စစ်ကိုင်းတိုင်း၊ အင်းတော်မြို့နယ်၊ ပဲခူးရွာ စာသင်ကျောင်းကို အကြမ်းဖက် စစ်တပ်က တိုက်ပွဲဖြစ်ပွားခြင်းမရှိဘဲ လေယာဉ်ဖြင့် ဗုံးကျဲ တိုက်ခိုက်ခြင်းကြောင့် Grade-12 ကျောင်းသူ ၁ ဦး သေဆုံးပြီး ၂ ဦး ထိခိုက်ဒဏ်ရာရကာ နေအိမ်များပျက်စီးခဲ့ကြောင်း Indaw Revolution-IR မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ပြောဆိုသည်။
ဇန်နဝါရီလ ၂ ရက်နေ့ နံနက်အစောပိုင်း ၁ နာရီ ၁၇ မိနစ်ခန့်တွင် တံတားဦးလေတပ်မှ တက်လာသော အကြမ်း ဖက် စစ်တပ်၏ ဂျက်ဖိုက်တာ ၁ စီးသည် အင်းတော်မြို့နယ်၊ မော်လူးဒေသ၊ ပဲခူးရွာစာသင်ကျောင်းကို တိုက်ပွဲဖြစ်ပွားခြင်းမရှိဘဲ အကြမ်းဖက် စစ်တပ်က ဗုံး ၂ လုံးကျဲချ တိုက်ခိုက်ခဲ့ကြောင်း သိရသည်။
အကြမ်းဖက် စစ်တပ်၏ ဗုံးကျဲ တိုက်ခိုက်မှုအတွင်း ပဲခူးရွာစာသင်ကျောင်းတွင် အဆောင်နေပြီး ကျောင်းတက်နေသော တောင်ဖီလာကျေးရွာမှ အသက် ၁၈နှစ်အရွယ် Grade 12ကျောင်းသူ ၁ ဦး သေဆုံးကာ ကျောင်းသူ ၂ ဦးလည်း ထိခိုက်ဒဏ်ရာရရှိခဲ့ကြောင်း၊ ထို့ပြင် လေကြောင်းတိုက်ခိုက်မှုအတွင်း ပဲခူးရွာစာသင်ကျောင်းများလည်း ထိခိုက်ပျက်စီးကာ ကျောင်းအနီးရှိ နေအိမ်များလည်း ပျက်စီးခဲ့ကြောင်း သိရှိရသည်။
“စစ်ခွေးတွေက တိုက်ပွဲဖြစ်ပွားခြင်းမရှိဘဲ ဗုံးကျဲတိုက်ခိုက်ခဲ့တာပါ။ ပဲခူးရွာမှာ တစ်ခြားဘေးရွာက ကျောင်းသားတွေပေါ့နော် ကျောင်းအိပ် ကျောင်းစား၊ အဆောင်သဘောမျိုးနဲ့ လာနေပြီး ကျောင်းတက်တဲ့ ကျောင်းသား၊ ကျောင်း သူတွေရှိတယ်။ စစ်ခွေးတွေ ဗုံးကျဲ တိုက်ခိုက်တဲ့အချိန်မှာ ကျောင်းသူတစ်ယောက်ဆုံးသွားတယ်။ နောက် ထပ် ကျောင်းသူ ၂ ယောက် ဒဏ်ရာရတယ်။ သေဆုံးသွားတဲ့ Grade-12 ကျောင်းသူက တောင်ဖီလာကျေးရွာကပါ။ ဗုံးသီးကျတာကတော့ ကျောင်းဘေးနားကို ကျတာပါ။ ဗုံးက ပြင်းတယ်။ ဗုံးအရှိန်ကြောင့်မို့လို့ ကျောင်းဆောင်တွေ ကျောင်းရုံးခန်းတွေ ပျက်စီးသွားတာရှိတယ်။ ကျောင်းအပြင် ရွာထဲက နေအိမ်တွေလည်းပျက်စီးသွားတယ်။ နေအိမ် ဘယ်နှစ်လုံးပျက်စီးသွားတယ်ဆိုတာတော့ မသိရသေးဘူး”ဟု Indaw Revolution-IR မှ တာဝန်ရှိသူက ဆိုသည်။
အလားတူ ပဲခူးတိုင်း၊ ကျောက်ကြီးမြို့နယ်နှင့် မူးမြို့နယ်ရှိ ကျေးရွာများကို အကြမ်းဖက် စစ်တပ်က တိုက်ပွဲဖြစ်ခြင်းမရှိဘဲ ဒရုန်း၊ လက်နက်ကြီးများဖြင့် တိုက်ခိုက်မှုခဲ့ရာ ပြည်သူ ၂ ဦး ထိခိုက်ဒဏ်ရာရရှိခဲ့ကြောင်း KNU-ဗဟို က သတင်းထုတ်ပြန်သည်။
ဒီဇင်ဘာလ ၂၉ ရက် နံနက် ၁၀ နာရီခန့် အချိန် မူးမြို့နယ်ရှိ ရေလဲအနောက်ဘက်ကမ်းကျေးရွာ အတွင်းသို့ နတ်သံကွင်းရှိ အကြမ်းဖက် စစ်တပ်က ၁၂၀ မမ လက်နက်ကြီး ၂ လုံ့းဖြင့် ပစ်ခတ်တိုက်ခိုက်ခဲ့ရာ ထိုကျေးရွာအတွင်းရှိ အသက် ၃၈ နှစ်အရွယ် စောထင်လင်းအောင် လက်နက်ကြီး ထိမှန်ပြီး ထိခိုက်ဒဏ်ရာရရှိခဲ့ကြောင်း သိရှိရသည်။
ထို့ပြင် ဒီဇင်ဘာလ ၂၂ ရက်နေ့ ညနေ ၄ နာရိ ၃၀ မိနစ် ခန့်အချိန် ကျောက်ကြီးမြို့နယ်ရှိ ပိုးလိုနိုဖိုးကျေးရွာအတွင်းကို အကြမ်းဖက် စစ်တပ်က ဒရုန်းဖြင့် ဗုံးကျဲချတိုက်ခိုက်ခဲ့ရာ ထိုကျေးရွာအတွင်းရှိ အသက် ၁၆ နှစ်အရွယ် စောသခူးဒို ဗုံးစထိမှန်ကာ ထိခိုက်ဒဏ်ရာရရှိခဲ့ကြောင်း သိရှိရသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
