ရခိုင်တွင် ပျောက်ဆုံးနေသော ရဲတပ်ဖွဲ့ဝင် ရာပေါင်းများစွာရှိပြီး ကျန်ရစ်သူမိသားစုများကို စစ်ကောင်စီက လျစ်လျူရှုထား
ရန်ကုန်၊ ဇန်နဝါရီ ၁၅
ရခိုင်တိုက်ပွဲများတွင် သေဆုံးခဲ့သော ဒုရဲမှူး ဝင်းဌေး ကျဆုံးမှုကို စစ်တပ်က ၉ လကျော်အကြာမှ ကျန်ရစ်သူမိသားစုကို စစ် တပ်က အသိပေး အကြောင်းကြားကြောင်း ကျန်ရစ်သူ မိသားစုနှင့် နီးစပ်သော သတင်းရင်းမြစ်က ရန်ကုန်ခေတ်သစ်သတင်းဌာနထံသို့ ပြောဆိုသည်။
ရန်ကုန်မြို့၊ ယခင် ကျောက်တံတားမြို့နယ် ယာဉ်ထိန်းရဲစုမှူး ဖြစ်သူ ဒုရဲမှူး ဝင်းဌေးသည် ရခိုင်ပြည်နယ်သို့ ပြောင်းရွှေ့ခံရပြီးနောက် ၂၀၂၄ ခုနှစ် ဧပြီလ ၁၂ ရက်နေ့ နယ်ခြားစောင့်ရဲတပ်ဖွဲ့စခန်း အတိုက်ခံရပြီး သေဆုံးခဲ့ကြောင်း၊ သေဆုံးမှုကို ၂၀၂၅ ခုနှစ် ဇန်နဝါရီလ ၁၃ ရက်နေ့ တွင်မှ မိသားစုထံသို့ အသိပေး အကြောင်းကြားလာကြောင်း၊ ယနေ့ ဇန်နဝါရီလ ၁၅ ရက်နေ့ နာရေး သက်ပျောက်ဆွမ်းကပ်မည်ဖြစ်ကြောင်း သိရှီရသည်။
“ဒုရဲမှူး ၀င်းဌေး အရင်က ယာဥ်ထိန်းကျောက်တံထားစုမှူးပါ။ မနှစ် ဧပြီလ ၁၂ ရက်နေ့မှာ နယ်ခြားစောင့်ရဲတပ်ဖွဲ့စခန်း မှာကျတာကို ဒီနှစ် ဇန်နဝါရီလ ၁၃ ရက်နေ့မှာမှ ကျန်ရစ်သူ မိသားစုကို အသိပေးအကြောင်းကြားပါတယ်။ ဇန်နဝါရီလ ၁၅ ရက်နေ့မှာ မာန်အောင် ရဲရိပ်သာမှာ သက်ပျောက်ဆွမ်းကပ်မှာဖြစ်ပါတယ်။ သေပြီး ၉လကြာမှာအသိပေးတာပါ” ဟု ကျန်ရစ်သူ မိသားစုနှင့် နီးစပ်သော သတင်းရင်းမြစ်က ပြောဆိုသည်။
ဒုရဲမှူး ဝင်းဌေးသည် မိသားစုနှင့် အဆက်အသွယ်ပြတ်တောက်နေသည့်ကာလအတွင်းတွင်လည်း စစ်ကောင်စီက ပျောက်ဆုံးနေသည်ဟုဆိုကာ လစာနှင့်ခံစားခွင့်များ ထုတ်ယူခွင့်မပြုခဲ့ကြောင်း သိရှိရသည်။
ရခိုင်တိုက်ပွဲများတွင် နယ်ခြားစောင့်ရဲတပ်ဖွဲ့ရာပေါင်းများစွာ သေဆုံးမှုများ၊ ပျောက်ဆုံးမှုများရှိနေပြီး စစ်ကောင်စီက ကျန်ရစ်သူမိသားစုဝင်များကို လစာထုတ်မပေးခြင်း၊ လိုင်းခန်းအိမ်နေရာများမှ ပြောင်းရွှေ့ခိုင်းခြင်းများစွာ လုပ်ဆောင်နေကြောင်း၊ နယ်ခြားစောင့်ရဲတပ်ဖွဲ့စခန်း ၇ မှ ဒုရဲမှူး ကျော်ဇင်နိုင်သည် ၂၀၂၄ ခုနှစ် ဧပြီလကတည်းက ပျောက်ဆုံးခဲ့သော်လည်း လက်ရှိအချိန်အထိ သေဆုံး(သို့မဟုတ်) အဖမ်းခံရသည်ကို မသိရှိရသေးကြောင်း နယ်ခြားစောင့်ရဲတပ်သတင်းရင်းမြစ်တချို့က ပြောဆိုသည်။
“ကိုယ့်ခင်ပွန်းပျောက်နေတာ ၇ လရှိသွားပါပြီ။ သေတာလား ပျောက်နေတာလား အဖမ်းခံရတာလားမသိဘူး။ သူပျောက်သွားကတည်းက လစာထုတ်လို့မရတော့ဘူး။ ခံစားခွင့်လည်း ဘာမှ မရပါဘူး” ဟု နယ်ခြားစောင့်ရဲတပ်ဖွဲ့ဝင်တစ်ဦး၏ ဇနီးဖြစ်သူက ရန်ကုန်ခေတ်သစ်သတင်းဌာနထံသို့ ပြောဆိုသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
