မြန်မာနိုင်ငံတွင် စစ်အာဏာသိမ်းမှုကို အစဉ်တစိုက် ဆန့်ကျင်ကန့်ကွက်ခဲ့သော စင်ကာပူနိုင်ငံနှင့်တီမောနိုင်ငံတို့က အာဆီယံအလှည့်ကျဥက္ကဋ္ဌများအဖြစ် တာဝန်ယူတော့မည်ဖြစ်ကြောင်း အာဆီယံ၏ ထုတ်ပြန်ချက်များအရ သိရှိရသည်။

စင်ကာပူနိုင်ငံသည် မြန်မာနိုင်ငံရှိ စစ်အာဏာသိမ်းမှုကို အစဉ်တစိုက် ကန့်ကွက်ခဲ့ပြီး အာဆီယံဘုံသဘောတူညီချက် ၅ ချက်ဖြင့် မြန်မာ့အရေးကို ဖြေရှင်းရေး မူဝါဒကို ကိုင်စွဲထားရာ လာမည့် ၂၀၂၇ ခုနှစ်တွင် အာဆီယံအလှည့်ကျဥက္ကဋ္ဌ အဖြစ် စင်ကာပူနိုင်ငံက တာဝန်ယူတော့မည်ဖြစ်ကြောင်း သိရှိရသည်။

ယခုနှစ်မေလ ၆ ရက်နေ့မှ မေလ ၉ ရက်နေ့အထိ ဖိလစ်ပိုင်နိုင်ငံ၊ စီဘူးမြို့တွင် ပြုလုပ်ခဲ့သော အာဆီယံထိပ်သီး အစည်းအဝေးအတွက် အကြိုညှိနှိုင်းအစည်းအဝေးတွင် မြန်မာစစ်ကောင်စီ၏ နိုင်ငံခြားရေးဝန်ကြီးကို အာဆီယံထိပ်သီးအစည်းအဝေးသို့ လူကိုယ်တိုင် တက်ရောက်ခွင့်ပြုရန် ထိုင်းနိုင်ငံ၏ အဆိုပြုချက်ကို စင်ကာပူနိုင်ငံက ပြင်းပြင်းထန်ထန် ကန့်ကွက်ပယ်ချခဲ့သည်။

စင်ကာပူနိုင်ငံ၏ ကန့်ကွက်မှုကြောင့် ယခုနှစ် အာဆီယံထိပ်သီးအစည်းအဝေးများသို့ မြန်မာစစ်ခေါင်းဆောင်များ တက်ခွင့်မရဘဲ ဆက်လက်ပိတ်ပင်ခြင်းခံထားရဆဲဖြစ်သည်။

အခြားတစ်ဖက်တွင်လည်း မင်းအောင်လှိုင်ကို စစ်ရာဇဝတ်မှုများဖြင့် တရားစွဲထားမှုကြောင့် မြန်မာ အကြမ်း ဖက်စစ်တပ်နှင့် သံတမန် ဆက်ဆံရေး အဆင်မပြေသော တီမောနိုင်ငံက ၂၀၂၉ ခုနှစ်တွင် အာဆီယံ အလှည့်ကျဥက္ကဋ္ဌ အဖြစ် တာဝန်ယူမည်ဖြစ်ကြောင်း အာဆီယံက တရားဝင် သတင်းထုတ်ပြန်ထားသည်။

ယခု မေလအတွင်း ဖိလစ်ပိုင်နိုင်ငံတွင် ပြုလုပ်သော အာဆီယံထိပ်သီးအစည်းအဝေးတွင် တီမောလက်စတေးနိုင်ငံအနေဖြင့် ၂၀၂၉ ခုနှစ်တွင် အာဆီယံအလှည့်ကျဥက္ကဋ္ဌတာဝန်ကို ယူရန် ဆန္ဒရှိနေသည့်အပေါ် အာဆီယံခေါင်းဆောင်များက ကြိုဆိုကြောင်း ထုတ်ပြန်ခဲ့သည်။

အာဆီယံအဖွဲ့ဝင်နိုင်ငံတစ်ခုဖြစ်သော တီမော်လက်စတေး ဒီမိုကရက်တစ် သမ္မတနိုင်ငံတွင် အကြမ်းဖက် စစ်အာဏာရှင် မင်းအောင်လှိုင်နှင့်စစ်တပ်ကို ချင်းလူ့အခွင့်အရေးအဖွဲ့ (CHRO) က စစ်ရာဇဝတ်မှုများနှင့် လူသားမျိုးနွယ်အပေါ် ကျူးလွန်သည့် ရာဇဝတ်မှုများဖြင့် တရားစွဲဆိုထားပြီး အမှုမှာ တရားရုံးသို့ တင်သွင်းရောက်ရှိသွားပြီဖြစ်သည်။

ထို့ပြင် အာဆီယံအဖွဲ့ဝင်ဖြစ်သော မလေးရှားနိုင်ငံမှ နိုင်ငံခြားရေးဝန်ကြီး မိုဟာမက်ဟာဆန်က မြန်မာအကြမ်း ဖက်စစ်တပ်အနေဖြင့် အာဆီယံအစည်းအဝေးများတွင် ကိုယ်စားပြုနေရာ ပြန်လည်ရရှိရန် လုံလောက်သော ကြိုးပမ်းဆောင်ရွက်မှုမျိုး မရှိသေးကြောင်း မေလ ၇ ရက်နေ့တွင် သတင်းထောက်များကို ပြောကြားသည်။

မြန်မာနိုင်ငံတွင် စစ်တပ်၏ ဖိနှိပ်မှုများနှင့် မိမိနိုင်ငံသားများအပေါ် ရက်စက်ကြမ်းကြုတ်မှုများ ဆက်လက်ဖြစ်ပွားနေဆဲ ဖြစ်သောကြောင့် မလေးရှားအနေဖြင့် လက်ခံနိုင်ခြင်းမရှိသေးကြောင်း ၎င်းက ဆိုသည်။

ထို့အပြင် မြန်မာနိုင်ငံတွင် ကျင်းပမည့် ရွေးကောက်ပွဲအပြီး ပေါ်ပေါက်လာသည့် အုပ်ချုပ်ရေးအဖွဲ့အသစ်အနေဖြင့် အာဆီယံက ချမှတ်ထားသော ငြိမ်းချမ်းရေးအစီအစဉ်များကို အမှန်တကယ် လိုက်နာဆောင်ရွက်ရန် လိုလားကြောင်း မလေးရှားနိင်ငံခြားရေး ဝန်ကြီးက ထုတ်ဖော်ပြောဆိုခဲ့သည်။

မြန်မာစစ်တပ်ကို ကူညီနေသော ထိုင်းနိုင်ငံကမူ ၂၀၂၈ ခုနှစ်တွင် အာဆီယံအလှည့် ကျ ဥက္ကဋ္ဌ တာဝန်ယူမည်ဖြစ်ပြီး အာဆီယံတွင် နိုင်ငံများ၏ အက္ခရာအစဉ်အလိုက် အာဆီယံဥက္ကဋ္ဌ ရာထူးကို အလှည့်ကျ တာဝန်ယူနေကြခြင်းဖြစ်သည်။

မြန်မာနိုင်ငံတွင် ၂၀၂၁ ခုနှစ် ဖေဖော်ဝါရီလ ၁ ရက်နေ့ စစ်အာဏာသိမ်းမှု ဖြစ် ပွားကတည်းက အာဆီယံက မြန်မာစစ်ဗိုလ်ချုပ်များကို အာဆီယံထိပ်သီးအစည်းအဝေးများသို့ တက်ရောက်ခွင့် ပိတ်ပင်ထားခြင်းဖြစ်သည်။

The post မြန်မာ့စစ်အာဏာသိမ်းမှုကို ဆန့်ကျင်ကန့်ကွက်နေသော စင်ကာပူနိုင်ငံနှင့်တီမောနိုင်ငံတို့က အာဆီယံအလှည့်ကျ ဥက္ကဋ္ဌများအဖြစ် တာဝန်ယူတော့မည်၊ မလေးရှားနိုင်ငံခြားရေးဝန်ကြီးက အာဆီယံတွင် မြန်မာနိုင်ငံ ပြန်လည် နေရာရရန် လုံလောက်သော လုပ်ဆောင်ချက်မရှိဟု ထုတ်ပြော appeared first on Khit Thit Media.

နိုင်ငံတော်သမ္မတကြီး ဦးဝင်းမြင့်ကို လွတ်ငြိမ်းချမ်းသာခွင့်ပေးခြင်းနှင့် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို နေအိမ်အချုပ်သို့ ပြောင်းရွှေ့ခြင်းတို့မှာ စစ်ကောင်စီ၏ ဟန်ပြဖြေလျှော့ထားသည့် နိုင်ငံ ရေးထောင်ချောက်တစ်ခုသာဖြစ်ကြောင်း ပအိုဝ်းအမျိုးသားဖက်ဒရယ်ကောင်စီ (PNFC) က သတိပေးလိုက်သည်။

အကြမ်းဖက်စစ်တပ်က ဧပြီလ ၁၇ ရက်နေ့တွင် သမ္မတကြီးဦးဝင်းမြင့်ကို နေအိမ်သို့ ပြန်ပို့ခြင်းနှင့် ဧပြီလ ၃၀ ရက်နေ့တွင် ဒေါ်အောင်ဆန်းစုကြည်ကို နေအိမ်အချုပ်သို့ ပြောင်းရွှေ့ခြင်းတို့မှာ စစ်တပ်ထံတွင် အမှန်တကယ် စိတ်စေတနာရှိ၍ မဟုတ်ဘဲ ဟန်ပြ လုပ်ဆောင်ခြင်းသာဖြစ်ကြောင်း PNFC ပြောရေးဆိုခွင့်ရှိသူ ခွန်ဝေထူးက ရန်ကုန်ခေတ်သစ်သတင်းဌာနသို့ ပြောဆိုသည်။

“စစ်ကောင်စီက နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို နေအိမ်အကျယ်ချုပ် အပြောင်းပြတာဖြစ်တယ်၊ သမ္မတကြီးဦးဝင်းမြင့်ကိုလည်း အလွှတ်ပြတာဖြစ်တယ်၊ အမှန်တကယ်လွတ်မြောက်တာ မဟုတ်ဘူး။ စစ်ကောင်စီရဲ့ စောင့်ကြည့်မှု၊ စစ်ကောင်စီရဲ့ အစီအမံတွေ အောက်မှာပဲ ရှိနေရတာဖြစ်တယ်” ဟု ခွန်ဝေထူးက ဆိုသည်။

စစ်ကောင်စီအနေဖြင့် ယခုကဲ့သို့ လုပ်ဆောင်ရခြင်းမှာ ၎င်းတို့၏ အတုအယောင်ရွေးကောက်ပွဲမှတစ်ဆင့် ပေါ်ပေါက်လာသည့် အစိုးရကို နိုင်ငံတကာနှင့် အာဆီယံ၏ အသိအမှတ်ပြုမှုရရှိရန်နှင့် နိုင်ငံရေးအရ တရားဝင်မှုရရှိရန် ကြိုးပမ်းခြင်းဖြစ်ကြောင်း PNFC က ထောက်ပြထားသည်။

