ရန်ကုန်၊ ဇူလိုင် ၂၄
ပဲခူးတိုင်း၊ တောင်ငူမြို့နယ်၊ မြပင်ကူးကျေးရွာနှင့် သရက်ပင်ကုန်းကျေးရွာသို့ စစ်ကြောင်းထိုးလာသော အကြမ်းဖက်စစ်ကောင်စီ စစ်ကြောင်းကို တောင်ငူခရိုင် PDF တပ်ရင်း ၃၅၀၁ တပ်ခွဲ ၁ က ယနေ့ဇူလိုင်လ ၂၄ ရက် ညနေ ၄ နာရီ ၄၀ မိနစ်ခန့်တွင် တိုက်ခိုက်ရာ စစ်သား ၅ ဦးခန့်သေဆုံးနိုင်ပြီး ၄ ဦးခန့် ဒဏ်ရာရနိုင်ကြောင်း တောင်ငူခရိုင် PDF က သတင်းထုတ်ပြန်သည်။
အင်အား ၄၀ ခန့်ပါသော အကြမ်းဖက်စစ်တပ်ကို တောင်ငူခရိုင် PDF ကင်းပုန်းက လက်ဦးမှုရယူကာ ရှော့တိုက်ပြောင်းများ၊ လက်နက်ငယ်များဖြင့် ပစ်ခတ်ခဲ့ပြီး အထိအခိုက်မရှိ ဆုတ်ခွာနိုင်ခဲ့ကြောင်း သိရှိရသည်။
အလားတူ စစ်ကိုင်းတိုင်း အင်းတော်မြို့နယ် မော်တိတ်ဒေသ အင်းတော်-ဗန်းမောက် လမ်းပိုင်းတွင် အကြမ်းဖက် စစ်တပ်မှ ကင်းလှည့်လာသော ကား ၁ စီးနှင့် စစ်ကြောင်းကို KIA၊ PDF ပူးပေါင်း တပ်ဖွဲ့က ဇူလိုင်လ ၂၄ ရက်နေ့တွင် ပစ်ခတ် တိုက်ခိုက်ခဲ့ပြီး စစ်သား ၆ ဦးထက်မနည်း သေဆုံးခဲ့ကြောင်း နယ်မြေခံ သတင်းရင်းမြစ်ဖြစ်သော Indaw Revolution-IR အဖွဲ့ထံမှ သိရသည်။
အကြမ်းဖက် စစ်တပ် ကင်းလှည့်ကား ၁ စီးနှင့် စစ်ကြောင်းကို ယနေ့ နံနက် ၉ နာရီ ၃၀ မိနစ်ခန့်တွင် KIA ၊PDF ပူးပေါင်း တပ်ဖွဲ့က ကြားဖြတ် တိုက်ခိုက် ခဲ့ခြင်းဖြစ်ပြီး စစ်သား ၆ ဦးထက်မနည်း သေဆုံးခဲ့ကြောင်း သိရသည်။
ဓါတ်ပုံ – အကြမ်းဖက်စစ်ကောင်စီတပ်သားများ စစ်ကြောင်းထွက်နေစဉ် (ပုံအဟောင်းဖြစ်ပါသည်)
