုံးရှုံးအဖြစ် ဦးအေးထွန်း၏ နေအိမ်နှင့် ဦးအောင်မြိုင်၏အိမ်မှာ ဗုံးထိမှန်ပျက်စီးကြောင်း၊ လိုက်ထရပ်ကား ၁ စီး၊ ဆိုင်ကယ် ၂ စီး၊ ဆီစက် ၁ လုံး၊ ထော်လာဂျီ ၁ စီး ပျက်စီးကာ နွား ၃ ကောင် သေဆုံးကြောင်း သိရှိရသည်။
အကြမ်းဖက်စစ်ကောင်စီတပ်က တိုက်ပွဲဖြစ်ပွားခြင်းမရှိဘဲ နွားထိုးကြီးမြို့နယ်အတွင်း လေယာဉ်ဖြင့် ဗုံးကျဲချခဲ့ခြင်းဖြစ်ကြောင်း ဒေသပြည်သူများက ပြောဆိုကြသည်။