ခွန်ဝေထူးက “ဒါဟာ နိုင်ငံရေးထောင်ချောက်ဖြစ်တယ်။ စစ်ကောင်စီ အာဏာတည်မြဲရေးအတွက် ပြုလုပ်နေတဲ့ အတုအယောင်ငြိမ်းချမ်းရေးကို အသိအမှတ်ပြုမှုရလာအောင် နိုင်ငံတော်အတိုင်ပင်ခံပုဂ္ဂိုလ်နဲ့ နိုင်ငံတော်သမ္မတကြီး ဦးဝင်းမြင့်ကို ထောင်ချောက်ဆင်ပြီးတော့ သူတို့ အတုအယောင်ငြိမ်းချမ်းရေးကနေတစ်ဆင့် စစ်အာဏာကို တည်ဆောက်တာ ဖြစ်တယ်လို့ သုံးသပ်ပါတယ်” ဟု ပြောကြားခဲ့သည်။

ထို့အပြင် ယခုလုပ်ရပ်သည် ပြည်သူများထံသို့ “သမ္မတကြီး လွတ်မြောက်သွားပြီ” ဟူသော လွဲမှားသည့် သတင်းစကား (Message) များ ရောက်ရှိစေရန် ရည်ရွယ်သည့် ဝါဒဖြန့်မှုတစ်ခုသာဖြစ်ကြောင်း၊ လက်တွေ့တွင် လုံးဝလွတ်မြောက်သွားခြင်း မဟုတ်ကြောင်း ၎င်းက ရှင်းလင်းပြောဆိုသည်။

ထို့ကြောင့် ပြည်သူများအနေဖြင့် စစ်ကောင်စီ၏ လှည့်ဖြားမှုများကို သတိပြုရန်နှင့် နိုင်ငံတော်အတိုင်ပင်ခံပုဂ္ဂိုလ် လွတ်မြောက်ရေးနှင့် တစ်နိုင်ငံလုံး လွတ်မြောက်ရေးအတွက် ဆက်လက်တိုက်ပွဲဝင်သွားကြရန် PNFC က အလေးအနက် တိုက်တွန်းသည်။

The post သမ္မတဦးဝင်းမြင့်နှင့် နိုင်ငံတော်အတိုင်ပင်ခံ ဒေါ်အောင်ဆန်းစုကြည်တို့ အပေါ် စစ်တပ်၏ဟန်ပြ ဖြေလျှော့မှုများမှာ နိုင်ငံရေးထောင်ချောက်သာဖြစ်၍ စစ်အာဏာရှင်ကို ဆက်လက်တော်လှန်ကြရန် PNFC သတိပေး appeared first on Khit Thit Media.

By နေဘုန်းလတ်

တစ်ဖက်နှင့် တစ်ဖက် အပြန်အလှန်တိုက်ကြသည့် စစ်ပွဲတွေမှာ စစ်လက်နက်ပစ္စည်းတွေ၊ ကျည်ဆန်၊ ဗုံးဆန်တွေကို သုံးပြီး တစ် ဖက်ရန်သူရဲ့ ရုပ်ပိုင်းဆိုင်ရာ ပစ်မှတ်တွေကို တိုက်ခိုက်ချေမှုန်းကြသလိုပဲ စစ်လက်နက်ပစ္စည်းမဟုတ်တဲ့ အခြားသော နည်းလမ်းပေါင်းစုံ (ဥပမာ – စကားလုံးတွေ၊ ရုပ်ပုံတွေ၊ ကာတွန်းတွေ၊ သီချင်းတွေ၊ ရုပ်သံ တွေ၊ AI တွေ …) ကို သုံးပြီး တစ်ဖက်ရန်သူရဲ့ တိုက်ခိုက်လိုစိတ်ကို ဖြစ်စေတဲ့ ယုံကြည်မှု၊ ခံယူချက်၊ စိတ်ခွန်အား စတဲ့ စိတ်ပိုင်းဆိုင်ရာ ပစ်မှတ်တွေကိုလည်း တိုက်ခိုက်ချေမှုန်းလေ့ရှိကြပါတယ်။

ဒါ့ကြောင့်လည်း ရုပ်ပိုင်းဆိုင်ရာစစ်ဆင်ရေး (Physical Warfare) အပြင် စိတ်ဓာတ်စစ်ဆင်ရေး (Psychological Warfare)၊ သတင်းအချက်အလက်စစ်ဆင်ရေး (Information Warfare)၊ နည်းပညာစစ်ဆင်ရေး (Cyber Warfare) စတဲ့ စကားလုံးတွေရဲ့ အရေးပါမှုဟာ မျက်မှောက်ခေတ် တိုက်ပွဲတွေမှာ မေ့ထားလို့ မရတဲ့ အရာတွေ ဖြစ်လာပါတော့တယ်။

ရှေ့မှာ ရေးခဲ့တဲ့ စာတစ်ပုဒ်မှာ အကြမ်းဖက်စစ်တပ်ဘက်က စစ်လက်နက်ပစ္စည်းတွေ များစွာသုံးပြီး တော်လှန် ရေးကို အပြင်းအထန် တိုက်ခိုက်နေသလို တစ်ဖက်မှာလည်း လူအင်အား၊ ငွေအင်အား အများအပြားသုံးပြီး စိတ်ဓာတ်စစ်ဆင်ရေးနဲ့ သတင်းအချက်အလက်စစ်ဆင်ရေးတွေကို ယန္တရားတွေ သေချာတည်ဆောက်ဖွဲ့စည်းပြီး လုပ်နေတယ်ဆိုတာ ရေးခဲ့ပြီးပါပြီ။

ဒီဆောင်းပါးမှာတော့ စိတ်ဓာတ်စစ်ဆင်ရေး (Psychological Warfare) နဲ့ သတင်းအချက်အလက်စစ်ဆင်ရေး (Information Warfare) ဆိုတာတွေက ဘာလဲ၊ ဘယ်လို အခြေခံစဉ်းစားချက်တွေအပေါ်မှာ စဉ်းစားပြီး အလုပ်လုပ်ကြသလဲ ဆိုတာတွေကို လေ့လာမိသလောက် ဝေမျှချင်ပါတယ်။

“စိတ်ကိုပစ်တဲ့ စစ်”

——————–

စိတ်ဓာတ်စစ်ဆင်ရေးဆိုတာဟာ ရန်သူရဲ့ စိတ်ကူး၊ ထင်မြင်ယူဆချက်၊ စိတ်ခံစားမှု၊ စိတ်သဘောထားနဲ့ အပြု အမူတွေကို လွှမ်းမိုးချယ်လှယ်နိုင်ဖို့ ဝါဒဖြန့်ချိရေးနဲ့ အခြားသော စိတ်ဓာတ်စစ်ဆင်ရေး လုပ်ငန်းတွေကို စနစ်တကျ အစီအစဉ်ချပြီး လုပ်ဆောင်ခြင်းမျိုးဖြစ်တယ်လို့ အဓိပ္ပာယ်ဖွင့်ထားတာ ဖတ်ရပါတယ်။

စိတ်ဓာတ်စစ်ဆင်ရေးကို အတိုချုပ်အနေနဲ့ “စိတ်ကိုပစ်တဲ့ စစ်” လို့ ဖွင့်ဆိုရင် လုံလောက်ပြီ ထင်ပါတယ်။ ကျွန်တော်တို့ အားလုံးရဲ့ ပြုမူလုပ်ဆောင်ချက်တွေ အားလုံးဟာ ကျွန်တော်တို့ရဲ့ စိတ်ကနေ လာပါတယ်။ စိတ်ဓာတ်စစ်ဆင်ရေးရဲ့ အဓိကရည်မှန်းချက်က တစ်ဖက်ရန်သူရဲ့ ပြုမူလုပ်ဆောင်ချက်တွေကို ပြောင်းလဲစေဖို့ဖြစ်ပြီး အဲဒီလို ပြောင်းလဲလာစေဖို့အတွက် အဓိကအရင်းအမြစ်ဖြစ်တဲ့ “စိတ်” ကို အဓိကပစ်မှတ်ထား လှမ်းပစ်တဲ့ စစ်ဆင်ရေးမျိုးပါ။ အဓိကရည်မှန်းချက် – ရန်သူရဲ့ ပြုမူလုပ်ဆောင်ချက်တွေပြောင်းဖို့၊ အဓိကပစ်မှတ် – စိတ် လို့ မှတ်လို့ရနိုင်ပါတယ်။

“ပြည်သူဟာ အကြမ်းဖက်စစ်တပ်ရဲ့ ရန်သူ”

——————————————

ဒီအဓိပ္ပာယ်ဖွင့်ဆိုချက်မှာ ရန်သူဆိုတာက တစ်ဖက်က ဆန့်ကျင်ဘက် အစုအဖွဲ့ကို ဆိုလိုတဲ့ သဘောပါ။ ဥပမာ – အခု ရုရှားနဲ့ ယူကရိန်း စစ်ဖြစ်နေတဲ့ အချိန်မှာဆိုရင် ရုရှားဘက်က စိတ်ဓာတ်စစ်ဆင်ရေးတွေက ယူကရိန်းခေါင်းဆောင်တွေ၊ စစ်သားတွေနဲ့ ပြည်သူတွေရဲ့ စိတ်ကို လှမ်းပစ်နိုင်ဖို့ ရည်ရွယ်ပါတယ်။

ကိုယ့်နိုင်ငံသားတွေ၊ ကိုယ့်လူလို့ ယူဆထားသူတွေထဲမှာ ကိုယ့်ကို ဆန့်ကျင်နေတဲ့၊ ဆန့်ကျင်ချင်နေတဲ့သူတွေ ရှိတယ်ဆိုရင်လည်း အဲဒီ အစုအဖွဲ့တွေက နောက်ထပ်သော ဦးတည်အစုအဖွဲ့ (Target Audience) တွေအဖြစ်နဲ့ ပါဝင်သွားတာမျိုး ရှိနိုင်ပါတယ်။

အမေရိကန်နဲ့ အီရန် စစ်ဖြစ်နေတဲ့ လက်ရှိအချိန်မှာဆိုရင်လည်း တစ်ဖက်နဲ့ တစ်ဖက် စိတ်ဓာတ်စစ်ဆင်ရေးတွေအဖြစ် အွန်လိုင်းပေါ်မှာရော မြေပြင်မှာပါ စကားလုံးတွေ၊ ရုပ်ပုံတွေ၊ ကာတွန်းတွေ၊ သီချင်းတွေ၊ ရုပ်သံတွေ၊ AI တွေ စသဖြင့် အမျိုးမျိုးသုံးပြီး ပစ်မှတ်ကို ပစ်ခွင်းစစ်ဆင်နေတာတွေ တွေ့ကြရမှာ ဖြစ်ပါတယ်။

