ပေါက်ခေါင်းတွင် စစ်တပ်က စစ်မှုထမ်းရန် ပေါ်တာဆွဲ ဖမ်းဆီးခဲ့သော အမျိုးသား ၁ ဦး တပ်ထဲတွင် ရိုက်နှက်ခံရပြီး သေဆုံး၊ မိသားစုက အလောင်းပြန်ယူ သဂြိုလ်
ပဲခူးတိုင်း၊ ပေါက်ခေါင်းမြို့နယ်တွင် စစ်တပ်က စစ်မှုထမ်းရန် ပေါ်တာဆွဲ ဖမ်းဆီးခဲ့သော အမျိုးသား ၁ ဦး တပ်ထဲတွင် ရိုက်နှက်ခံရပြီး သေဆုံးသွားကြောင်း ပဲခူးဒေသသတင်းရင်းမြစ် ပြည်သစ္စာက ရန်ကုန်ခေတ်သစ်သတင်းဌာနထံသို့ ပြောဆိုသည်။
ဇန်နဝါရီလ ၁၀ ရက်နေ့ ညသန်းခေါင်ယံအချိန် ပဲခူးတိုင်းအနောက်ပိုင်း၊ ပြည်ခရိုင်၊ ပေါက်ခေါင်းမြို့နယ်၊ ပြည်-ပေါက်ခေါင်းလမ်း၊ တောင်ဇင်းဝအနီး ဝေဠုဝန်ရွာမှ အမျိုးသား ၃ ဦးကို စစ်တပ်က ဝင်ရောက် ပေါ်တာဆွဲ ဖမ်းဆီးခဲ့ကြောင်း၊ ထိုသို့ ဖမ်းဆီးခဲ့သော အမျိုးသား ၃ ဦးအနက်မှ ၁ ဦးမှာ ထွက်ပြေးလွတ်မြောက်ခဲ့ကြောင်း၊ ကျန် ၁ ဦးမှာလည်း မျက်လုံးတစ်ဖက် မရှိသည့်အတွက် စစ်တပ်က ပြန်လည် လွှတ်ပေးခဲ့ကြောင်း၊ နောက်ဆုံးကျန်ရစ်သူ ၁ ဦးတည်းကိုသာ စစ်တပ်က ပြည်မြို့ရှိ စုဆောင်းရေးတပ်ထဲသို့ ဖမ်းဆီးခေါ်ဆောင်သွားခဲ့ကြောင်း သိရှိရသည်။
ဇန်နဝါရီလ ၁၆ ရက်နေ့တွင် အဆိုပါ ဖမ်းဆီးခံရသော အမျိုးသားသည် ပြည်မြို့ရှိ ခလရ ၁၄ စုဆောင်းရေးတပ်အတွင်း ရိုက်နှက်ခံရပြီး သေဆုံးသွားသဖြင့် မိသားစုထံသို့ အလောင်းပြန်လာယူရန် အသိပေးအကြောင်းကြားလာကြောင်း၊ ထို့ကြောင့် ဇန်နဝါရီလ ၁၇ ရက်နေ့ တွင် ကျန်ရစ်သူ မိသားစုက သွားရောက် အလောင်းရယူ၍ နေ့ချင်းပြီး သဂြိုလ်လိုက်ကြောင်း သိရှိရသည်။
“ဖမ်းတာက ၃ ဦးမှာ ၁ ဦးက ထွက်ပြေးလွတ်မြောက်တယ်။ အခြား ၁ ဦးက မျက်စိတစ်ဖက်မရှိလို့ တပ်က ပြန်လွှတ်ပေးတယ်။ နောက်ဆုံးကျန်တဲ့ ၁ ဦးကတော့ တပ်ထဲဝင်ဖို့ လုံးဝ ငြင်းနေလို့ ရိုက် သတ်လိုက်တာလို့သိရတယ်” ဟု ဒေသသတင်းရင်းမြစ်က ဆိုသည်။
စစ်တပ်၏ သတ်ဖြတ်မှု ကြောင့် သေဆုံးသွားသော အမျိုးသားမှာ ဝေဠုဝန်ရွာမှ ကလေး ၂ ဦး၏ ဖခင်ဖြစ်ပြီး အလုပ်ကြမ်း သမားဖြစ်ကြောင်း၊ သေဆုံးသူမှာ စစ်မှုထမ်းရမည့် အသက် ၁၈ နှစ်မှ အသက် ၃၅ နှစ်အတွင်း အရွယ်မဟုတ်ဘဲ အသက်ကြီးရင့်နေပြီဖြစ်ကြောင်း သိရှိရသည်။
စစ်တပ်က ပြည်ခရိုင်အတွင်းတွင် စစ်မှုထမ်း တပ်သားသစ်များရရှိရေးအတွက် လူငယ်များကို အရှိန်အဟုန်ဖြင့် ပေါ်တာဆွဲ ဖမ်းဆီးမှုများ အကြီးအကျယ် လုပ်ဆောင်နေကြောင်း သိရှိရသည်။
ဓာတ်ပုံ- စစ်မှုထမ်း အပတ်စဉ် ၉ အတွက် စုဆောင်းခံရသည့် ရန်ကုန်မှ လူငယ်များ။
