ရန်ကုန်၊ ဧပြီ ၁၅
ကရင်ပြည်နယ်၊ လှိုင်းဘွဲ့မြို့နယ်ရှိ အကြမ်းဖက် စစ်တပ်၏ ကြယ်ပြောင်ကုန်းစခန်းကို တိုက်ခိုက်သိမ်းပိုက်ရာ လက်နက်မျိုးစုံ ၁၈ လက် သိမ်းဆည်းရရှိခဲ့ပြီး စစ်တပ်က ကျေးရွာများကို လေယာဉ်ဖြင့် ဗုံးကျဲတိုက်ခိုက်ခြင်းကြောင့် စာသင်ကျောင်းနှင့် နေအိမ်များ ပျက်စီးခဲ့ကြောင်း KNU ဗဟိုက ထုတ်ပြန်ထားသည်။
ဧပြီလ ၁၃ ရက်နေ့ နံနက် ၁၁ နာရီခန့်တွင် လှိုင်းဘွဲမြို့နယ်၊ မဲသဝေါဒေသရှိ အကြမ်းဖက် စစ်တပ်၏ ပနာအော်ဘူးတူ (ကြယ်ပြောင်ကုန်း) တပ်စခန်းကို တိုက်ခိုက်သိမ်းပိုက်နိုင်ခဲ့ကြောင်း၊ ထိုစခန်းသိမ်းတိုက်ပွဲအတွင်း အကြမ်းဖက် စစ်တပ်ထံမှ လက်နက်မျိုးစုံ ၁၈ လက် သိမ်းဆည်းရရှိခဲ့ကြောင်း သိရသည်။
ထိုစခန်းသိမ်း တိုက်ပွဲကို ကရင်အမျိုးသားလွတ်မြောက်ရေးတပ်မတော် (KNLA)၊ ကရင်အမျိုးသားကာကွယ်ရေးတပ်ဖွဲ့ (KNDO) နှင့် မြန်မာနိုင်ငံလုံးဆိုင်ရာ ကျောင်းသားများဒီမိုကရက်တစ်တပ်ဦး(ABSDF) တို့က လုပ်ဆောင်ခဲ့ခြင်းဖြစ်ကြောင်း သိရှိရသည်။
အဆိုပါ စခန်းသိမ်းတိုက်ပွဲဖြစ်ပွားပြီးနောက် အကြမ်းဖက် စစ်တပ်က တိုက်ပွဲဖြစ်ပွားသည့်နေရာနှင့် မသက်ဆိုင်သော ပြည်သူများနေထိုင်သည့် နေရာများကို ပစ်မှတ်ထား၍ ယင်းနေ့ မွန်းလွဲ ၁ နာရီ ၅၀ မိနစ်ခန့်တွင် စစ်တပ်က လေယာဉ်ဖြင့် ဗုံးကျဲ တိုက်ခိုက်ခဲ့ကြောင်း သိရသည်။
အကြမ်းဖက် စစ်တပ်၏ ဗုံးကျဲ တိုက်ခိုက်မှုအတွင်း လှိုင်းဘွဲမြို့နယ်၊ ပွေးဖိုးကလားကျေးရွာကို ဗုံးများ ကျရောက် ပေါက်ကွဲခဲ့သောကြောင့် လူနေအိမ် ၆ လုံးနှင့် စာသင်ကျောင်း ၁ ကျောင်း ထိမှန် ပျက်စီးခဲ့ပြီး ပြည်သူ ၁ ဦးလည်း ထိခိုက် ဒဏ်ရာရရှိခဲ့ကြောင်း သိရှိရသည်။
