ရန်ကုန်၊ ဒီဇင်ဘာ ၁
မြ၀တီမြို့နယ်အတွင်း KNU က စစ်ဆေးမှုများလုပ်နေသော မင်းလက်ပံကျားဖြန့်ဝင်းကို ပြန်လည်ရရှိရေး စစ်တပ်က အပြင်းအထန်ထိုးစစ်ဆင်နေရာ ယမန်နေ့ညပိုင်းအထိ တိုက်ပွဲပြင်းထန်ခဲ့ကြောင်း ကရင်စစ်ရေး သတင်းရင်းမြစ်က ရန်ကုန်ခေတ်သစ်သတင်းဌာနထံသို့ ပြောဆိုသည်။
ယမန်နေ့ နိုဝင်ဘာလ ၃၀ ရက်နေ့ မြ၀တီမြို့နယ်၊ မင်းလက်ပံအနီးသို့ စစ်တပ်က အလုံးအရင်းဖြင့် စစ်ကြောင်းထိုးလာကြောင်း၊ မြေပြင်စစ်တပ်စစ်ကြောင်းကို KK Park အတွင်းမှ စစ်တပ်ကလည်းကောင်း၊ မြ၀တီမြို့စောင့်တပ် ၂၇၅ ကလည်းကောင်း လက်နက်ကြီးများဖြင့် ပစ်ကူပေးခဲ့ကြောင်း၊ မြန်မာစစ်တပ်က ပစ်ခတ်သော လက်နက်ကြီးများမှာ ယမန်နေ့ နံနက်ပိုင်း ထိုင်းနိုင်ငံထဲသို့ ကျရောက်ခဲ့ပြီး မြန်မာရွှေ့ ပြောင်းအလုပ်သမား ၂ ဦး ထိခိုက်ဒဏ်ရာရရှိခဲ့ကြောင်း၊ ယမန်နေ့ နိုဝင်ဘာလ ၃၀ ရက်နေ့ ညပိုင်းတွင်လည်း မြန်မာစစ်တပ်က ပစ်ခတ်သော လက်နက်ကြီးကျည်များက ထိုင်းထဲသို့ ထပ်မံကျရောက်သဖြင့် ထိုင်းစစ်တပ်က သတိပေး မီးကျည်များ မြန်မာဘက်သို့ ဖောက်ခွဲ ပစ်ခတ်ခဲ့ကြောင်း သိရှိရသည်။
“မနေ့ မနက်ပိုင်းက လက်နက်ကြီးကျည် ၅ လုံး ထိုင်းထဲကျတယ်။ ညပိုင်းမှာလည်း လက်နက်ကြီးကျည် ၄ လုံးကျတယ်။ မနက်ပိုင်းမှာ ထိုင်းစစ်တပ်က မီးခိုးဗုံးအမြောက်တွေ ပစ်တယ်။ ညပိုင်း လက်နက်ကြီးကျည်တွေ ကျတဲ့အချိန်မှာ ထိုင်းဘက်က သတိပေး မီးကျည်တွေ မြန်မာဘက်ကို ပစ်ခတ်ပြီး သတိပေးတယ်။ အခုက မင်းလက်ပံနေရာကို ပြန်သိမ်းဖို့ စစ်တပ်က ပြည်သူ့စစ်နဲ့ စစ်မှုထမ်းတပ်သားတွေ အများကြီး သုံးပြီး ထိုးစစ်ဆင်နေတယ်။ နောက်ကလည်း လက်နက်ကြီးပစ်ကူတွေ၊ ဒရုန်းတွေနဲ့ တောက်လျှောက်ပစ်နေတယ်။ အခုထက်ထိတော့ KNU က ထိန်းထားတုန်းပဲ” ဟု ကရင်စစ်ရေး သတင်းရင်းမြစ်က ဆိုသည်။
နှစ်ဖက်တိုက်ပွဲများအကြားတွင် ကျားဖြန့် တရုတ်များနှင့် ကျားဖြန့်ရုံများမှ အလုပ်သမားများမှာ ပိတ်မိနေဆဲဖြစ်ပြီး ထိုင်း-မြန်မာနယ်စပ် သောင်ရင်းမြစ်ကမ်းဘေးတွင် သောင်တင်နေဆဲဖြစ်ကြောင်း၊ ထိုင်းစစ်တပ်ကလည်း သောင်ရင်းမြစ်ကမ်းဘေးတွင် သောင်တင်နေသော ကျားဖြန့် တရုတ်များကို လက်မခံသေးဘဲ ဆက်လက်စောင့်ကြည့်နေကြောင်း သိရှိရသည်။
ထိုင်းဘက်အခြမ်းသို့ လက်နက်ကြီးကျည်များ ဆက်တိုက်ကျရောက်နေသဖြင့် ထိုင်းစစ်တပ်က မြန်မာဘက်မှ ထိုင်းဘက်သို့ ကမ်းကူးခွင့်များ ပိတ်ပင်ထားကြောင်း သိရှိရသည်။
“မနေ့ညက ထိုင်းဘက်ကို လက်နက်ကြီးကျည်တွေ ထပ်ကျလို့ ထိုင်းဘက်က မီးကျည်တွေ မြန်မာဘက်ကို ပစ်ပြီး ကျည်မကျော်ဖို့ အချက်ပြတယ် ။ နောက်ပြီး ထိုင်း-မြန်မာနယ်စပ် ကမ်းကူးတဲ့နေရာတွေ ၇ ရက် ပိတ်ပါတယ်။ ထိုင်းဘက်အခြမ်းမှာ ပြည်သူတွေကိုလည်း ကျည်လွတ်မယ့် နေရာတွေ ရွှေ့ပေးနေတယ်။ အခုကတော့ မင်းလက်ပံဘက်မှာ စစ်ကြောင်းထိုးလာလို့ ဝေါ်လေတံတားပိတ်ထားတယ်။ ပြီးတော့ ထိုင်း-မြန်မာနယ်စပ် မော်လီချိုင်းကမ်းကူးပိတ်တယ်။ ကျောက်ခက်ကမ်းကူးပိတ်တယ်။ မင်းလက်ပံ ပိတ်တယ်။ အားလုံးပိတ်ထားတယ်။ ထိုင်းဘက်နဲ့ DKBA ကပိတ်တာပါ” ဟု ကရင်စစ်ရေး သတင်းရင်းမြစ်က ပြောဆိုသည်။
မြ၀တီမြို့နယ်၊ မင်းလက်ပံကျေးရွာအနီးရှိ ကျားဖြန့်ရုံများကို KNU က နိုဝင်ဘာလ ၂၁ ရက်နေ့ သိမ်းပိုက်ခဲ့ပြီး အဆိုပါနေရာများရှိ ကျားဖြန့် အလုပ်ရုံနှင့် ဝင်းများကို စုံစမ်းစစ်ဆေးရေးများ လုပ်ဆောင်နေချိန် စစ်တပ်က ထိုးစစ်များ အရှိန်အဟုန်မြှင့်နေခြင်းဖြစ်သည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
