ထိုင်းနိုင်ငံ၊ တာ့ခ်ခရိုင်နှင့် ကန်ချနဘူရီခရိုင်တွင် တရားမဝင် ဝင်ရောက်လာသော မြန်မာနိုင်ငံသား ၁၁၆ ဦး ဖမ်းဆီးရရှိပြီး ကလေးငယ်များပါ ပါဝင်ကြောင်း ထိုင်းနိုင်ငံမှ လာသော သတင်းများအရ သိရှိရသည်။
အောက်တိုဘာလ ၁၁ ရက်နေ့ ထိုင်းနိုင်ငံ၊ တာ့ခ်ခရိုင်၊ ထိုင်း-မြန်မာနယ်စပ်၊ ဖုတ်ဖရမြို့တွင် တရားမဝင် မြန်မာနိုင်ငံသား ၉ ဦးလိုက်ပါလာသော ကားကို စစ်ဆေးရန် ထိုင်းအာဏာပိုင်များက ရပ်တန့်ခိုင်းခဲ့ကြောင်း၊ သို့ရာတွင် ကားမှာ မရပ်တန့်ဘဲ ထွက်ပြေးသွားသဖြင့် လိုက်လံဖမ်းဆီးရာ ယာဉ်မှာ အရှိန်မထိန်းနိုင်ဘဲ လမ်းဘေး မြက်တောထဲသို့ ကားမှာ ရောက်ရှိသွားပြီး ကားပေါ်ပါ တရားမဝင် မြန်မာနိုင်ငံသား ၉ ဦးကို ဖမ်းဆီးရရှိခဲ့ကြောင်း၊ ထို့ပြင် ကားမောင်းသမားနှင့်အခြားထိုင်း ၁ ဦးကိုလည်း ဖမ်းဆီးရရှိခဲ့ကြောင်း သိရှိရသည်။
ဖမ်းဆီးရရှိသော မြန်မာနိုင်ငံသား ၉ ဦးတွင် တရားဝင် အထောက်အထားတစ်စုံတစ်ရာ ပါရှိခြင်းမရှိဘဲ တစ်ဦးလျှင် ထိုင်းဘတ် ၄၅၀၀ ပေး၍ ဝင်ရောက်လာခြင်းဖြစ်ကြောင်း၊ အဆိုပါ မြန်မာနိုင်ငံသားများကို ဖုတ်ဖရမြို့နယ် ရဲစခန်းတွင် အမှုဖွင့် အရေးယူထားကြောင်း သိရှိရသည်။
အလားတူ ထိုင်းနိုင်ငံ၊ ကန်ချနဘူရီခရိုင်တွင်လည်း ယမန်နေ့ အောက်တိုဘာလ ၁၁ ရက်နေ့ မြန်မာနိုင်ငံသား ၁၀၇ ဦးလိုက်ပါလာသော အလုံပိတ်ကား ၁ စီးကို ထိုင်းအာဏာပိုင်များက တားဆီး စစ်ဆေးခဲ့ပြီး တရားမဝင် မြန်မာနိုင်ငံသားများအားလုံးကို ဖမ်းဆီး ရရှိခဲ့ကြောင်း သိရှိရသည်။
အဆိုပါ မြန်မာနိုင်ငံသားများမှာ ထိုင်းနိုင်ငံအတွင်း အလုပ်လုပ်ရန်အတွက် ဘုရားသုံးဆူမြို့မှ တစ်ဆင့် ဝင်ရောက်လာခြင်းဖြစ်ပြီး မိသားစုလိုက် ဝင်ရောက်လာသူများလည်းရှိကြောင်း၊ ဖမ်းဆီးခံရသူများတွင် ကလေးငယ်များလည်း ပါဝင်ကြောင်း သိရှိရသည်။
