ရန်ကုန်၊ ဧပြီ ၂
မန္တလေးတိုင်း၊ မိတ္တီလာတပ်နယ်တွင် ငလျင်ကြောင့် စစ်တပ်ဘက်မှ ၂၀ ကျော်သေဆုံးခဲ့ပြီး အမှတ် ၁ တပ်မတော်အကြီးစားစက်ရုံတွင်လည်း သေဆုံးမှုများပြားကြောင်း မိတ္တီလာတပ်နယ်ရှိ တပ်အသိုင်းအ၀ိုင်းထံမှ သိရှိရသည်။
မတ်လ ၂၈ ရက်နေ့ မွန်းလွဲပိုင်း လှုပ်ခတ်ခဲ့သော ငလျင်ကြောင့် အမှတ် ၉၉ ခြေမြန်တပ်မဌာနချုပ်တွင် လက် အောက် ခံတပ်ရင်းများမှ တာဝန်ရှိသူများအပါအဝင် တပ်နယ်ဆိုင်ရာ အစည်း အဝေး ကျင်းပနေချိန်ဖြစ်ပြီး အစည်းအဝေးခန်းမဆောင်ပြိုကျမှုကြောင့် သေဆုံးမှုများရှိခဲ့ကြောင်း သိရှိရသည်။
” ၄၁၈ တပ် အရာရှိတွေနဲ့ တပ်ဖွဲ့ဝင်တွေ သေဆုံးမှုရှိတယ်။ အရေအတွက်တော့ အတိအကျ မသိရဘူး။ သေဆုံး မှုကတော့ရှိပါတယ်။ အစည်းအဝေးခန်းမဆောင်တွေ ပြိုကျကုန်တာ” ဟု တပ်အသိုင်းအ၀ိုင်းက ဆိုသည်။
ထို့ပြင် မိတ္တီလာအခြေစိုက် အမှတ် ၁ တပ်မတော်အကြီးစားစက်ရုံ (တကစ ၁ )တွင်လည်း ငလျင်ဒဏ်ကြောင့် စက်ရုံအဆောက်များ ပြိုကျခဲ့ပြီး သေဆုံးမှုများရှိခဲ့ကြောင်း၊ တကစ ၁ သည် စစ်သုံးကား၊ သံချပ်ကာယာဉ်များကို အဓိကထားထုတ်လုပ်နေသည့် စက်ရုံတစ်ခုဖြစ်ကြောင်း သိရှိရသည်။
“တကစ ၁ မှာလည်း သေဆုံးမှုတွေကတော့ ရှိပါတယ်။ ဒါပေမယ့် သတင်းက ဖုံးထားတော့ အတိကျ ဘယ် လောက်ဆိုတာမျိုး မသိရဘူး။ အပျက်အစီးတွေလည်းများတယ်။ သေဆုံးမှုလည်းရှိတယ်” ဟု တပ်အသိုင်းအ၀ိုင်း က ပြောဆိုသည်။
နေပြည်တော်၊ ဇေယျာသီရိမြို့နယ်ရှိ စစ်တပ်ပိုင် စစ်ရုံးတွင် အဆောက်အအုံများစွာ ပြိုကျခဲ့သဖြင့် သေဆုံးမှုများစွာရှိခဲ့ပြီး အနည်းဆုံး အရာရှိနှင့် စစ်သား ၁၀၀ ဝန်းကျင်သေဆုံးနိုင်ကြောင်း တပ်သတင်းအရင်းအမြစ်များ၏ အဆိုအရ သိရှိရသည်။
ဓာတ်ပုံ – နေပြည်တော်တွင် မတ်လ ၂၈ ရက်နေ့ ငလျင်ကြောင့် သေဆုံးခဲ့သော စစ်သားတစ်ဦး၏ နာရေးကြော်ငြာ။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
