ရန်ကုန်၊ ဧပြီ ၃
ရက် ၂၀ ကြာ အပစ်ရပ်ထားသော အကြမ်းဖက် စစ်ကောင်စီက ကနီမြို့နယ်နှင့် တောင်သာမြို့နယ်ရှိ ကျေးရွာများကို စက်တပ် လေထီးဖြင့် ဗုံးကျဲ တိုက်ခိုက်နေကြောင်း Dragon Brothers Task Force- DBTF နှင့် တောင်သာမြို့နယ် လူထုလှုပ်ရှားမှုကော်မတီမှ တာဝန်ရှိသူများက ရန်ကုန်ခေတ်သစ်သတင်းဌာနထံသို့ ပြောဆိုသည်။
ယနေ့ ဧပြီလ ၃ ရက်နေ့ မွန်းလွဲ ၂ နာရီခန့်တွင် ကနီမြို့နယ် မုဌောရွာ နှင့် တောင်ပြောက်ရွာ တို့ကို အကြမ်းဖက် စစ်တပ်က စက်တပ် လေထီးဖြင့် ဗုံးကျဲ တိုက်ခိုက်ခဲ့ခြင်းဖြစ်ကြောင်း သိရသည်။
အကြမ်းဖက် စစ်တပ်၏ လေကြောင်း တိုက်ခိုက်မှု အတွင်းပြည်သူများ ထိခိုက်မှုရှိမရှိကို အတည်ပြုနိုင်ခြင်းမရှိသေးဘဲ လက်ရှိချိန်တွင် ကျေးရွာနေ ပြည်သူများသည် ထွက်ပြေးတိမ်းရှောင်နေရကြောင်း သိရှိရသည်။
“အခုပဲ တိုက်ခိုက်သွားတာ စက်တပ် လေထီးနဲ့ ၅ ကြိမ် ဗုံးကျဲသွားတယ်။ မုဌောရွာ နဲ့ တောင်ပြောက်ရွာ ကိုကျဲသွားတာလို့ သိရတယ်။ ပြည်သူတွေ ထိခိုက်မှုရှိမရှိကိုတော့ အတည်မပြုနိုင်သေးဘူး” ဟု Dragon Brothers Task Force- DBTF မှ တာဝန်ရှိသူ တစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။
အလားတူ မန္တလေးတိုင်း၊ တောင်သာမြို့နယ်ရှိ ကျေးရွာများကိုလည်း အကြမ်းဖက် စစ်တပ်က စက်တပ် လေထီးများဖြင့် ဗုံးကျဲ တိုက်ခိုက်ခဲ့ကြောင်း တောင်သာမြို့နယ် လူထုလှုပ်ရှားမှုကော်မတီမှာ တာဝန်ရှိသူ တစ်ဦးကရန်ကုန်ခေတ်သစ်သတင်းဌာနထံသို့ ပြောဆိုသည်။
ယနေ့ ဧပြီလ ၃ ရက်နေ့ နံနက်အစောပိုင်း ၂ နာရီ ၂၈ မိနစ်ခန့်တွင် မိတ္ထီလာလေတပ်မှ တက်လာသော စက်တပ် လေထီးများဖြင့် တောင်သာမြို့နယ်၊ ရေကျော်ကျေးရွာကို ဗုံးသီး ၉ လုံးကျဲချ တိုက်ခိုက်ခဲ့ခြင်းဖြစ်ကြောင်း သိရသည်။
အကြမ်းဖက် စစ်တပ်၏ လေကြောင်းတိုက်ခိုက်မှုကြောင့် ရေကျော်ကျေးရွာ စာသင်ကျောင်း အဆောက်အဦးများ ပျက်စီးခဲ့ပြီး ပြည်သူများ ထိခိုက်မှုမရှိကြောင်း သိရှိရသည်။
“စာသင်ကျောင်းဆောင်တော့ ပျက်စီးသွားတယ်။ ပြည်သူတွေ ထိခိုက်မှုမရှိဘူး။ စစ်ကောင်စီက တစ်ဘက်မှာတော့ ဝမ်းနည်းတယ်။ အပစ်ရပ်တယ်ပြောနေပေမယ့် တစ်ဘက်မှာတော့ ပြည်သူတွေကို လေကြောင်းတိုက်ခိုက်မှုတွေကတော့ ဆက်တိုက်လုပ်နေတာပါ။ ဒီလုပ်ရပ်က အင်မတန် ယုတ်ညံ့တဲ့ လုပ်ရပ်ပါ။ စစ်ကောင်စီကို ပြောစရာ စကားတောင်မရှိတော့ဘူး” ဟု တောင်သာမြို့နယ် လူထုလှုပ်ရှားမှုကော်မတီမှာ တာဝန်ရှိသူ တစ်ဦးက ပြောဆိုသည်။
အကြမ်းဖက် စစ်ကောင်စီက မတ်လ ၂၈ ရက်နေ့ ငလျင်လှုပ်အပြီး နိုင်ငံတစ်ဝန်း လေကြောင်းတိုက်ခိုက်မှုများ ဆက်တိုက် လုပ်ဆောင်ခဲ့ပြီးနောက် ဧပြီလ ၂ ရက်နေ့မှ ၂၂ ရက်နေ့အထိ ရက် ၂၀ ကာလကို ယာယီအပစ် ရပ်ကာလအဖြစ် သတ်မှတ်ကြောင်း ဧပြီလ ၂ ရက် ညပိုင်းတွင် ထုတ်ပြန်ခဲ့ခြင်းဖြစ်သည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