လက်ရှိ မြန်မာနိုင်ငံရဲ့ အခြေအနေကို ကြည့်မယ်ဆိုရင်တော့ အကြမ်းဖက်စစ်အုပ်စုဟာ ပြည်သူလူထုတစ်ရပ်လုံးကို ရန်သူသဖွယ် သဘောထားပြီး တော်လှန်ရေးကို ဖြိုခွင်းဖို့ ကြိုးစားနေတာဖြစ်လို့ သူတို့ဟာ တော်လှန်ရေးခေါင်း ဆောင်တွေ၊ တော်လှန်ရေးသမားတွေ၊ တော်လှန်ရေးအင်အားစုတွေ၊ နိုင်ငံရေးအင်အားစုတွေ အပါအဝင် ပြည်သူလူထုတစ်ရပ်လုံးရဲ့ စိတ်ကို ပစ်မှတ်သဖွယ် သဘောထားပြီး လှမ်းလှမ်းပစ်နေတယ်ဆိုတာကို သတိချပ်ကြဖို့ လိုအပ်မှာ ဖြစ်ပါတယ်။

စိတ်လို့ တစ်လုံးတည်း ပြောလိုက်ပေမဲ့ ထပ်ပြီး ခွဲခြမ်းစိပ်ဖြာကြည့်မယ်ဆိုရင်တော့ သိစိတ်၊ မသိစိတ်၊ စိတ်ကူး၊ ထင်မြင်ယူဆချက်၊ စိတ်ခံစားမှု၊ စိတ်သဘောထား၊ ယုံကြည်ချက်၊ ခံယူချက်၊ စိတ်ပိုင်းဖြတ်မှု၊ စိတ်အစုအဝေး (Mindset) စတဲ့ တူမယောင်နဲ့ ကွဲတဲ့ နောက်ထပ် စကားလုံးတွေ ထပ်ထွက်လာတာကို တွေ့ရပါတယ်။

ရှင်းရှင်းပြောရရင်တော့ စိတ်ဓာတ်စစ်ဆင်ရေးဟာ အပေါ်မှာရေးလိုက်တဲ့ စကားလုံးတွေအပြင် ကျန်နေနိုင်သေးတဲ့ စိတ်နဲ့ပတ်သက်တဲ့ ပစ်မှတ်တွေအားလုံးကို ပစ်ခတ်ဖျက်ဆီးဖို့၊ ယိုယွင်းပုံပျက်သွားစေဖို့၊ ယိမ်းယိုင်ပြိုလဲသွားစေဖို့ ကြိုးစားတဲ့ စစ်ဆင်ရေးတွေပဲ ဖြစ်ပါတယ်။ ကျွန်တော်တို့ရဲ့ သိစိတ်ရော မသိစိတ်ကိုရော ပစ်ပါလိမ့်မယ်၊ ကျွန်တော်တို့ရဲ့ စိတ်ကူးတွေကို ပစ်ပါလိမ့်မယ်၊ ကျွန်တော်တို့ရဲ့ ထင်မြင်ယူဆချက်တွေကို ပစ်ပါလိမ့်မယ်၊ ကျွန်တော်တို့ရဲ့ စိတ်ခံစားမှုတွေ၊ စိတ်သဘောထားတွေကို ပစ်ပါလိမ့်မယ်၊ ကျွန်တော်တို့ရဲ့ ယုံကြည်ချက်တွေ၊ ခံယူချက်တွေကို ပစ်ပါလိမ့်မယ်၊ ကျွန်တော်တို့ရဲ့ စိတ်အစုအဝေး (Mindset) နဲ့ စိတ်ပိုင်းဖြတ်မှုတွေကို ပစ်ပါလိမ့်မယ်။

“Keyword များကို ထပ်ခါထပ်ခါ အသုံးပြုခြင်း”

———————————————

စိတ်ဓာတ်စစ်ဆင်ရေးနည်းနာများစွာ ရှိတဲ့အထဲမှာ တစ်ခုကတော့ အယူအဆအချို့ကို ချေဖျက်ဖို့ အဓိကစကား လုံး (Keyword) တွေကို ထပ်ခါထပ်ခါ သုံးတဲ့ နည်းနာတစ်ခုရှိပါတယ်။ လက်ရှိအချိန်မှာဆိုရင် NUG နဲ့ပတ်သက်ပြီး “လေလှိုင်းအစိုးရ” ဆိုတာမျိုး၊ တော်လှန်ရေးအင်အားစုတွေအားလုံးကို “ခွက်ခေါက်” ဆိုတာမျိုး၊ PDF တွေကို “ပဒတ်”၊ “ကွန်ဒုံး” ဆိုတာမျိုး စကားလုံးတစ်မျိုးမျိုးကို ထပ်ခါထပ်ခါ သုံးပြီး နားစွဲအောင်၊ စိတ်ထဲစွဲသွားအောင် လုပ်လေ့လုပ်ထ ရှိပါတယ်။

တော်လှန်ရေးဘက်ကဆိုရင်လည်း စစ်တပ်လော်ဘီတွေကို “၆၈၀၀ စား”၊ မအလကို “ကြင်စိုး”၊ စစ်တပ်ကို “ဖက်ဆစ်စစ်တပ်” ဆိုတာမျိုးတွေ သုံးကြတဲ့ သဘောမျိုးပေါ့။

နိုင်ငံတော်သမ္မတ၊ ပြည်ထောင်စုဝန်ကြီးချုပ်က စလို့ NUG ရဲ့ တာဝန်ရှိသူအများစု တော်လှန်ရေးရဲ့ စိုးမိုးနယ်မြေတွေထဲမှာ ရှိနေတာတွေကို သတင်းတွေရော၊ ဓာတ်ပုံတွေရော၊ ဗီဒီယိုတွေရောနဲ့ ထုတ်ပြန်ထားတာတွေ ရှိသလို အဲဒီ အမှန်တရားကို သူတို့ကိုယ်တိုင် သိနေပေမဲ့ စစ်တပ်ရဲ့ စိတ်ဓာတ်စစ်ဆင်ရေး တာဝန်ယူထားသူတွေဟာ အဲဒီ အမှန်တရားကို မသိချင်ယောင်ဆောင်ပြီး ချေဖျက်နိုင်ဖို့အတွက် လေလှိုင်းအစိုးရ၊ လေထဲကအစိုးရ ဆိုတဲ့ စကား လုံးတွေကို ထပ်ခါထပ်ခါ သုံးစွဲကြတာ တွေ့ရပါလိမ့်မယ်။

ဒီလိုပဲ NUG ကာကွယ်ရေးဝန်ကြီးဌာနရဲ့ ကွပ်ကဲမှုအောက်က PDF တွေ၊ ပကဖတွေ မြေပြင်မှာ တိုက်ပွဲတွေ ဆင်နွှဲပြီး အသက်ပေးကြရသူတွေ ရှိနေတာတွေကိုလည်း သိသိနဲ့ ဒီအမှန်တရားကို ချေဖျက်နိုင်ဖို့ “NUG က စစ်တကယ်မတိုက်ဘူး” ဆိုတဲ့ Keyword ကို ထပ်ခါထပ်ခါ သုံးတာတွေကိုလည်း တွေ့ရပါလိမ့်မယ်။

အခုလည်း နိုင်ငံတော်အတိုင်ပင်ခံပုဂ္ဂိုလ် လူထုခေါင်းဆောင် ဒေါ်အောင်ဆန်းစုကြည်ကို အကျဉ်းထောင်ထဲမှာ မတရားဖမ်းဆီးချုပ်နှောင်ထားရာကနေ အခြားနေရာတစ်ခုကို ပြောင်းလဲချုပ်နှောင်တဲ့ ကိစ္စမှာလည်း သူတို့ ပြန့်နှံ့စေချင်တဲ့ စကားလုံးတွေ၊ ဓာတ်ပုံတွေကို ပိုမိုပြန့်နှံ့အောင် လုပ်တဲ့ နည်းနာကို သုံးတာတွေ့ရပါလိမ့်မယ်။ စကားလုံးတွေကနေတစ်ဆင့် သူတို့ လိုချင်သော ဇာတ်ကြောင်း (Narrative) ကို ပုံဖော်တာလည်း ဖြစ်ပါတယ်။ ကျွန်တော်တို့တွေ အားလုံး အထူးသတိထားကြဖို့ လိုပါလိမ့်မယ်။

“ကိုယ်တိုင် စစ်တပ်ရဲ့ ဆိုက်ဝါး မိနေလား”

—————————————–

ကျွန်တော်တို့တွေ တစ်နေ့တစ်နေ့ လူမှုကွန်ရက်တွေပေါ်မှာပဲဖြစ်ဖြစ်၊ အခြားဆက်သွယ်ရေး ချန်နယ်တွေမှာပဲဖြစ်ဖြစ်၊ လက်တွေ့ဘဝတွေမှာပဲဖြစ်ဖြစ် မြင်နေ၊ ကြားနေ၊ တွေ့နေ၊ ကြုံနေကြရတာတွေ အားလုံးဟာ သဘာဝအလျောက် ဖြစ်တည်ပေါ်ပေါက်လာကြတာတွေ မဟုတ်ဘဲ အကြမ်းဖက်စစ်တပ်ရဲ့ စိတ်ဓာတ်စစ်ဆင်ရေး လုပ် ဆောင်ချက်တွေရဲ့ အစိတ်အပိုင်းတွေ ဖြစ်နေနိုင်တယ်၊ အကြမ်းဖက်စစ်တပ်ရဲ့ စိတ်ဓာတ်စစ်ဆင်ရေး ယန္တရားတွေနဲ့ တစ်နည်းတစ်ဖုံ ပတ်သက်နေနိုင်တယ်ဆိုတာကို အထူးသတိချပ်ကြဖို့ လိုပါလိမ့်မယ်။

နောက်တစ်ခု သတိချပ်သင့်တာကတော့ ကျွန်တော်တို့ကိုယ်တိုင် သေချာသတိမထားမိဘဲ အကြမ်းဖက်စစ်တပ်ရဲ့ စိတ်ဓာတ်စစ်ဆင်ရေးကျည်တွေ ကျွန်တော်တို့မှာ ထိနေတတ်ပြီး အဲဒီ ဒဏ်ရာတွေရဲ့ သက်ရောက်မှုကို ကျွန်တော်တို့ ခံနေရနိုင်တာပါ။

နောက်ထပ် ထပ်ပြီး သတိချပ်ကြရမယ့် ကိစ္စကတော့ ကျွန်တော်တို့ ကိုယ်တိုင် သေချာသတိမထားမိဘဲ အကြမ်းဖက်စစ်တပ်ရဲ့ စိတ်ဓာတ်စစ်ဆင်ရေး ကျည်ဆန်တွေကို ထပ်ဆင့်မျှဝေတာ၊ ပိုပျံ့နှံ့စေတာ၊ အသံပိုကျယ်အောင် လုပ်ပေးတာမျိုးတွေနဲ့ ကိုယ့်အချင်းချင်းကို ထပ်ထပ်ပစ်မိနေတတ်တာပါပဲ။ သူတို့ သုံးလေ့သုံးထရှိတဲ့ Keyword တွေကို ကျွန်တော်တို့ကိုယ်တိုင်က ပြန်သုံးမိနေပြီး သူတို့ ဖြစ်စေချင်တဲ့ ဇာတ်ကြောင်းတွေထဲ မျောပါသွားတာမျိုးတွေဟာ ကျွန်တော်တို့ကိုယ်တိုင် သတိမထားမိဘဲ စစ်တပ်ရဲ့ ဆိုက်ဝါးမိသွားတာပဲ။

