ရွှေမြန်မာစံ အလုပ်အကိုင်အေဂျင်စီက ထိုင်းနိုင်ငံသို့ အလုပ်ဖြင့် ပို့ဆောင်ပေးမည်ဟုဆိုကာ လူ ၁ ဦးလျှင် ငွေကျပ် သိန်း ၂၀ စရန်တောင်းယူပြီး နိုင်ငံကူးလက်မှတ်ပါ ပြန်မပေး၍ အခက်ကြုံ

ရန်ကုန်၊ နိုဝင်ဘာ ၂၈

ရန်ကုန်မြို့ ဗိုလ်အောင်ကျော်လမ်းတွင် ဖွင့်လှစ်ထားသည့် ရွှေမြန်မာစံ အလုပ်အကိုင်အေဂျင်စီက ထိုင်းနိုင်ငံသို့ အလုပ်ဖြင့် ပို့ဆောင်ပေးမည်ဟုဆိုကာ လူ ၁ ဦးလျှင် ငွေကျပ် သိန်း ၂၀ စရန်တောင်းယူပြီး နိုင်ငံကူးလက်မှတ်ပါ ပြန်မပေးတော့ကြောင်း အဆိုပါ အေဂျင်စီနှင့် အလုပ်အပ်ထားသော လူငယ်တချို့က ရန်ကုန်ခေတ်သစ်သတင်းဌာနထံသို့ ပြောဆိုသည်။

ထိုင်းနိုင်ငံသို့ အလုပ်လုပ်ကိုင်ရန် ပို့ဆောင်ပေးမည်ဟု ဆိုကာ အနည်းဆုံး လူ ၁၅ ဦးထံမှ ၁ ဦးလျှင် စရန်ငွေ အနည်းဆုံး ကျပ် သိန်း ၂၀ နှင့် ပတ်စ်ပို့များ တောင်းယူထားသော်လည်း အမှန်တကယ် ပြည်ပပို့ပေးခြင်းမရှိသည့်အပြင် စရန်ငွေနှင့် ပတ်စ်ပို့ ပြန်မပေးတော့ကြောင်း၊ ထိုင်း နိုင်ငံသို့ သွားရောက်အလုပ်လုပ်ကိုင်ရန်အတွက် ကြိုတင်ငွေများ ပေးသွင်းထားသည်မှာ ၁၁ လခန့်ကြာမြင့်ခဲ့သော်လည်း လက်ရှိ အချိန်အထိ သွားရောက်ရခြင်းမရှိသေးကြောင်း ၊ ၂၀၂၅ ခုနှစ် ဇန်နဝါရီလကတည်းက လူ ၁ ဦးလျှင် ကြိုတင်ငွေ သိန်း ၂၀ ပေးထားရပြီး ပတ်စ်ပို့များကိုပါ ပေးထားခဲ့ရကြောင်း သိရှိရသည်။

“၁ လပိုင်း ၂၀၂၅ ကတည်းက ပေးထားတာ အခုချိန်ထိ ဘာမှ ဖြေရှင်းမှု မလုပ်ပေးသေးပါဘူး။ ရွှေမြန်မာစံကုမ္ပဏီရဲ့ MD ကိုမျိုးသက်ပိုင်ကလည်း ပိုက်ဆံကိစ္စကို ဘောလီဘောပုတ်နေပါတယ်ဗျ။ ကျွန်တော်တို့မှာ ပတ်စပို့စ်စာအုပ်တွေလည်း ပြန်တောင်းမရ လမ်းပျောက်နေပါတယ်။ နယ်ကလူတွေဆို ပိုက်ဆံတွေ ဆုံးတာမှ အများကြီးပဲဗျ” ဟု အလုပ်အပ်ထားသော လူငယ်တစ်ဦးက ရန်ကုန်ခေတ်သစ်သတင်းဌာနသို့ ပြောကြားသည်။

နိုင်ငံခြားသို့ အလုပ်သွားရောက်လုပ်ကိုင်ရမည်ဟုဆိုကာ မသွားရဘဲ သောင်တင်နေသူ အနည်းဆုံး ၁၅ ဦး ဝန်းကျင်ခန့်ရှိကြောင်း၊ ထိုအထဲတွင် စာချုပ်ပါ ချုပ်၍ ငွေ အကြေပေးသွင်းထားသူများပါ ရှိကြောင်း၊ အလုပ်အပ်ထားသူများက သွားရောက် ပြောဆို အရေးဆိုသော်လည်း ရုံးခွဲနှင့် ရုံးချုပ်အကြား အပြန်အလှန်လွှဲချနေကြောင်း သိရှိရသည်။

“သူတို့ရုံးခွဲက မြောက်ဒဂုံ ဇွဲကပင်လမ်းမှာ အခု Mingalar Asia ဆိုပြီး ဆိုင်ဘုတ်ထောင်ထားပါတယ်။ ရုံးချုပ် ရွှေမြန်မာစံကတော့ ဗိုလ်အောင်ကျော်လမ်းမှာ ယခုအချိန်အထိ မျက်နှာပြောင်တိုက်ပြီး ဖွင့်ထားဆဲပါ။ သူတို့ ကုမ္ပဏီက ဝန်ထမ်းတွေရဲ့ အဆိုအရ သူတို့က စာချုပ်ချုပ်ပြီးသားလူတွေကိုပါ မဖြေရှင်းပါဘူးတဲ့”ဟု ထိုင်းသို့ သွားရောက် အလုပ်အပ်နှံထားသော အခြားလူငယ်တစ်ဦးက ရှင်းပြသည်။

ပြည်ပအလုပ်အကိုင်အေဂျင်စီအသိုင်းအ၀ိုင်းကမူ ယခုနောက်ပိုင်း စစ်တပ်က ပြည်ပသို့ သွားရောက် အလုပ်လုပ်ခြင်းများကို ကန့်သတ်မှုများစွာ လုပ်ဆောင်လာ၍ ပြည်ပသို့ အလုပ်သမားပို့ဆောင်ရန် ခက်ခဲလာကြောင်း၊ ပြည်ပထွက် အလုပ်သမားပို့ဆောင်ရန် ခက်ခဲလာချိန် အေဂျင် စီတချို့က အလုပ်အပ်နှံထားသော ငွေကြေးများကို ပြန်လည် ပေးအပ်မှုများရှိသော်လည်း တချို့အေဂျင်စီများမှာ ငွေပြန်မပေးကြကြောင်း ၊ ထို့ကြောင့်အေဂျင်စီနှင့် အလုပ်အပ်နှံသော အလုပ်သမားများအကြား ပြဿနာများဖြစ်ပွားလျက်ရှိကြောင်း ပြောဆိုသည်။

ဓာတ်ပုံ – ရွှေမြန်မာစံပြည်ပအလုပ်အကိုင်အေဂျင်စီနှင့် ပြည်ပသို့ သွားရောက်ခဲ့ကြသော လူငယ်တချို့။ (ပုံအဟောင်းဖြစ်ပါသည်။)

#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar