ရန်ကုန်တွင် ICJ တရားရုံးနှင့်ဂမ်ဘီယာနိုင်ငံကို ကန့်ကွက်ပွဲကို ကိုကိုလှိုင်နှင့်အဖွဲ့ ထောက်ခံပွဲအဖြစ် အမည် ပြောင်းလဲ ခွင့်ပြုလိုက်ပြီး ဝင်းကိုကိုလတ်နှင့်သုစိတ္တတို့ ဦးဆောင်မည်

ရန်ကုန်၊ ဇန်နဝါရီ ၂၆

ရန်ကုန်တွင် ICJ တရားရုံးနှင့်ဂမ်ဘီယာနိုင်ငံကို ကန့်ကွက်ပွဲကို ကိုကိုလှိုင်နှင့်အဖွဲ့ ထောက်ခံပွဲအဖြစ် အမည် ပြောင်းလဲ ပြုလုပ်ခွင့်ပြုလိုက်ပြီး ဝင်းကိုကိုလတ်နှင့်သုစိတ္တတို့ ဦးဆောင်မည်ဖြစ်ကြောင်း စစ်တပ်လော်ဘီချန်နယ်များ၏ ထုတ်ပြန်ချက်နှင့် အမျိုးသားရေးအသိုင်းအ၀ိုင်း၏ ပြောဆိုချက်အရ သိရှိရသည်။

မူလက ရန်ကုန်နှင့် မန္တလေးတို့တွင် ဇန်နဝါရီလ ၂၇ ရက်နေ့ တစ်ပြိုင်နက်တည်း ICJ တရား ရုံးနှင့် ဂမ်ဘီယာနိုင်ငံကန့်ကွက်ပွဲအဖြစ် ကျင်းပပြုလုပ်ရန် စီစဉ်ခဲ့သော်လည်း မန္တလေးပွဲကို စစ်တပ်က ခွင့်မပြုခဲ့ကြောင်း၊ မန္တလေးတွင် ကန့်ကွက်ပွဲပြုလုပ်မည့်သူများကို ပွဲနာမည် ပြောင်းလဲကျင်းပရန် စစ်ကော်မရှင်က ညှိနှိုင်းခဲ့သော်လည်း မန္တလေးမှ မဘသနှင့်အမျိုးသားရေးအဖွဲ့များက ပွဲကို ဖျက်သိမ်းလိုက်ကြောင်း သိရှိရသည်။

ရန်ကုန်တွင် ICJ တရားရုံးနှင့် ဂမ်ဘီယာကန့်ကွက်ပွဲကို စစ်တပ်နှင့်ညှိနှိုင်းချက်အရ ကိုကိုလှိုင်နှင့်အဖွဲ့ကို ထောက်ခံပွဲအဖြစ် အမည်ပြောင်းလဲရန် ညှိနှိုင်းသဘောတူခဲ့ကြောင်း၊ မူလက ရွှေတိဂုံဘုရားအရှေ့ဘက်မုခ်၊ ကြေးသွန်းဘုရားရှေ့မှ မဟာဗန္ဓုလပန်းခြံရှေ့(ကားပါကင်)သို့ လမ်းလျှောက်မည့်အစီအစဉ်ကိုလည်း ဖျက်သိမ်းခဲ့ကြောင်း သိရှိရသည်။

“မန္တလေးပွဲကတော့ မလုပ်တော့ဘဲ ဖျက်သိမ်းလိုက်တယ်။ ရန်ကုန်ပွဲကတော့ ကျောက်တံတားရဲဏခန်းမှာ သွားညှိကြတာတော့ ICJ တရားရုံးနဲ့ တရားသူကြီးတွေကို တိုက်ခိုက်တဲ့ စာသားတွေ မပါဖို့၊ ဂမ်ဘီယာကို တိုက်ခိုက်တဲ့ စာသားတွေမပါဘဲ ဦးကိုကိုလှိုင်နဲ့ Agent of Myanmar အဖွဲ့ကို ထောက်ခံတဲ့ပွဲအဖြစ်ပဲ လုပ်ခွင့်ရတယ်” ဟု ရန်ကုန်အမျိုးသားရေး အသိုင်းအ၀ိုင်းက ပြောဆိုသည်။

ရန်ကုန်တွင် ကိုကိုလှိုင်နှင့်အဖွဲ့ကို ထောက်ခံသည့်ပွဲကို ဇန်နဝါရီလ ၂၇ ရက်နေ့ မွန်းလွဲ ၂ နာရီမှ ညနေ ၅ နာရီအထိ ရန်ကုန်မြို့တော်ခန်းမရှေ့ မဟာဗန္ဓုလပန်းခြံ(ကားပါကင်)တွင် ပြုလုပ်မည်ဖြစ်ကြောင်း သိရှိရသည်။