အကြမ်းဖက်စစ်တပ်က လုပ်နေတဲ့ စိတ်ဓာတ်စစ်ဆင်ရေးကို ဘယ်လိုတုံ့ပြန်ကြမလဲ ဆိုတာနဲ့ ပတ်သက်ပြီး စာတစ်ပုဒ် သက်သက်ထပ်ရေးပါဦးမယ်။ ဒါပေမဲ့ အဲဒီ စိတ်ဓာတ်စစ်ဆင်ရေးကို တုံ့ပြန်ခြင်း နည်းနာတွေထဲမှာ “ရန်သူဟာ စိတ်ဓာတ်စစ်ဆင်ရေးကို ဘယ်လိုတွေ လုပ်လေ့လုပ်ထ ရှိသလဲဆိုတာကို နားလည်သဘောပေါက်အောင် ကြိုးစားလေ့လာခြင်း” က အရေးကြီးတဲ့ နည်းနာတစ်ခုအနေနဲ့ ပါဝင်ပါတယ်။

ဒါ့ကြောင့် ဒီနွေဦးတော်လှန်ရေးမှာ အကြမ်းဖက်စစ်တပ်ဘက်က တိုက်နေတဲ့ “စိတ်ကိုပစ်တဲ့ စစ်” တွေမှာ ကျွန်တော်တို့ မရှုံးဖို့၊ အနိုင်ရဖို့ အကြမ်းဖက်စစ်တပ်ရဲ့ စိတ်ဓာတ်စစ်ဆင်ရေး ယန္တရားတွေအကြောင်း၊ နည်းနာတွေအကြောင်းကို ပြည်သူတစ်ယောက်ချင်းစီတိုင်း သိနားလည်ထားပြီး တန်ပြန်နိုင်ကြပါစေလို့ ဆန္ဒပြုရင်း ဒီစာကို အဆုံးသတ်ပါရစေ။

အရေးတော်ပုံ မုချအောင်ရမည်။

(နေဘုန်းလတ်သည် အမျိုးသားညီညွတ်ရေးအစိုးရ-NUG ဝန်ကြီးချုပ်ရုံး၏ ပြောရေးဆိုခွင့်ရှိသူဖြစ်သည်။)

The post သူ့အတွေးသူ့အမြင် appeared first on Khit Thit Media.

မြန်မာနိုင်ငံ၏ လူထုခေါင်းဆောင်လည်းဖြစ်၊ နိုင်ငံတော်၏ အတိုင်ပင်ခံပုဂ္ဂိုလ်လည်းဖြစ်သူ ဒေါ်အောင်ဆန်းစုကြည်ကို ခြွင်းချက်မရှိ ချက်ချင်း လွှတ်ပေးရန် အမေရိကန်၊ ဂျပန်နှင့် ကုလသမဂ္ဂအတွင်းရေးမှူးချုပ်တို့က တောင်းဆိုလိုက်ကြသည်။

ဧပြီလ ၃၀ ရက်နေ့ ဒေါ်အောင်ဆန်းစုကြည်ကို ပြစ်ဒဏ်ကျခံနေရသည့်နေရာကို ပြောင်းလဲလိုက်ပြီး သတ်မှတ်ထားသည့်နေအိမ်တွင် ပြစ်ဒဏ်များ ဆက်လက်ကျခံရန် အကြမ်းဖက်စစ်တပ်က ပြောင်းလဲ သတ်မှတ်ခဲ့သည်။

အမေရိကန်ပြည်ထောင်စုက ဒေါ်အောင်ဆန်းစုကြည်အား “ချက်ချင်းနှင့် ခြွင်းချက်မရှိ ပြန်လည်လွှတ်ပေးရန်” ဆက်လက်တောင်းဆိုလိုက်ပြီး သူမ၏ ကျန်းမာရေးအခြေအနေကြောင့် လုံလောက်သည့် ဆေးကုသမှု ရရှိစေရန် စစ်ကောင်စီကို တိုက်တွန်းခဲ့လိုက်သည်။

အမေရိကန် နိုင်ငံခြားရေးဝန်ကြီးဌာန ပြောရေးဆိုခွင့်ရှိသူက “ဒေါ်အောင်ဆန်းစုကြည်ကို ချက်ချင်းနှင့် ခြွင်းချက်မရှိ ပြန်လည်လွှတ်ပေးရန် ဆက်လက်တောင်းဆိုပါသည်” ဟု ပြောကြားသည်။

ကုလသမဂ္ဂ အတွင်းရေးမှူးချုပ် အန်တိုနီယို ဂူတာရက်စ်ကလည်း ဒေါ်အောင်ဆန်းစုကြည်အား နေအိမ်သို့ ပြောင်းရွှေ့မှုကို မှတ်သားထားပြီး၊ မတရားဖမ်းဆီးခံထားရသူအားလုံးကို “မြန်မြန်ဆန်ဆန်နှင့် ခြွင်းချက်မရှိ” လွှတ်ပေးရန် တောင်းဆိုခဲ့သည်။ ခိုင်မာသည့် နိုင်ငံရေးအဖြေရှာမှုသည် အကြမ်းဖက်မှုများ ချက်ချင်းရပ်တန့်ရေးနှင့် အားလုံးပါဝင်သည့် တွေ့ဆုံဆွေးနွေးမှုအပေါ်တွင်သာ အခြေခံရမည်ဟု ၎င်းက ဆိုသည်။

ဂျပန်နိုင်ငံခြားရေးဝန်ကြီးဌာနက ယခုဖြစ်ပေါ်တိုးတက်မှုများကို အနီးကပ်စောင့်ကြည့်လျက်ရှိပြီး “ကောင်း မွန်သော အဆင့်များ” အဖြစ် ရှုမြင်ကြောင်း ထုတ်ပြန်သည်။ အကြမ်းဖက်မှုများ ရပ်တန့်ရေးနှင့် ဒေါ်အောင်ဆန်းစုကြည် အပါအဝင် ဖမ်းဆီးခံထားရသူများ ထပ်မံလွတ်မြောက်လာရေးအတွက် ဂျပန်က မျှော်လင့်နေသည်ဟု ဂျပန်အစိုးရက သတင်းထုတ်ပြန်သည်။

၂၀၂၁ ခုနှစ် စစ်အာဏာသိမ်းပြီးနောက်ပိုင်း ဖြစ်ပွားလာသည့် ပြည်တွင်းစစ်ကြောင့် မြန်မာနိုင်ငံတွင် လူပေါင်းထောင်ချီ သေဆုံးကာ သန်းနှင့်ချီသော ပြည်သူများ နေရပ်စွန့်ခွာခဲ့ကြရသည်။ ဒေါ်အောင်ဆန်းစုကြည်သည် မြန်မာနိုင်ငံအတွင်း လူထုထောက်ခံမှု အများအပြား ရရှိထားဆဲဖြစ်သော်လည်း ပြင်ပနှင့် အဆက်အသွယ် လုံးဝဖြတ်တောက်ခံထားရသည်မှာ ကြာမြင့်နေပြီဖြစ်သည်။

The post လူထုခေါင်းဆောင် ဒေါ်အောင်ဆန်းစုကြည်ကို ခြွင်းချက်မရှိ ချက်ချင်း လွှတ်ပေးရန် အမေရိကန်၊ ဂျပန်နှင့် ကုလသမဂ္ဂအတွင်းရေးမှူးချုပ်တို့က တောင်းဆို appeared first on Khit Thit Media.

အကြမ်းဖက်စစ်တပ်၏ မတရား ဖမ်းဆီးမှု ခံထားရသော ဒေါ်အောင်ဆန်းစုကြည်မှာ တရုတ်နိုင်ငံ၏ မိတ်ဆွေဟောင်းဖြစ်ပြီး သူမ၏ အခြေအနေကို အစဉ်အမြဲ ဂရုစိုက်နေကြောင်း တရုတ်နိုင်ငံခြားရေးဝန်ကြီးဌာန ပြောခွင့်ရ လျင်ကျန့်က ပြောဆိုလိုက်သည်။

တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ လျင်ကျန့်က ဧပြီ ၃၀ ရက် ပုံမှန်သတင်းစာရှင်းလင်းပွဲတွင် AFP သတင်းဌာန၏ မေးမြန်းချက်ကို ထိုသို့ ပြောဆိုလိုက်ခြင်းဖြစ်သည်။

ထိုသို့မေးမြန်းသည့်အပေါ် လျင်ကျန့်က ဒေါ်အောင်ဆန်းစုကြည်သည် တရုတ်နိုင်ငံ၏ မိတ်ဆွေဟောင်းဖြစ်ရာ ၎င်း၏အခြေအနေအား မိမိတို့အနေဖြင့် အစဉ်အမြဲ ဂရုစိုက်လျက်ရှိကြောင်း ပြောကြားသည်။

အိမ်နီးချင်းနိုင်ငံအနေဖြင့် တရုတ်နိုင်ငံက မြန်မာနိုင်ငံ၏အခြေအနေနှင့်ကိုက်ညီသော ဖွံ့ဖြိုးတိုးတက်ရေးလမ်း ကြောင်း လျှောက်လှမ်းမှုကို ထောက်ခံအားပေးသလို မြန်မာနိုင်ငံ ဘက်ပေါင်းစုံက ပို၍ကျယ်ပြန့်သော၊ ပို၍ ခိုင် မာသော၊ ပို၍ ရေရှည်ဖြစ်သော ငြိမ်းချမ်းရေးနှင့် ပြန်လည်ရင်ကြားစေ့ရေး ဖော်ဆောင်ခြင်းကို ထောက်ခံကြောင်း ပြောဆိုသည်။

တရုတ်နိုင်ငံခြားရေးဝန်ကြီးဌာနက ထိုသို့ ပြောဆိုပြီး ယမန်နေ့ ညပိုင်းတွင် စစ်တပ်က ဒေါ်အောင်ဆန်းစုကြည်ကို နေအိမ်အချုပ်သို့ ပြောင်းလဲလိုက်ကြောင်း သတင်းထုတ်ပြန်ခဲ့သည်။

The post ဒေါ်အောင်ဆန်းစုကြည်မှာ တရုတ်နိုင်ငံ၏ မိတ်ဆွေဟောင်းဖြစ်၍ သူမ၏ အခြေအနေကို အစဉ်အမြဲ ဂရုစိုက်နေဟု တရုတ်နိုင်ငံခြားရေးဝန်ကြီးဌာန ပြောခွင့်ရ ပြောဆို appeared first on Khit Thit Media.

