ရန်ကုန်၊ မေ ၂၃
မန္တလေးတိုင်း၊ တောင်သာမြို့နယ်၊ ရုံးစဉ်လေးရွာ ဘုန်းကြီးကျောင်းကို အကြမ်းဖက် စစ်တပ်က စက်တပ်လေထီးဖြင့် ဗုံးကျဲ တိုက်ခိုက်ခြင်းကြောင့် သိမ်ကျောင်းနှင့် နေအိမ်များ ထိမှန် ပျက်စီးခဲ့ကြောင်း တောင်သာမြို့နယ် လူထုလှုပ်ရှားမှုကော်မတီမှ တာဝန်ရှိသူ တစ်ဦးက ရန်ကုန်ခေတ်သစ်သတင်းဌာနထံသို့ပြောဆိုသည်။
မေလ ၂၂ ရက်နေ့ နံနက် ၅ နာရီ ၄၄ မိနစ်ခန့်တွင် ရုံးစဉ်လေး(ခ)ရွှေစည်ကြီး ကျေးရွာကို အကြမ်းဖက် စစ်တပ်က စက်တပ်လေထီး ၅ စီးဖြင့် ဗုံးသီး ၁၄ လုံး ကျဲချ တိုက်ခိုက်ခဲ့ကြောင်း သိရသည်။
အကြမ်းဖက် စစ်တပ်၏ လေကြောင်းတိုက်ခိုက်မှုကြောင့် ရုံးစဉ်လေး(ခ)ရွှေစည်ကြီး ကျေးရွာကို ဘုန်းကြီးကျောင်းကို ဗုံးသီးများ ကျရောက် ပေါက်ကွဲခဲ့ပြီး သိမ်ကျောင်းနှင့် နေအိမ် ၁ လုံး ထိမှန်ပျက်စီးခဲ့ပြီး နွား ၁ ကောင်လည်း သေဆုံးခဲ့ကြောင်း သိရှိရသည်။
“မနေ့က နံနက် အစောပိုင်းပေါ့။ မိတ္ထီလာ လေတပ်က တက်လာတဲ့ စက်တပ်လေထီး ၅ စီးက ရုံးစဉ်လေးရွာကို ဗုံးသီး ၁၄ လုံးကျဲချ တိုက်ခိုက်ခဲ့တာပါ။ နေအိမ် ၁ လုံးနဲ့ ဘုန်းကြီးကျောင်းမှ သိမ် ၁ လုံး ပျက်ဆီးခဲ့တယ်။ လူထိခိုက်တာတော့ မရှိဘူး” ဟု တောင်သာမြို့နယ် လူထုလှုပ်ရှားမှုကော်မတီမှ တာဝန်ရှိသူ တစ်ဦးက ပြောဆိုသည်။
ပြည်သူများ အနေဖြင့် လေကြောင်းရန် ကာကွယ်ရေးအတွက် နေအိမ်များ၌ ဗုံးခိုကျင်းများ စနစ်တကျတူးခြင်းနှင့် လေကြောင်းအန္တရာယ်ကြိုတင်ရရှိပါက သတိပြုနေထိုင်ကြရန် တောင်သာမြို့နယ် လူထုလှုပ်ရှားမှုကော်မတီက တိုက်တွန်းထားသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
