စစ်ကိုင်းတိုင်း၊ တန့်ဆည်မြို့နယ်၊ မူးတိမ်ပျူစောထီးရွာကို တိုက်ခိုက် သိမ်းပိုက်ရာ လက်နက် ၅ လက်နှင့် စစ်အသုံးအဆောင် ပစ္စည်းများ သိမ်းဆည်းရရှိခဲ့ကြောင်း ဓူဝံပြည်သူ့ကာကွယ်ရေးအဖွဲ့ ရေဦးမှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
ယနေ့ နိုဝင်ဘာလ ၂၈ ရက်နေ့ နံနက် ၄ နာရီခန့်မှ စတင်ပြီး တန့်ဆည်မြို့နယ်၊ မူးတိမ်ပျူစောထီးရွာကို တော်လှန်ရေး တပ်ဖွဲ့များက ဝင်ရောက် တိုက်ခိုက်ခဲ့ပြီး နံနက် ၈ နာရီခန့်တွင် သိမ်းပိုက်ရရှိခဲ့ကြောင်း သိရသည်။
တိုက်ပွဲအတွင်း မူးတိမ်ပျူစောထီးရွာမှ စစ်သားနှင့် ပျူစောထီးများ ထွက်ပြေးတိမ်းရှောင်သွားပြီး အကြမ်းဖက် စစ်သားများထံမှ လက်နက် ၅ လက်နှင့် စစ်အသုံးအဆောင် ပစ္စည်းများ သိမ်းပိုက်ရရှိခဲ့ကြောင်း သိရှိရသည်။
ထို့ပြင် တိုက်ပွဲအတွင်း အကြမ်းဖက် စစ်တပ်ဘက်မှလည်း တံတားဦး လေတပ်မှ တက်လာသော ဂျက်ဖိုက်တာ ၁ စီးက ၂ ကြိမ် လေကြောင်း တိုက်ခိုက်ခဲ့ပြီး ဟုမ္မလင်းမှ တက်လာသော Y-12 လေယာဉ်ကလည်း ဗုံး ၈၀ လုံးခန့် ၁၂ ကြိမ် ကျဲချ တိုက်ခိုက်ခဲ့ကြောင်း၊ ကန့်ဘလူ ၆၀၀၆ တပ်မှ အကြမ်းဖက် စစ်သားများကလည်း တိုက်ပွဲဖြစ်ပွားရာနေရာကို ဟောင်ဝှစ်ဇာ လက်နက်ကြီးဖြင့် ပစ်ကူပေး တိုက်ခိုက်ခဲ့ကြောင်း သိရသည်။
“ဒီနေ့ နံနက် ၄ နာရီလောက်မှာ စပြီး ပျူစောထီးရွာကို တော်လှန်ရေးအဖွဲ့တွေ စတင်တိုက်ခိုက်ခဲ့တာ နံနက် ၈ နာရီမှာ သိမ်းပိုက်နိုင်ခဲ့တယ်။ ရန်သူ့ လက်နက် ၅ လက်နဲ့ စစ်အသုံးအဆောင်တချို့ သိမ်းဆည်းရမိပါတယ်” ဟု ဓူဝံပြည်သူ့ကာကွယ်ရေးအဖွဲ့ ရေဦးမှ တာဝန်ရှိသူက ပြောဆိုသည်။
အဆိုပါ တိုက်ခိုက်မှုကို ဗျူဟာ ၅၂ ပေါ်ဦးစစ်ကြောင်း၊ တန့်ဆည်မြို့နယ် ပကဖ၊ ရွှေဘိုခရိုင် အမှတ်၂၅ တပ်ရင်း၊ ပြည်သူ့လွတ်မြောက်ရေးတပ်မတော် PLA ၊ ဓူဝံ ရေဦးမြို့နယ်အဖွဲ့၊ ဝံသပါလ ရေဦးမြို့နယ်အဖွဲ့၊ Drone force Taze တို့က ပူးပေါင်း လုပ်ဆောင်ခဲ့ကြောင်း သိရသည်။