မြန်မာနိုင်ငံအတွင်းရှိ အလုပ်သမား၊ လယ်သမား၊ ဆင်းရဲသား အခြေခံလူတန်းစားတို့ စည်းလုံးညီ ညွတ်စွာ ရပ် တည်ပြီး စစ်အာ ဏာရှင်စနစ် အမြစ်ဖြတ်ရေးအတွက် တိုက်ပွဲဝင်ကြရန် မြန်မာနိုင်ငံအလုပ်သမားတပ်ပေါင်းစု – MLA က ၁၃၆ ကြိမ် မြောက် မေဒေး အဖြစ် ကြေညာချက်ထုတ်ပြန်တိုက်တွန်းလိုက်သည်။

မနက်ဖြန်ကျရောက်မည့် မေလ ၁ ရက် မေဒေးနေ့ (အပြည်ပြည်ဆိုင်ရာအလုပ်သမားနေ့) အောင်ပွဲဖြစ်သည့် တစ်နေ့အလုပ် ချိန် ၈ နာရီ အတွက် တိုက်ပွဲဝင်ခဲ့ကြသော တိုက်ပွဲဝင်အလုပ်သမားရဲဘော်အပေါင်းကို ဂုဏ်ပြုသော အားဖြင့် “အလုပ်သမားအပေါင်းတို့ နိုးထကြ။ ရပ်တည်တိုက်ပွဲဝင်ကြ။”ဟု နှိုးဆော်ပါကြောင်း၊ မြန် မာနိုင်ငံအပါအဝင်ကမ္ဘာ့နိုင်ငံအသီး သီးတွင် အလုပ်သမားများ၏ ဒီမိုကရေစီအခွင့်အရေးများ၊ နိုင်ငံ သားအခွင့်အရေးများနှင့် လူမှုရေးတရားမျှတမှု အခြေခံအုတ်မြစ်များသည် တိုက်ခိုက်ခံရလျက်ရှိ ကြောင်း အသိပေးထားသည်။

စစ်အာဏာရှင်နှင့် အာဏာရှင်များစွာတို့သည် ဩဇာကြီးမားသော မင်းပေါက်စိုးပေါက် ဆိုသူ များ၊ ဘီလီယံနာ များ၊ ၎င်းတို့နှင့်ဆက်စပ်သည့်စီးပွါးရေးလုပ်ငန်းကြီးနှင့်အတူ ၎င်းတို့၏ထိန်းချုပ်မှုကို တင်းကျပ်စွာ လုပ်ဆောင်နေကြကြောင်း၊ ၎င်းတို့သည် အလုပ်သမားလူတန်းစား၏ လိုအပ်ချက်များ ကို လျစ်လျူရှုထားပြီး တရားမျှတသော လုပ်ခလစာ၊ ဂုဏ်သိက္ခာနှင့် လူမှုရေးကာကွယ်မှုများကို ငြင်း ပယ်ကာ ၎င်းတို့၏ကိုယ်ပိုင်အကျိုးစီးပွားများကို ဖြည့်ဆည်းရန် စီးပွားရေးမူဝါဒများကို ပုံဖော်လုပ် ကိုင်ကြကြောင်း ထောက်ပြထားသည်။

ထို့အတွက်လူမှုအဖွဲ့အစည်းတရပ်လုံးတွင် ချမ်းသာသူနှင့် ဆင်းရဲသူကြား ကွာဟချက်သည် ဆက် လက် ကျယ် ပြန့်လာပြီး မညီမျှမှုနှင့် မတရားမှုများကို ပိုမိုနက်ရှိုင်းစေကြောင်း၊ အသင်းအဖွဲ့ ဖွဲ့စည်း ခွင့်ကို ဖိနှိပ်ခြင်းသည် ၎င်းတို့ ရည်ရွယ်ချက်ရှိရှိ လုပ်ဆောင်နေကြခြင်းဖြစ်ပြီး အလုပ်သမားများ၏ လွတ်လပ်စွာစုဝေး၊ စည်းရုံးပိုင်ခွင့်ကို ငြင်းပယ်ခြင်းဖြင့် အာဏာရှိသူများသည် စည်းလုံး ညီညွတ်မှုကို တားဆီးရန်နှင့် စုပေါင်းအင်အားကို ချိနဲ့စေရန် ရည်ရွယ်ခြင်းဖြစ်ကြောင်း အသိပေးထားသည်။

ထိုသို့ ပြုလုပ်ခြင်းသည် နိုင်ငံ၏ချမ်းသာကြွယ်ဝမှုနှင့် အရင်းအမြစ်များကို ၎င်းတို့မှ ဆက်လက်ထိန်း ချုပ်ထားရန်ဖြစ်ပြီး ထိုချမ်းသာ ကြွယ်ဝမှုကို ဖန်တီးသူ ရင်းမြစ်ဖြစ်သည့်အလုပ်သမားများအားတရား မျှတစွာ မျှဝေရန် ရည်ရွယ်ချက် မရှိမှုပင် ဖြစ်သည်ဟု ဆိုသည်။

ဖိနှိပ်သူအာဏာရှင်များသည် လူ့အဖွဲ့အစည်း၏ အနာဂတ်အတွက် အလေးအနက်ဂရုစိုက်ခြင်း မပြု ကြဘဲ ၎င်းတို့၏ ဦးစားပေးမှာ အာဏာ၊ အမြတ်အစွန်းနှင့် အခွင့်ထူးများဖြစ်၍ ၎င်းတို့ကိုယ်တိုင်နှင့် ၎င်းတို့၏ သားစဉ် မြေးဆက်များအတွက်သာ ရည်ရွယ်ကြခြင်းဖြစ်ပြီး အလုပ်သမားများနှင့် မိသား စုများမှာမူ ဆင်းရဲတွင်းနက်သထက်နက်ရင်း ဂုဏ်သိက္ခာရှိစွာရှင်သန်နိုင်ရေးအတွက် အင်အားရှိသမျှ ရုန်းကန်နေကြရကြောင်း သိရသည်။

အလုပ်သမားတို့၏ အခွင့်အရေးနှင့် အကျိုးစီးပွားအတွက် ရပ်တည်ဆောင်ရွက်ရဲသည့် အလုပ်သမား များနှင့် အလုပ်သမားလှုပ်ရှားသူများသည် ခြိမ်းခြောက်မှု၊ အကြမ်းဖက်မှု၊ ထောင်ချခံရမှုနှင့် သေဆုံး မှုနှင့်ပင် ရင်ဆိုင်နေကြရကြောင်း၊ လွတ်လပ်သောအလုပ်သမားသမဂ္ဂများကို ချေမှုန်းပစ်ကြပြီး အ လုပ်သမား လှုပ်ရှားမှုကို ကွဲပြားစေပြီး အားနည်းစေရန် အတုအယောင် အဖွဲ့အစည်းများကို ဖန်တီး ကာ လှည့်စားထားကြောင်း MLA က အသိပေးထားသည်။

အဆိုပါအခြေအနေများ ဆက်လက်ဖြစ်ပွါးခြင်းမှ ရပ်တန့်နိုင်ရန်၊ ဖြိုခွဲနိုင်ရန် မေးဒေးအလုပ်သမားထု တိုက်ပွဲဝင်စိတ်ဓာတ်၊ သွေးစည်းညီညွတ်ရေးစိတ်ဓာတ်ဖြင့် ယခုအချိန်သည် အလုပ်သမား၊ လယ် သမား၊ ဆင်းရဲသား အခြေခံလူတန်းစားတို့ စည်းလုံးညီညွတ်စွာ ရပ်တည်ပြီး တိုက်ပွဲဝင်ရမည့် အချိန် ပင်ဖြစ်ကြောင်း နှိုးဆော်ထားသည်။

စည်းလုံးညီညွတ်မှုနှင့် သွေးစည်းညီညွတ်စွာတိုက်ပွဲဝင်မှုမှတစ်ဆင့်သာ တရားမျှတ သော လူ့အဖွဲ့အ စည်းတစ်ခုကို တည်ဆောက်နိုင်မည်ဖြစ်ပြီး အနာဂတ်မျိုးဆက်များအတွက် ဂုဏ်သိက္ခာ၊ တန်းတူညီ မျှမှုနှင့် အခွင့်အလမ်းများကို အာမခံနိုင်မည်ဖြစ်ကြောင်း ထုတ်ပြန်ထားသည်။

မြန်မာနိုင်ငံတွင် စစ်အာဏာရှင်စနစ်၏ သေနတ်ထောက်အုပ်ချုပ်မှုအောက်၌ အလုပ်သမားများနှင့် လယ်သမားများ ၊ဖိနှိပ်ခံပြည်သူလူထုတရပ်လုံးအနေဖြင့် စီးပွားရေးအခက်အခဲများ၊ မလုံခြုံမှုများနှင့် အခြေခံအခွင့်အရေးများကို ကျယ်ကျယ်ပြန့်ပြန့် ချိုးဖောက်ခံနေကြရပြီး မြန်မာနိုင်ငံ တစ်ဝှမ်းရှိ အ လုပ်သမားများသည် ဝင်ငွေကျဆင်းခြင်း၊ နေထိုင်စရိတ်များ မြင့်တက်လာခြင်းနှင့် အလုပ်အကိုင် အ ခွင့်အလမ်းများ လျော့နည်းလာခြင်းတို့ကို ရင်ဆိုင်နေကြရသည်။

ထို့အပြင် အများစုမှာ လုပ်ခလစာ နည်းပါးခြင်း၊ အလုပ်ချိန်အလွန်အကျွံလုပ်ရခြင်း၊ မလုံခြုံသော အ လုပ် ခွင်များနှင့် လူမှုကာကွယ်မှု ချို့တဲ့ခြင်းတို့ဖြင့် ပြင်းထန်စွာ ဖိနှိပ်မှုတို့ ခံနေကြရကြောင်း၊ လုပ်ခ လစာ အမြတ်ထုတ် ခံရခြင်း၊ အတင်းအကြပ် အချိန်ပိုစေခိုင်းခံရခြင်းနှင့် အလုပ်ခွင်နှောင့်ယှက်ခြင်း အပါအဝင် အလုပ်သမား အခွင့်အရေးချိုးဖောက်မှုများသည် ပိုမိုများပြားလာသဖြင့် အလုပ်သမားများ သည် ဂုဏ်သိက္ခာရှိရှိ ရှင်သန်ရပ်တည်နိုင်စွမ်းမရှိတော့သည့် အခြေအနေပင်ဖြစ်ကြောင်း MLA က ပြောဆိုသည်။

တစ်ချိန်တည်းမှာပင် အလုပ်သမားများ၏ အကျိုးစီးပွားများ စုစည်းကာကွယ်ပိုင်ခွင့်ဖြစ်သည့် လွတ် လပ်စွာအသင်းအပင်းဖွဲ့စည်းခွင့်ကို ခြိမ်းခြောက် ခြင်း၊ ဖမ်းဆီးခြင်း၊ စောင့်ကြည့်ခြင်းနှင့် အလုပ်သ မားသမဂ္ဂလှုပ်ရှားမှုများကို ဖိနှိပ် ခြင်းတို့လုပ်ဆောင်လျက်ရှိကြောင်း၊ လွတ်လပ်စွာအသင်းအပင်းဖွဲ့ စည်းခွင့် ချိုးဖောက်ခံရခြင်းကြောင့် အလုပ်သမားများသည် စိုးရိမ်ပူ ပန်မှုများ၊ အခွင့်အရေးချိုး ဖောက်ခံရမှုများကို ထုတ်ဖော်ပြောဆိုနိုင်ခြင်း သို့မဟုတ် စုပေါင်းညှိနှိုင်းမှုတွင် ပါဝင်နိုင်ခြင်းမရှိဘဲ အမြတ်ထုတ်ခံရနိုင်ခြင်းကို ပိုမိုနက်ရှိုင်းစွာ ကြုံတွေ့နေကြရသည်ဟု ဆိုသည်။

