အာဆီယံ ဘုံသဘောတူညီချက် ၅ ချက် အကောင်အထည်ဖော်ရန် ပျက်ကွက်နေမှုကြောင့် မြန်မာစစ်ခေါင်းဆောင်များကို အာဆီယံထိပ်သီးနှင့်ဆက်စပ် အစည်းအဝေးများ တက်ရောက်ခွင့် ဆက်လက်ပိတ်ပင်

ရွေးကောက်ပွဲ မကျင်းပမီ အကြမ်းဖက်မှုများရပ်တန့်ရန်နှင့် အားလုံးပါဝင်သော တွေ့ဆုံညှိနှိုင်းရေး လုပ်ဆောင်ရမည်ဟု အာဆီယံက အသိပေး

ရန်ကုန်၊ အောက်တိုဘာ ၂၇

မြန်မာအကြမ်းဖက်စစ်တပ်အနေဖြင့် အာဆီယံဘုံသဘောတူညီချက် ၅ ချက်ကို အကောင်အထည်ဖော်ရန် ပျက်ကွက်နေသည့်အတွက် မြန်မာစစ်ခေါင်းဆောင်များကို အာဆီယံ ထိပ်သီးအစည်းအဝေးနှင့် ဆက်စပ်အစည်းအဝေးများ တက်ရောက်ခွင့် ဆက်လက်ပိတ်ပင်လိုက်ကြောင်း အာဆီယံနိုင်ငံခြားရေးဝန်ကြီးများ အစည်းအဝေးက ဆုံးဖြတ်ကြေညာချက် ထုတ်ပြန်လိုက်သည်။

မလေးရှားနိုင်ငံ၊ ကွာလာလမ်ပူမြို့ တွင် အောက်တိုဘာလ ၂၆ ရက်နေ့ အာဆီယံနိုင်ငံခြားရေးဝန်ကြီးများအစည်းအဝေးအပြီး အချက် ၂၈ ချက်ပါ မြန်မာ့အရေး ဆွေးနွေးချက် ကြေညာစာတမ်းကို ထုတ်ပြန်ခဲ့ပြီး ယင်းကြေညာချက်တွင် အဓိက အချက်များအနေဖြင့် မြန်မာစစ်တပ်က အာဆီယံဘုံသဘော တူ ညီချက် ၅ ချက်ကို အဓိပ္ပာယ်ရှိသော အကောင်အထည်ဖော် တိုးတက်မှုများ မလုပ်ဆောင်သေးလျှင် အာဆီယံထိပ်သီးအစည်းအဝေးနှင့် နောက်ဆက်တွဲ ဆက်စပ် အစည်းအဝေးများတွင် မြန်မာစစ်ခေါင်းဆောင်များ တက်ရောက်ခွင့်ပြုမည်မဟုတ်ဘဲ နိုင်ငံရေးအရ ကိုယ်စားမပြုသူကိုသာ တက်ခွင့်ပြုမည်ဖြစ်ကြောင်း သိရှိရသည်။

ထို့ပြင် အာဆီယံနိုင်ငံခြားရေးဝန်ကြီးများအစည်းအဝေး၏ ကြေညာချက်တွင် ရွေးကောက်ပွဲများမကျင်းပမီ နိုင်ငံရေးအကျပ်အတည်းကို ဖြေရှင်းရန် ဘုံသဘောတူညီချက် ၅ ချက်ကို အကောင်အထည်ဖော်ပြီး အကြမ်းဖက်မှုများကို ရပ်တန့်ရမည်ဖြစ်ကြောင်း ထုတ်ပြန်ကြေညာထားသည်။

“မြန်မာနိုင်ငံတွင် အကြမ်းဖက်မှုများကို လျှော့ချရန်နှင့် အရပ်သားများနှင့် အရပ်ဘက်အခြေခံအဆောက်အအုံများကို ပစ်မှတ်ထားတိုက်ခိုက်မှုများကို ရပ်တန့်ရန်၊ ယုံကြည်မှုတည်ဆောက်ရေး ကြိုးပမ်းမှုများကို မြှင့်တင်ရန် တိုက်တွန်းပါသည်။ ” ရွေးကောက်ပွဲများမတိုင်မီ အကြမ်းဖက်မှုများ ရပ်တန့်ခြင်းနှင့် အားလုံးပါဝင်သည့် နိုင်ငံရေးဆွေးနွေးပွဲများ ကျင်းပရမည်ဟု အလေးပေးပြောကြားလိုပါသည်” ဟု အာဆီယံနိုင်ငံခြားရေးဝန်ကြီးများ၏ ကြေညာချက်တွင် ဖော်ပြထားသည်။

မြန်မာစစ်တပ်က လာမည့် ဒီဇင်ဘာလတွင် ရွေးကောက်ပွဲကျင်းပရန် စီစဉ်နေမှုနှင့် လေ့လာစောင့်ကြည့်ရေးအဖွဲ့များကို ဖိတ်ခေါ်မှုနှင့်ပတ်သက်၍ ရွေးကောက်ပွဲသည် လွတ်လပ် မျှတ ငြိမ်းချမ်း ပွင့်လင်းမြင်သာပြီး အားလုံးပါဝင်သည့် ယုံကြည်စိတ်ချရသော ရွေးကောက်ပွဲဖြစ်ရမည်ဖြစ်ကြောင်း အာဆီယံ ထုတ်ပြန်ကြေညာသည်။

မြန်မာနိုင်ငံအခြေအနေကြောင့် နောက်ဆက်တွဲ ဖြစ်ပေါ်လာသော လူကုန်ကူးမှု၊ မူးယစ်ဆေးဝါးမှောင်ခိုရောင်းဝယ်မှု၊ နေရပ်စွန့်ခွာမှု၊ ဆိုက်ဘာခြိမ်းခြောက်မှုများနှင့် အွန်လိုင်းလိမ်လည်မှုများအပါအဝင် ပဋိပက္ခမှပေါ်ပေါက်လာသော နိုင်ငံဖြတ်ကျော်ရာဇဝတ်မှုများကို ကိုင်တွယ်ဖြေရှင်းရေး အားလုံးပူးပေါင်းဆောင်ရွက်ရန် သဘောတူညီခဲ့ကြောင်း သိရှိရသည်။

အာဆီယံက မြန်မာနိုင်ငံပြည်သူများ ငြိမ်းချမ်းရေး၊ တည်ငြိမ်ရေးနှင့် ဒီမိုကရေစီရရှိရေးအတွက် ကူညီရန် ကုလသမဂ္ဂ၊ နိုင်ငံတကာတို့နှင့်အတူ လက်တွဲ ဆက်လက်လုပ်ဆောင်သွားမည်ဖြစ်ပြီး အနာဂတ်အစည်းအဝေးများတွင် တိုးတက်မှုကို ပြန်လည်သုံးသပ်သွားမည်ဖြစ်ကြောင်း သိရှိရသည်။

#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar