ရန်ကုန်၊ ဖေဖော်ဝါရီ ၃
မကွေးတိုင်း၊ ဂန့်ဂေါမြို့နယ်နယ်မြောက်ပိုင်း၊ စန်းမြို့ကျေးရွာအနီးသို့ စစ်တပ်က တိုက်ပွဲဖြစ်ပွားခြင်းမရှိဘဲ လေကြောင်းဖြင့် ဗုံးကျဲတိုက်ခိုက်ခဲ့ကြောင်း ယောအလင်းတန်းမှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာန ထံသို့ ပြောကြားသည်။
ယနေ့ ဖေဖော်ဝါရီလ ၃ ရက် နံနက်ပိုင်း ဂန့်ဂေါမြို့နယ်မြောက်ပိုင်း၊ မြစ်သာမြစ် အရှေ့ဘက်ခြမ်း ၊ စန်းမြို့ကျေးရွာအနီးတနေရာ ကို အကြမ်းဖက်စစ်ကော်မရှင်၏ တံတားဦးလေတပ်မှ တက်လာသော ဂျက်ဖိုက်တာတစ်စီးဖြင့် ၂ ကြိမ်ဗုံးကျဲတိုက်ခိုက်ခဲ့ကြောင်း၊ ယင်းဗုံးကျဲတိုက်ခိုက်မှုကြောင့် ပြည်သူ ထိခိုက်မှုမရှိကြောင်း သိရသည်။
“တိုက်ပွဲဖြစ်တာလည်းမရှိပါဘူး။ အရင်ကတော့ စစ်ဘေးရှောင်တွေနေတယ်။ အခုက ဘယ်သူမှ မနေ တော့ဘူး။ အဲဒီနေရာကို ဂျက်ဖိုက်တာနဲ့ ၂ ကြိမ်ပျံဝဲပြီး ဗုံးကျဲသွားတာ။ ဘယ်သူမှ ထိခိုက်မှုမရှိဘူးလို့ သိရပါတယ်။” ဟု ယောအလင်းတန်းမှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ ပြောကြားသည်။
အလားတူ စစ်ကိုင်းတိုင်း၊ တန့်ဆည်မြို့နယ် တန့်ဆည်မြို့နယ်အနောက်ခြမ်း ကော်တက်ရွာကို အကြမ်းဖက် စစ် တပ်က တိုက်ပွဲဖြစ်ပွားခြင်းမရှိဘဲ လေယာဉ်ဖြင့် ဗုံးကျဲတိုက်ခိုက်ခဲ့ရာ ပြည်သူ အမျိုးသမီး ၂ ဦးထိခိုက်ဒဏ်ရာရရှိကာ နေအိမ် ၃ လုံး ထိခိုက်ပျက်စီးခဲ့ကြောင်း Infinity Group မှ တာဝန်ရှိသူက ရန်ကုန်ခေတ်သစ်သတင်းဌာနထံသို့ပြောဆိုသည်။
ဖေဖော်ဝါရီလ ၂ ရက်နေ့ မွန်းလွဲ ၃ နာရီ ၃၅ မိနစ်ခန့်အချိန် တိုက်လေယာဉ် ၁ စီးဖြင့် တန့်ဆည်မြို့နယ် အနောက်ဘက်ခြမ်းရှိ ကော်တက်ကျေးရွာကို အကြမ်းဖက် စစ်တပ်က တိုက်ပွဲဖြစ်ပွားခြင်းမရှိဘဲ ပေါင် ၂၀၀ ဗုံး ၂ လုံး ကျဲချတိုက်ခိုက်ခဲ့ကြောင်း၊ အဆိုပါဗုံးကျဲတိုက်ခိုက်မှုအတွင်း ကော်တက်ကျေးရွာနေ ပြည်သူ အမျိုးသမီး ၂ ဦးထိခိုက်ဒဏ်ရာရရှိခဲ့ကာ နေအိမ် ၃ လုံးထိခိုက်ပျက်စီးသွားကြောင်း သိရှိရသည်။
“စစ်ခွေးတွေရဲ့ တံတားဦးတက်ဖိုက်တာနဲ့ တန့်ဆည်မြို့နယ် အနောက်ဘက်ခြမ်းရှိ ကော်တက်ကျေးရွာကို တိုက်ပွဲဖြစ်တာမရှိဘဲ ပေါင် ၂၀၀ ဗုံးသီး ၂ လုံး ဗုံကျဲချတိုက်ခိုက်ခဲ့တာပါ။ အမျိုးသမီး ၂ ဦး ဒဏ်ရာရသွားပြီး နေအိမ် ၃ လုံးပျက်စီးတယ် အသက်အရွယ်တော့ မသိရဘူး ကော်တက်ရွာထဲကပါ။ စစ်ခွေးတွေက တိုက်ပွဲမဖြစ်ဘဲ အဲဒီကျေးရွာက ပြည်သူတွေ နေထိုင်ရာနေရာကို ပစ်မှတ်ထား ဗုံးကျဲတိုက်ခိုက်တာပါ” ဟု Infinity Group မှ တာဝန်ရှိသူက ပြောဆိုသည်။
အကြမ်းဖက် စစ်တပ်က ယခုနောက်ပိုင်း စစ်ရေးပစ်မှတ်မဟုတ်သည့် ပြည်သူများ နေထိုင်ရာ ကျေးရွာများအတွင်းရှိ နေအိမ်များကိုပါ ဦးတည်ပြီး လေကြောင်းတိုက်ခိုက်မှုများ ဆက်တိုက်ပြုလုပ်လာကြောင်း၊ အလှူပွဲရာသီဖြစ်တဲ့အလျောက် ပွဲလမ်းသဘင်တွေ ကျင်းပကြပါက ဘောက် ၊စပီကာများကို အချိန်နဲ့အမျှ သတိပြုဖွင့်ကြပါရန် Infinity Group က အသိပေးနှိုးဆော်ထားသည်။
ဓာတ်ပုံ- စစ်တပ်၏ အကြမ်းဖက် ပစ်ခတ်တိုက်ခိုက်မှုများကြောင့် ကျေးရွာမှ နေအိမ်တချို့ မီးလောင်ကျွမ်းနေစဉ်။ (ပုံအဟောင်းဖြစ်ပါသည်။)