လယ်သမားများနှင့် စိုက်ပျိုးရေးလုပ်သားများသည် အဆိုးရွားဆုံးထိခိုက်သူများထဲတွင် ပါဝင်လျက်ရှိ ပြီး ရေကြီးရေလျှံမှုနှင့် မုန် တိုင်းများကဲ့သို့သော ရာသီဥတုဆိုင်ရာ ဘေးအန္တရာယ်များသည် သီးနှံ များနှင့် အသက်မွေးဝမ်း ကျောင်းမှုများကို ပျက်စီးစေခဲ့ကာ လယ်သမားငယ်များစွာကို အကြွေးတင် စေခဲ့ကြောင်း ထောက်ပြထားသည်။

အချို့လယ်သမားများသည် ၎င်းတို့၏မြေယာများကို ရောင်းချရန် သို့မဟုတ် စွန့်လွှတ်ရန် အတင်း အ ကျပ်ခိုင်းစေခံရပြီး ဆင်းရဲမွဲတေမှု၊ အစားအစာ မလုံလောက်မှုနှင့် ကျေးလက်ဒေသများတွင် မတည် ငြိမ်မှုများကို ဖြစ်ပေါ်စေခဲ့ကြောင်း၊တစ်ချိန်တည်းမှာပင်၊ အဓမ္မလုပ်အားပေးခိုင်းစေမှုများနှင့် ရွှေ့ ပြောင်းမှုများသည် စိုက်ပျိုးရေးထုတ်လုပ်မှုကို လျော့ကျစေပြီး ကျေးလက်စီးပွား ရေးကို ထိခိုက် စေခဲ့ ကြောင်း သိရသည်။

ထို့အပြင် စစ်အုပ်စု၏ ဖိနှိပ်မှုများကြောင့် စီးပွားရေးအကျပ်အတည်းဖြစ်ပေါ်ပြီး ကလေးများစွာသည် စက်မှုဇုန်များနှင့် စိုက်ပျိုးရေး ကဏ္ဍနှစ်ခုလုံးတွင် အလုပ်လုပ်ရန် အတင်း အကျပ်ခိုင်းစေခံနေရ ကြောင်း၊ အတု အယောင် မှတ်ပုံတင်များကို အသုံးပြုကာ အရွယ်ရောက်ပြီးသူ အလုပ်သမားများကဲ့ သို့ပင် ကလေးသူငယ်များ အလုပ်လုပ်နေကြပြီး ကာကွယ်ခံရမည့်အစား၊ ပြောဆိုရန်ကြိုးစားသည့် အခါ ခြိမ်းခြောက်မှုများကို ရင်ဆိုင်နေကြရကြောင်း သိရသည်။

၎င်းသည် နိုင်ငံတကာ အလုပ်သမားစံနှုန်းများကို ချိုးဖောက်ရုံ သာမက မျိုးဆက်တစ်ခုလုံး၏ ကျန်း မာရေး၊ ပညာရေးနှင့်အနာဂတ်ကိုလည်း အန္တရာယ်ဖြစ်စေကြောင်း ထောက်ပြထားသည်။

ယင်းအခြေအနေများကြား၌ပင် အကြမ်းဖက်စစ်တပ်၏ အတင်းအကျပ် စစ်မှုထမ်းခိုင်းခြင်းသည် အ လုပ်သမားများနှင့် လယ်သမားများအတွက် အခြေအနေကို ပိုမိုဆိုးရွားစေခဲ့ပြီး လူငယ်များ အပါအဝင် ပြည်သူအများသည် အတင်းအကျပ် အခြေအနေများအောက်တွင် စစ်တပ်သို့ ဝင်ရောက် ရန် အတင်း အကျပ် ခိုင်းစေခံနေရကြောင်းဖော်ပြသည်။

လူမှုအသိုင်းအဝိုင်းများစွာတွင် မိသားစုများသည် စစ်မှုထမ်းခြင်းကိုရှောင်ရှားရန် အခကြေးငွေများ ပေးဆောင်ရပြီး အချို့မှာ ဖမ်းဆီး ခံရခြင်း သို့မဟုတ် အတင်းအကျပ် စစ်သားစုဆောင်းခံရခြင်းနှင့် ရင်ဆိုင်နေရကြောင်း သိရသည်။

ထိုသို့ဖိနှိပ်မှုများကြောင့် အလုပ်သမားရှားပါးမှုဖြစ်ပေါ်ပြီး စိုက်ပျိုးရေးထုတ်လုပ်မှုကို အားနည်းစေ သည့်အပြင် ကျေးလက်ဒေသများတွင် ကြောက်ရွံ့မှု၊ ရွှေ့ပြောင်းမှုနှင့် အသက်မွေးဝမ်း ကျောင်းမှု ဆုံး ရှုံး မှုများကို ကျယ်ကျယ်ပြန့်ပြန့် ဖြစ်ပေါ် စေခဲ့ကြောင်း၊ စစ်မှုထမ်းခိုင်းခြင်း၏ ခြိမ်းခြောက်မှုသည် အလုပ်သမားများ၏ ရွေ့လျားမှုကိုလည်း ကန့်သတ်ထားပြီး ၎င်းတို့၏ အမြတ်ထုတ်ခံရနိုင်ခြေကို တိုး စေကြောင်း MLA က ပြောဆိုထားသည်။

အလုပ်အကိုင် မတည်မငြိမ်ဖြစ်မှုသည် အထူးသဖြင့် လူငယ်များနှင့်ရွှေ့ပြောင်းအလုပ်သမားများ ကြားတွင် ကျယ်ကျယ်ပြန့်ပြန့် ဖြစ်ပွားနေပြီး ၎င်းတို့သည် လုပ်ခလစာနည်းပါးခြင်း၊ အချိန်မမှန် ခြင်းနှင့် တရားဝင်ကာကွယ်မှုများ မရှိခြင်းတို့ဖြင့် မတည်ငြိမ်သောအလုပ်များကို မကြာခဏရင် ဆိုင် ရလေ့ရှိကြောင်း၊ ဤအခြေအနေများသည် ကလေးအလုပ်သမားများ တိုးပွားလာခြင်း၊ မလုံခြုံ သော နှင့် အဓမ္မ ရွှေ့ပြောင်းခြင်း၊ လူကုန်ကူးမှုနှင့် ရေရှည်လူမှုရေး မညီမျှမှုများကို ဖြစ်ပေါ်စေကြောင်း ဆက်လက်ပြောဆိုထားသည်။

အလုံးစုံသော လူ့ဂုဏ်သိက္ခာနှင့် လူမှုရေးတရားမျှတမှုထက် အာဏာနှင့် အကျိုးအမြတ်ကို ဦးစားပေး သည့် စနစ်အောက်တွင် အလုပ်သမားများနှင့် လယ်သမားများ၏ အလုပ်ခွင်နှင့် နေထိုင်မှုအခြေအနေ များသည် ဆက်လက်ယိုယွင်းနေကြောင်း၊ အလုပ် သမား အခွင့်အရေးများကို ဖိနှိပ်ခြင်းသည် စီးပွား ရေးကျဆင်းမှုနှင့် ပဋိပက္ခများနှင့်အတူ ပေါင်းစပ်ပြီး အမြတ်ထုတ်မှုများ တိုးပွားလာကာ အသက်မွေး ဝမ်းကျောင်းမှုများတွင် မလုံခြုံသော ပတ်ဝန်းကျင်ကိုသာ ထပ်တလဲလဲ ကြုံတွေ့ရမည်ဖြစ် ကြောင်း အသိပေးထားသည်။

ထို့ကြောင့် အလုပ်သမားများနှင့် လယ်သမားများသည် ၎င်းတို့၏အခွင့်အရေးများကို လွတ်လပ်စွာ ကျင့်သုံးနိုင်ရန်၊ တရားမျှတပြီး ဘေးကင်းသော အခြေအနေများအောက်တွင် အလုပ် လုပ်နိုင်ရန်၊ တန်းတူညီမျှသော စီးပွားရေးအခွင့်အလမ်းများ ရရှိနိုင်ရန်အတွက် စုပေါင်း လုပ်ဆောင်ရမည်ဖြစ် ကြောင်း ထောက်ပြထားသည်။

သို့ဖြစ်၍ အလုပ်သမားများ၏ အခွင့်အရေးများ၊ လယ်သမားများ၏ အသက်မွေးဝမ်းကျောင်းမှုနှင့် အခြေခံ လွတ်လပ်ခွင့်များပိုမိုဆိုးရွားလာမှုကို တုံ့ပြန်သည့်အနေဖြင့် မေးဒေးနေ့တွင် အလုပ်သမား၊ လယ် သမား ဖိနှိပ်ခံပြည်သူလူထုအပေါင်းအား ရပ်တည် တိုက်ပွဲ ဝင်ကြရန်နှင့် နိုင်ငံအဆင့်၊ တော် လှန်ရေး အင်အားစုများ အကြားနှင့် နိုင်ငံတကာအနေဖြင့်လည်း ဝိုင်းဝန်းကူညီပေးကြပါရန် နှိုးဆော် ထားသည်။

ဓာတ်ပုံ- ၂၀၂၁ ခုနှစ် စစ်အာဏာရှင် ဆန့်ကျင်ရေးဆန္ဒပြပွဲ။ Photo- AP ။

The post စစ်အာဏာရှင်စနစ် အမြစ်ဖြတ်ရေးအတွက် အလုပ်သမား၊ လယ်သမား၊ ဆင်းရဲသား အခြေခံလူတန်းစားတို့ စည်းလုံးညီညွတ်စွာဖြင့် တိုက်ပွဲဝင်ကြရန် မြန်မာနိုင်ငံအလုပ်သမားတပ်ပေါင်းစု တိုက်တွန်း appeared first on Khit Thit Media.