ယင်းပွဲသို့ ဝင်းကိုကိုလတ်နှင့် သုစိတ္တတို့က ဦးဆောင်မည်ဖြစ်ပြီး လာရောက်မည့်သူများအနေဖြင့် အဖြူရောင်အင်္ကျီများဖြင့် လာရောက်ရန် ကိုကိုလှိုင်နှင့်အဖွဲ့ကို ထောက်ခံသော စာသားမှ အပ အခြား စကားစု စကားလုံးပါ ဗီးနိုင်းပိုစတာများ လုံးဝ (လုံးဝ) သယ်ဆောင်ယူလာခြင်း မပြုကြရန် နှိုးဆော်ထားသည်။

ဇန်နဝါရီလ ၂၂ ရက်နေ့ကလည်း အကြမ်းဖက်စစ်တပ်က အပြည်ပြည်ဆိုင်ရာတရားရုံး-ICJ နှင့် တရားသူကြီးများကို ဝေဖန်ပုတ်ခြင်းမပြုရန် ဝါဒဖြန့် သတင်းစာများမှတစ်ဆင့် အမိန့်တစ်ရပ်ထုတ်ပြန်ခဲ့သည်။

ICJ ကြားနာပွဲတွင် မြန်မာနိုင်ငံကိုယ်စား သွားရောက်ဖြေရှင်းနေသည့် ကိုကိုလှိုင်ဦးဆောင်သော Agent of Myanmar အဖွဲ့ကို မြေပြင်ထောက်ခံပွဲများပြုလုပ်ရာတွင် တရားရင်ဆိုင်ဆဲကာလဖြစ်၍ ICJ တရားရုံးနှင့် တရားသူကြီးများအား ဝေဖန်ပုပ်ခတ်ခြင်း၊ ဖိအားပေးသည့်သဘော ရေးသားပြောဆိုခြင်းများ လုံးဝမပြုလုပ်ကြပါရန်၊လူမျိုးရေးခွဲခြားသည့် အသုံးအနှုံးများ ရေးသားပြောဆိုခြင်း၊ လက်ကိုင်ဆိုင်းဘုတ် ပြုလုပ်ခြင်းများမပြုလုပ်ကြရန် ၊တိုင်းရင်းသား အမျိုးအမည်တွင် မပါဝင်သည့်၊ တိုင်းရင်းသားအဖြစ် မသတ်မှတ်ထားသည့် လူမျိုးအမည်အားသုံးစွဲပြီး ထိုအမည်အား အမုန်းစကား (Hate Speech) များ မပြုလုပ်ကြရန် စစ်တပ်က ညွှန်ကြားခဲ့ခြင်းဖြစ်သည်။

ထောက်ခံပွဲများတွင် နိုင်ငံတကာဥပဒေများနှင့်အညီ သက်သေအထောက်အထား ခိုင်လုံစွာဖြင့် တရားရုံးတွင် ရင်ဆိုင်ဖြေရှင်းနေရသော Agent of Myanmar အဖွဲ့ကို ထောက်ခံကြောင်းသာ ရေးသားပြောဆိုကြပါရန် စစ်တပ်က ညွှန်ကြားထားသည်။​

အပြည်ပြည်ဆိုင်ရာ တရားရုံး -ICJ တွင် မြန်မာနိုင်ငံက လူမျိုးပြုန်းစေမှု ကာကွယ်ရေးဆိုင်ရာ စာချုပ်ပါ တာဝန်တ္တရာများအရ ရိုဟင်ဂျာများကို ကျူးလွန်ခဲ့သည့် လူမျိုးတုန်း သတ်ဖြတ်သည့် လုပ်ရပ်များကို တားဆီး ရန်နှင့် အပြစ်ပေးရန် ပျက်ကွက်ခဲ့သည်ဟုဆိုကာ ဂမ်ဘီယာနိုင်ငံက တရားစွဲဆိုထားရာ ယင်းအမှုနှင့်ပတ် သက်၍ ယခုဇန်နဝါရီလအတွင်း နှစ်ဖက် ကြားနာ စစ်ဆေးမှုများ ICJ က ပြုလုပ်လျက်ရှိကြောင်း သိရှိရသည်။

ဓာတ်ပုံ – စစ်တပ်ထောက်ခံပွဲတစ်ခုတွင် တွေ့ရသည့် ဝင်းကိုကိုလတ်။ (ပုံအဟောင်းဖြစ်ပါသည်။)

#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar