စစ်ကိုင်းတိုင်း၊ ရေဦးမြို့ ကြာဖူးအဝိုင်း စစ်တပ်ဂိတ်တွင် တာဝန်ကျနေသော စစ်သားတစ်ဦး သေနတ် ၂ လက်ယူဆောင်လာပြီး အလင်းဝင်ရောက်လာကြောင်း ပြည်သူ့ကာကွယ်ရေးအဖွဲ့-ရေဦးမြို့နယ် ပကဖ တာဝန်ခံက ရန်ကုန်ခေတ်သစ်သတင်းဌာနထံသို့ ပြောဆိုသည်။
ယမန်နေ့ ဒီဇင်ဘာလ ၁၇ ရက်နေ့ နံနက် ၈ နာရီအချိန်ခန့်အချိန် ရေဦးမြို့၊ ကြာဖူးအဝိုင်းရှိ စစ်တပ်ဂိတ်၌ တာဝန်ကျနေသည့် (တထပ-၂) ရွှေဘိုမှ တပ်သား ကျော်မျိုးသူ က MA-1 အမျိုးအစား သေနတ် ၁ လက်နှင့် G-3 အမျိုးအစား သေနတ် ၁ လက်တို့ကို ယူဆောင်ပြီး ရေဦးမြို့နယ် ပြည်သူ့ကာကွယ်ရေးအဖွဲ့ (ပကဖ) ထံသို့ ဆက်သွယ်ကာ အလင်းဝင်ရောက်လာခြင်းဖြစ်သည်။
အဆိုပါ အလင်းဝင်ရောက်လာသည့် တပ်သားအား ရေဦးမြို့နယ် ပြည်သူ့ကာကွယ်ရေးအဖွဲ့က ကောင်း မွန်စွာ လက်ခံကြိုဆိုထားပြီး ဂုဏ်ပြုဆုငွေများ ချီးမြှင့်ပေးအပ်သွားမည်ဖြစ်ကြောင်း သိရှိရသည်။
“အလင်းဝင်ရောက်လာတဲ့သူက တာဝန်ကျနေတဲ့အချိန်မှာ ထွက်ပြေးလာခဲ့တာပါ။ အလင်းဝင်လာ သူက ၂၀၀၉ ခုနှစ်ကတည်းက တပ်ထဲဝင်ရောက်ခဲ့သူပါ။ အလင်းဝင်ရောက်လာတဲ့သူကို ဂုဏ်ပြုဆုငွေ ချီးမြှင့်ဖို့ရှိပါတယ်။ သေနတ် ၂လက်အတွက် သိန်းတစ်ရာဆုချီးမြှင့်မှာပါ။ လက်ရှိမှာ မချီးမြှင့်ရသေးပါဘူး။ အခုလိုမျိုး အမှန်တရားဘက်က ရပ်တည်ရဲတဲ့ နောက်ထပ် တပ်မတော်သားများကို ကြိုဆိုလျက်ပါ”ဟု ပြည်သူ့ကာကွယ်ရေးအဖွဲ့- ရေဦးမြို့နယ် ပကဖ တာဝန်ခံကပြောဆိုသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