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် အပါအဝင် ကျန်ရှိနေသေးသည့် နိုင်ငံရေးအကျဉ်းသားအားလုံးကို အမြန်ဆုံးလွှတ်ပေးရန်၊ အကြမ်းဖက်မှုများအားလုံးကို ချက်ချင်းရပ်တန့်ရန် အာဆီယံအလှည့်ကျဥက္ကဋ္ဌ ဖိလစ်ပိုင်နိုင်ငံက ယနေ့တွင် တရားဝင် ကြေညာချက် ထုတ်ပြန် တောင်းဆိုလိုက်သည်။

အာဆီယံဥက္ကဋ္ဌ ဖိလစ်ပိုင်နိုင်ငံ၏ ယနေ့ ကြေညာချက်တွင် သမ္မတ ဦးဝင်းမြင့် လွတ်မြောက်လာမှုအပေါ် ကြိုဆိုကြောင်း၊ ဧပြီလ ၁၇ ရက် မြန်မာနှစ်သစ်ကူးတွင် အကျဉ်းသား ၄,၀၀၀ ကျော်ကို လွှတ်ပေးခဲ့ရာတွင် သမ္မတ ဦးဝင်းမြင့် လွတ်မြောက်လာခြင်းကို အာဆီယံက အထူးတလည် ကြိုဆိုပြီး ယင်းမှာ မြန်မာ နိုင်ငံရှိ သက်ဆိုင်သူအားလုံး ပါဝင်နိုင်မည့် အမျိုးသားအဆင့် တွေ့ဆုံဆွေးနွေးမှုများ ပေါ်ပေါက်လာစေရန်အတွက် အပြုသဘောဆောင်သည့် ခြေလှမ်းတစ်ရပ်အဖြစ် ရှုမြင်ကြောင်း ဖော်ပြထားသည်။

စစ်မှန်သော ငြိမ်းချမ်းရေးနှင့် အမျိုးသားပြန်လည်သင့်မြတ်ရေးကို ရှေးရှု၍ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် အပါအဝင် ကျန်ရှိနေသေးသည့် အကျဉ်းသားအားလုံးကို ဆက်လက်လွှတ်ပေးရန် အာဆီယံက တိုက်တွန်းထားသည်။

အာဆီယံ၏ “ဘုံသဘောတူညီချက် ၅ ရပ်” (5-Point Consensus) သည် မြန်မာ့အရေးဖြေရှင်းရန် အဓိက ကိုးကားချက်အဖြစ် ထပ်လောင်းအတည်ပြုခဲ့ပြီး အရပ်သားများနှင့် အများပြည်သူဆိုင်ရာ အဆောက်အအုံများအပေါ် အကြမ်းဖက်မှုများကို ချက်ချင်းရပ်တန့်ရန်၊ သက်ဆိုင်သူအားလုံးက အစွမ်းကုန် ထိန်းသိမ်းကြရန်နှင့် အခြေအနေများ ပိုမိုဆိုးရွားလာစေမည့် လုပ်ရပ်များကို ရှောင်ကြဉ်ရန်၊လူသားချင်းစာနာမှု အကူအညီများ ပေးအပ်နိုင်မည့် လုံခြုံသော ပတ်ဝန်းကျင်တစ်ခုကို ဖန်တီးပေးရန် အာဆီယံဥက္ကဋ္ဌက တောင်းဆိုထားသည်။

မြန်မာနိုင်ငံသားများ ကိုယ်တိုင်ဦးဆောင်သည့် (Myanmar-owned, Myanmar-led) ငြိမ်းချမ်းသော နည်းလမ်းဖြင့် နိုင်ငံရေးအကျပ်အတည်းကို ဖြေရှင်းနိုင်ရေးအတွက် အာဆီယံက ဆက်လက်ကူညီသွားမည်ဖြစ်ကြောင်း၊ အာဆီယံဥက္ကဋ္ဌ၏ အထူးကိုယ်စားလှယ်အနေဖြင့်လည်း သက်ဆိုင်သူအားလုံး ပါဝင်နိုင်မည့် အမျိုးသားအဆင့် ဆွေးနွေးပွဲများ ဖြစ်ပေါ်လာစေရန်အတွက် ဆက်လက် ဆောင်ရွက်သွားမည် ဖြစ်ကြောင်း အာဆီယံဥက္ကဋ္ဌ ၏ ကြေညာချက်တွင် ကတိပြုထားသည်။

၂၀၂၆ ခုနှစ် အာဆီယံဥက္ကဋ္ဌ တာဝန်ယူထားသည့် ဖိလစ်ပိုင်နိုင်ငံ၏ ယနေ့ ကြေညာချက်သည် မြန်မာစစ်အုပ်စုအပေါ် ပေးလိုက်သည့် သိသာထင်ရှားသော နိုင်ငံရေးဖိအားတစ်ခု ဟုဆိုနိုင်ကြောင်း တော်လှန်ရေးအသိုင်းအ၀ိုင်းက သုံးသပ်ပြောဆိုသည်။

The post ဒေါ်အောင်ဆန်းစုကြည် အပါအဝင် နိုင်ငံရေးအကျဉ်းသားအားလုံးကို လွှတ်ပေးရန် အာဆီယံဥက္ကဋ္ဌက တရားဝင်ကြေညာချက် ထုတ်ပြန်တောင်းဆို appeared first on Khit Thit Media.

မြန်မာနိုင်ငံတစ်ဝန်း KIA ၊ KNU ၊ AA ၊ MNDAA ၊ UWSA ၊ NDAA၊ TNLA အပါအဝင် တိုင်းရင်း သားများနှင့် တော်လှန်ရေးတပ်များ ထိန်းချုပ်ထားသော မြို့နယ် ၆၀ ခုကို အကြမ်းဖက် မင်းအောင်လှိုင်က စစ်အုပ်ချုပ်ရေး ယမန်နေ့ညပိုင်း ကြေညာသည်။

အကြမ်းဖက် မင်းအောင်လှိုင်က တိုင်းနှင့်ပြည်နယ် ၉ ခုရှိ မြို့နယ်ပေါင်း ၆၀ ကို အရေးပေါ်အခြေအနေ‌ကြေညာခြင်းဖြစ်ပြီး စစ်အုပ်ချုပ်ရေးအမိန့်ထုတ်ပြန်၍ အုပ်ချုပ်ရေးနှင့် တရားစီရင်ရေးတာဝန်များအား စစ်တပ်ဦးစီးချုပ် ရဲဝင်းဦးကို လွှဲအပ်ကြောင်း ကြေညာထားသည်။

အဆိုပါ နယ်မြေများမှာ KIA ၊ KNU ၊ AA ၊ MNDAA ၊ UWSA ၊ NDAA၊ TNLA အပါအဝင် တိုင်း ရင်းသားလက်နက်ကိုင်အဖွဲ့များ၊ NUG လက်အောက်ခံ PDF နှင့် တော်လှန်ရေး တပ်ဖွဲ့များ ထိန်းချုပ်ထားသော နယ်မြေများဖြစ်သည်။

အရေးပေါ်အခြေအနေကြေညာသည့် မြိုနယ် ၆၀ မှာ ကချင်ပြည်နယ်တွင် ဆွမ်ပရာဘွမ်၊ ရွှေကူ၊ အင်ဂျန်းယန်၊ ဆော့လော်နှင့် ချီဖွေမြို့နယ်၊ ကယားပြည်နယ်တွင် ရှားတော၊ ဖားဆောင်း၊ မယ်စဲ့၊ ကရင် ပြည်နယ်တွင် ကော့ကရိတ်နှင့် ကြာအင်းဆိပ်ကြီး၊ ချင်းပြည်နယ်အတွင်းရှိ ကန်ပက်လက်၊ ထန်တလန်၊ ပလက်ဝ၊ တွန်းဇံ၊ မင်းတပ်၊ မတူပီနှင့် ဖလမ်းတို့ပါဝင်သည်။

အလားတူ စစ်ကိုင်းတိုင်းရှိ ကောလင်း၊ ပင်လည်ဘူး၊ ခင်ဦး၊ ဝက်လက်၊ ကနီ၊ ဒီပဲယင်း၊ ပုလဲနှင့် အင်းတော်၊ မကွေးတိုင်းရှိ ပေါက်၊ မြိုင်၊ ဆော၊ ထီးလင်းနှင့် ရေစကြို၊ မန္တလေးတိုင်းဒေသကြီးအတွင်းရှိ ငါန်းဇွန်မြို့နယ်၊ ရခိုင်ပြည်နယ်တွင် ရမ်းဗြဲ၊ ပေါက်တော၊ ပုဏ္ဏားကျွန်း၊ ရသေ့တောင်၊ ဂွ ၊ မောင်တော၊ ဘူးသီးတောင်၊ ကျောက်တော်၊ မင်းပြား၊ မြေပုံ၊ မြောက်ဦး၊ သံတွဲ၊ အမ်းနှင့် တောင်ကုတ်တို့ပါဝင်သည်။

ထို့အပြင် ရှမ်းပြည်နယ်အတွင်းရှိ နမ္မတူ၊ မဘိမ်း၊ ကွတ်ခိုင်၊ နမ့်ခမ်း၊ သိန္နီ၊ ကွမ်းလုံ၊ နမ့်ဆန်၊ မန်တုံ၊ ဟိုပန်၊ လောက်ကိုင်၊ ကုန်းကြမ်း၊ မိုးမိတ်၊ ကျောက်မဲ၊ သီပေါနှင့် မိုင်းလားတို့လည်း ပါဝင်နေသည်။

စစ်အုပ်ချုပ်ရေး အမိန့်သည် ဧပြီလ ၂၃ ရက်နေ့မှ ရက်ပေါင်း ၉ဝ အထိ အတည်ဖြစ်ကြောင်း ကြေညာထားသည်။

အကြမ်းဖက် မင်းအောင်လှိုင်က ဧပြီလ ၂၀ ရက်နေ့တွင် ရက်ပေါင်း ၁၀၀ အတွင်း ဇူလိုင်လ ၃၁ ရက်နေ့ နောက်ဆုံးထား၍ EAO တိုင်းရင်းသားလက်နက်ကိုင်များကို ငြိမ်းချမ်းရေး ဖိတ်ခေါ်ထားသော်လည်း တစ်ဖက်တွင်လည်း တိုင်းရင်းသားများ ထိန်းချုပ်ထားသော နယ်မြေများကို စစ်အုပ်ချုပ်ရေး ကြေညာနေခြင်းဖြစ်သည်။

The post KIA ၊ KNU ၊ AA ၊ MNDAA ၊ UWSA ၊ NDAA၊ TNLA အပါအဝင် တိုင်းရင်းသားများနှင့် တော် လှန်ရေးတပ်များ ထိန်းချုပ်ထားသော မြို့နယ် ၆၀ ခုကို အကြမ်းဖက် မင်းအောင်လှိုင်က စစ်အုပ်ချုပ်ရေး ကြေညာ appeared first on Khit Thit Media.

အမျိုးသားညီညွတ်ရေးအစိုးရ-NUGက အကောင်အထည်ဖော်နေသော တရားရေးစီရင်ရေးနှင့် တရားရေးကဏ္ဍ အခြေအနေများနှင့်ပတ်သက်၍ ကုလသမဂ္ဂက NUG တရားရေးဝန်ကြီးဌာနထံသို့ တိုက်ရိုက်ဆက်သွယ် မေးမြန်းလာကြောင်း NUG တရားရေး ဝန်ကြီးဌာန၊ပြည်ထောင်စုဝန်ကြီး ဦးသိန်းဦးက ပြောဆိုသည်။

ဧပြီလ ၁၁ ရက်နေ့ နံနက် ၁၀ နာရီအချိန် ကျင်းပပြုလုပ်ခဲ့သည့် တရားရေးဝန်ကြီးဌာန ပြည်ထောင်စုဝန် ကြီးနှင့် ကြားကာလတရားစီရင်ရေးဆိုင်ရာဦးစီးဌာန မြို့နယ်တရားသူကြီးများ တွေ့ဆုံဆွေးနွေးသည့် အစည်းအဝေးတွင် ၎င်းက အထက်ပါအတိုင်းထည့်သွင်းပြောကြားခဲ့ခြင်းဖြစ်သည်။

လတ်တလော NUG ၏တရားရုံးများတွင် လူသတ်မုဒိမ်းမှုကို သေဒဏ်ချမှတ်သည့် ကိစ္စအပါအဝင် တရားစီရင်ရေးနှင့်ပတ်သက်၍ ကုလ သမဂ္ဂမှ NUG အစိုးရ၊ တရားရေးဝန်ကြီးဌာနထံ တိုက်ခိုက်ဆက်သွယ်မေးမြန်းမှုရှိကြောင်း တရားရေး ဝန်ကြီးဌာန၊ပြည်ထောင်စုဝန်ကြီး ဦးသိန်းဦးက ပြောဆိုသည်။

