ရန်ကုန်၊ ဧပြီ ၃
စစ်ကိုင်းတိုင်း၊ ယင်းမာပင်မြို့နယ်နှင့် ဆားလင်းကြီးမြို့နယ် အစပ်ရှိ ကျေးရွာများကို ဝမ်ပေါင် ကုမ္ပဏီမှ ထွက်လာသော အကြမ်းဖက် စစ်တပ်က စစ်ကြောင်းထိုးနေပြီး ပြည်သူ ၁ ဦးကို ဖမ်းဆီးကာ ထောင်နှင့်ချီသော ပြည်သူများ ဘေးလွတ်ရာ ထွက်ပြေးနေရကြောင်း ဒေသပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုသည်။
ဧပြီလ ၂ ရက်နေ့ ညနေပိုင်းတွင် ဝမ်ပေါင် ကုမ္ပဏီမှ ကြေးနီကားများနှင့် အက်ဆစ်ကားများ ထွက်လာပြီးနောက် အကြမ်းဖက် စစ်ကောင်စီ တပ်သားများက မုံရွာ-ပုသိမ် လမ်းပိုင်းတစ်လျှောက်ကို စစ်ကြောင်းထိုးဝင်ရောက်လာပြီး ကျေးရွာများကို လက်နက်ကြီး၊ လက်နက်ငယ်များဖြင့် ပစ်ခတ် တိုက်ခိုက်ခဲ့ခြင်းဖြစ်ကြောင်း သိရသည်။
အဆိုပါ အကြမ်းဖက် စစ်တပ် စစ်ကြောင်းသည် လက်ရှိချိန်ထိ မုံရွာ-ပုသိမ် လမ်းပိုင်းရှိ မြောက်ယမား ချောင်းကူး တံတားအနီးတွင်ရှိနေပြီး ဒေသ လူငယ် ၁ ဦးကိုလည်း ဖမ်းဆီးထားကြောင်း၊ အကြမ်းဖက် စစ်ကောင်စီ တပ်သားများ၏ လက်နက်ကြီး၊ လက်နက်ငယ်များဖြင့် ရမ်းသမ်း ပစ်ခတ်မှုကြောင့် ကျေးရွာ ၃ ရွာကျော်မှ ထောင်နှင့်ချီသော ပြည်သူများ ထွက်ပြေး တိမ်းရှောင်နေရကြောင်း သိရှိရသည်။
” မနေ့က ည ၇ နာရီလောက်မှာ ဝမ်ပေါင် ကုမ္ပဏီကနေပြီးတော့ ကားတွေ စထွက်လာတာပေါ့။ အဲအချိန်မှာ စစ်တပ်ကလည်း လုံခြုံရေးယူမယ်ဆိုတဲ့ အကြမ်းဖက် စစ်အုပ်စုကလည်း မုံရွာ-ပုသိမ် လမ်းတစ်လျောက်ကို ရောက်လာပြီးတော့ မြောက်ယမား တံတားကနေပြီးတော့ လမ်းဘေးဝဲယာ ကျေးရွာတွေကို လက်နက်ကြီး၊ လက်နက်ငယ်တွေရမ်းပစ်တာ အဲတာကြောင့် ကျေးရွာ ၃ ရွာကျော်လောက်က ပြည်သူ ၃ ထောင်လောက် တိမ်းရှောင်နေရတာ လူငယ် ၁ ဦးလည်း ဖမ်းဆီးခံထားရတယ်လို့ သိရတယ်။ ဘယ်ရွာကလည်းဆိုတော့ မသိရသေးဘူး” ဟု ဒေသပြည်သူ တစ်ဦးက ပြောဆိုသည်။
အကြမ်းဖက် စစ်ကောင်စီ တပ်သားများ၏ လက်နက်ကြီး၊ လက်နက်ငယ်များဖြင့် ရမ်းသမ်း ပစ်ခတ်မှုကြောင့် ပြည်သူများသည် လက်ရှိချိန်ထိ စစ်ဘေးတိမ်းရှောင်နေရဆဲဖြစ်ပြီး စစ်တပ် စစ်ကြောင်းလည်း ပြန်လည် ဆုတ်ခွာခြင်းမရှိသေးကြောင်း သိရသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