“ကိုယ့်ဒေသ တရားစီရင်ရေး ပြုလုပ်ရာမှာ ကိုယ့်ဒေသတစ်ခုတည်း အတွက် မဟုတ်ဘဲ အဲဒီ ဆုံး ဖြတ်ချက်က တစ်နိုင်ငံလုံးကို လွှမ်းခြုံပါတယ်၊ နိုင်ငံတကာကိုလည်း ရောက်ရှိတဲ့ ဆုံးဖြတ်ချက်တွေ ဖြစ်ပါတယ်၊ ယခုဆိုရင် လူသတ်မှု သေဒဏ်ချမှတ်တဲ့ကိစ္စနှင့် ပတ်သက်လို့ ကုလသမဂ္ဂက ဝန်ကြီး ဌာနကို တိုက်ရိုက်မေးမြန်းလာတာတွေ ရှိပါတယ်၊ အဲဒီကိစ္စနှင့် ပတ်သက်လို့ ဘယ်ပုံဘယ်နည်း ဆောင်ရွက်လဲကို မေးလာပါတယ်၊ နိုင်ငံတကာအသိုင်းအဝိုင်းကလည်း တရားစီရင်ရေးက အင်မတန် အရေးကြီးတယ်၊ လူထုကို ဘယ်လောက်ထိ အကာအကွယ်ပေးထားသလဲ၊ မတရားမှုတွေကို တရား စီရင်ရေးက မည်မျှအထိ ဟန့်တားထားနိုင်သလဲ၊ မကောင်းမှုတွေကို ခွင့်မပြုဘူးလဲ၊ တနည်းအားဖြင့် ပြောရလျင် ဖြစ်ပေါ်နေတဲ့ အမှုအခင်းတွေနှင့်ပတ်သက်လို့ မိမိတို့က တာဝန်ယူမှု၊ တာဝန်ခံမှုနဲ့ ဘယ် လောက် အခြေ အနေထိ ဆောင်ရွက်နိုင်သလဲဆိုတာကို ပြည်တွင်း သာမက နိုင်ငံတကာကပါ စောင့် ကြည့်လေ့လာနေတဲ့ အနေအထားဖြစ်ပါတယ်” ဟု တရားရေး ဝန်ကြီးဌာန၊ပြည်ထောင်စုဝန်ကြီး ဦးသိန်းဦးက ပြောကြားသည်။

တော်လှန်ရေးနယ်မြေများမှ တရားရေးဝန်ကြီးဌာန၊ တရားသူကြီးများအနေဖြင့် ခိုင်ခိုင်မာမာ၊ ခိုင်ခိုင်မြဲမြဲ လုပ်နိုင်မည်ဆိုပါက တော်လှန်ရေးကြီးတစ်ခုလုံးကို အကျိုးပြုမည်ဖြစ်ကြောင်း၊ သို့သော်လည်း ဆောင်ရွက်ချက်များ အားနည်း၊ ချွတ်ချော် လွဲမှားခြင်းများ ရှိလာပါက တော်လှန်ရေးတစ်ခုလုံးကို ထိခိုက်မည်ဖြစ်ကြောင်း ဆက်လက်၍ အသိပေးထားသည်။

“နောက်ဆုံး အဆုံးအဖြတ်ပေးမှာက ဘယ်လောက် အတိုင်းအတာထိ တရားဥပဒေစိုးမိုးမှု ရှိ/မရှိ၊ တ ရားဥပဒေစိုးမိုးရေးကို ပြဌာန်းဥပဒေနှင့်အညီ ဘယ်လောက်အတိုင်းအတာ အထိ လုပ်နိုင်လဲ/ မ လုပ် နိုင် ဘူးလဲ စသည်ဖြင့် စိန်ခေါ်ချက်တစ်ခု ဖြစ်ပါတယ်၊ အဲဒီ စိန်ခေါ်ချက်ကို ဆောင်ရွက်ရာမှာ တရား သူကြီးတွေ၊ ဥပဒေတာဝန်ခံတွေ၊ အကျဉ်းဦးစီးဝန်ထမ်းတွေနဲ့ ဝန်ကြီးရုံးရှိ ဌာနကြီး ၆ ခုက လည်း ပါဝင်ပတ်သက်ပါတယ်။” ဟု တရားရေး ဝန်ကြီးဌာန၊ပြည်ထောင်စုဝန်ကြီး ဦးသိန်းဦးက ရှင်းပြသည်။

ယခုအခါ ဖက်ဒရယ်ယူနစ် အစိုးရများဖွဲ့စည်းလာပြီဖြစ်သဖြင့် ပြင်ဆင်ထားကြလိုအပ်ပြီး ၄ နှစ်တာ လ တာဝန်ထမ်းဆောင်ခဲ့ကြသည့် မြို့နယ်တရားသူကြီးများထဲမှ အရည်အချင်းအလိုက် ခရိုင်အဆင့်၊ ပြည်နယ်လွှတ်တော် အဆင့်၊ ပြည်နယ်တရုံးချုပ်အဆင့် တာဝန်ထမ်းဆောင်နိုင်မည့်သူများကို ရွေး ချယ် သွားမည်ဖြစ်ကြောင်း၊ အထူးသဖြင့် စစ်ကိုင်းတိုင်းတွင် စတင်နေပြီဖြစ်ပြီး မကွေးတိုင်းတွင် လည်း မကြာမီလုပ်ဆောင်သွားမည်ဖြစ်ကြောင်း NUG အစိုးရ၊ တရားရေးဝန်ကြီးဌာနက ထုတ်ပြန် ထားသည်။

The post NUGက အကောင်အထည်ဖော်နေသော တရားရေးစီရင်ရေးနှင့် တရားရေးကဏ္ဍ အခြေအနေများကို ကုလသမဂ္ဂက တရားရေးဝန်ကြီးဌာနထံသို့ တိုက်ရိုက်ဆက်သွယ် မေးမြန်း appeared first on Khit Thit Media.

အမျိုးသားညီညွတ်ရေးအစိုးရ-NUG နှင့် ပြည်ထောင်စုလွှတ်တော်ကိုယ်စားပြုကော်မတီ-CRPH တို့ကို လမ်းလျှောက်ရင်း လမ်းပျောက်နေသူများဟု အကြမ်းဖက်စစ်တပ်က ဝေဖန်ပြောဆိုလိုက်သည်။

ယနေ့ စစ်တပ်၏ ဝါဒဖြန့် သတင်းစာများတွင် PDF များကို အလင်းဝင်ရန် ဖိတ်ခေါ်သော ကြေညာချက်တွင် အကြမ်းဖက်စစ်တပ်က NUG နှင့် CRPH မှာလမ်းလျှောက်ရင်း လမ်းပျောက်နေသူများက ပြောဆိုလာခြင်းဖြစ်သည်။

အကြမ်းဖက်စစ်တပ်၏ ကြေညာချက်တွင် နိုင်ငံအတွင်း အကြမ်းဖက်မှုများဖြစ်ပွားစေရန် သွေးထိုးလှုံ့ဆော်ပြီး ပြည်ပသို့ ထွက်ပြေးသွားကြသူများသည် ဥပဒေကြောင်းအရ အခြေခံမရှိဘဲ CRPH နှင့် NUG တို့ကို တရားမဝင် ဖွဲ့စည်းခဲ့ကြကာ PDF အမည်ခံအဖွဲ့များကို အသုံးပြု၍ နိုင်ငံတော်ကို ဆန့်ကျင်တိုက်ခိုက်နေခြင်းဖြစ်သည်ဟု ပြောဆိုသည်။

ထို့ပြင် CRPH နှင့် NUG တို့သည် နိုင်ငံရေးအရ ခိုင်မာသည့် ရပ်တည်ချက်မရှိဘဲ ရှေ့နောက်မညီသည့် ထုတ်ပြန်ချက်များ ပြုလုပ်နေကြောင်း ၊ဥပဒေကြောင်းအရ CRPH က ၂၀၀၈ ခုနှစ် ဖွဲ့စည်းပုံအခြေခံဥပဒေကို ဖျက်သိမ်းကြောင်း ကြေညာခဲ့သော်လည်း တစ်ဖက်တွင်မူ ၂၀၂၀ ရွေးကောက်ပွဲရလဒ်အရ တက်လာသည့် တရားဝင်အစိုးရဟု ဆိုနေခြင်းမှာ ကွဲလွဲနေကြောင်း အကြမ်းဖက် စစ်တပ်က ဆိုသည်။

အကယ်၍ ၂၀၀၈ ဖွဲ့စည်းပုံအခြေခံဥပဒေ ပျက်ပြယ်သွားပြီဆိုပါက ယင်းဥပဒေအရ ရွေးချယ်ခံထားရသည့် လွှတ်တော်ကိုယ် စားလှယ်များမှာလည်း အလိုအလျောက် ပျက်ပြယ်သွားမည်ဖြစ်သဖြင့် CRPH နှင့် NUG တို့သည်လည်း တည်ရှိနေနိုင်တော့မည်မဟုတ်ကြောင်း၊ သို့သော် ၎င်းတို့သည် တရားဝင်တည်ရှိနေသည်ဟု ဆိုပြန်လျှင်လည်း ၂၀၀၈ ဖွဲ့စည်းပုံအခြေခံဥပဒေကို အသိ အမှတ်ပြုနေခြင်းပင်ဖြစ်ရာ ယင်းမှာ လမ်းလျှောက်ရင်း လမ်းပျောက်နေသည့် သဏ္ဌာန်ဖြစ်နေကြောင်း အကြမ်းဖက်စစ်တပ်က ထုတ်ပြန်သည်။

ထို့အပြင် ရွေးကောက်ပွဲအစိုးရဟု ဆိုနေသော်လည်း ၂၀၀၈ ဖွဲ့စည်းပုံအခြေခံဥပဒေအရ သတ်မှတ်ထားသည့် အစိုးရသက်တမ်းမှာ ကုန်ဆုံးသွားပြီဖြစ်သဖြင့် မည်သို့ပင် တရားဝင်သည်ဟု ပြောဆိုနေစေကာမူ လက်တွေ့တွင် သက်တမ်းကုန်ဆုံးသွားသည့် အဖွဲ့အစည်းများသာ ဖြစ်သည်ဟု အကြမ်းဖက်စစ်တပ်က ဆက်လက် ဝေဖန်ထားသည်။

အကြမ်းဖက်စစ်တပ်က တိုင်းရင်းသားလက်နက်ကိုင်အဖွဲ့များ-EAO ကို ငြိမ်းချမ်းရေး ဖိတ်ခေါ်ထားသော်လည်း NUG၊ CRPH နှင့် PDF များကို ဖိတ်ခေါ်ခြင်းမပြုဘဲ လက်နက်ချ အလင်းဝင်ရန်သာ ထုတ်ပြန်ပြောဆိုနေခြင်းဖြစ်သည်။

The post အမျိုးသားညီညွတ်ရေးအစိုးရ-NUG နှင့် ပြည်ထောင်စုလွှတ်တော်ကိုယ်စားပြုကော်မတီ-CRPH တို့ကို လမ်းလျှောက်ရင်း လမ်းပျောက်နေသူများဟု အကြမ်းဖက်စစ်တပ်က ပြောဆို appeared first on Khit Thit Media.