ရန်ကုန်၊ ဖေဖော်ဝါရီ ၂၀
ရန်ကုန်တွင် ဖေဖော်ဝါရီလ ၁၉ ရက်နေ့တွင် ပြည်သူ့ကာကွယ်ရေးတပ်များက မှော်ဘီစစ်တပ်ရိပ်သာ၊ ထားဝယ်ချောင်ရဲစခန်း၊ စံပြစျေးအနီး မြ၀တီဘဏ်နှင့်စစ်ကားတို့ကို တိုက်ခိုက်ခဲ့ပြီး ယင်းတိုက်ခိုက်မှုများတွင် စစ်ကောင်စီတပ်ဖွဲ့ဝင် ၁၇ ဦးထက်မနည်းသေဆုံးနိုင်ဟုခန့်မှန်းထုတ်ပြန်ထားသည်။
ဖေဖော်ဝါရီလ ၁၉ ရက်နေ့ ည ၉ နာရီ ၁၀ မိနစ်အချိန် မှော်ဘီမြို့နယ် ၊ တပ်ကြီးကုန်းအပိုင်၊ ဆပ်ပလိုင်းအနီး GE တပ်ရင်း အရာရှိရိပ်သာအတွင်း အရာရှိများစုဝေးထိုင်ပြီးအရက်သောက်နေကြချိန် အချိန်တွင် လက်ပစ်ဗုံးဖြင့်ပစ်သွင်း၍တိုက်ခိုက်ခဲ့ရာ စစ်ကောင်စီတပ်ဖွဲ့ဝင်အရာရှိ ၃ ဦးထက်မနည်း ဒဏ်ရာပြင်းထန်စွာရရှိခဲ့ပြီး ကျဆုံးမှုရှိ၊ မရှိ အတည်မပြုနိုင်သေးကြောင်း ထုတ်ပြန်သည်။
အလားတူ ဖေဖော်ဝါရီလ ၁၉ ရက်နေ့ ည ၉ နာရီ ၂၀ မိနစ်အချိန် သင်္ဃန်းကျွန်း မြို့နယ်၊ စံပြစျေးအနီး၊ လေးထောင့်ကန်လမ်းမကြီးနှင့်သံသုမာလမ်းထောင့် မြဝတီဘဏ်တွင် တပ်စွဲထားသော စစ်ကောင်စီတပ်ဖွဲ့ဝင်များကို အဝေးထိန်းဗုံး၊ လက်ပစ်ဗုံးတို့ဖြင့် ဖောက်ခွဲတိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၅ ကျဆုံးပြီး ၂ ဦး ဒဏ်ရာရရှိကြောင်း သိရှိရသည်။
ယမန်နေ့ညပိုင်းတိုက်ခိုက်မှု ၂ ခုကို အဆပလ – ACPLF – အဖွဲ့၊ မှော်ဘီတော် လှန်ရေးအင်အားစု Hmawbi Revolutionary Force၊ Yangon People’s Defense Force (Bahan) တို့ပူးပေါင်းတိုက်ခိုက်ခြင်းဖြစ်ကြောင်း သိရှိရသည်။
အလားတူ ဖေဖော်ဝါရီလ ၁၉ ရက်နေ့ ည ၇ နာရီအချိန် Spring Brothers force နှင့် People’ force တို့က မြောက်ဒဂုံ၊ ထားဝယ်ချောင် ရဲစခန်းကို ၄၀ မမ နှစ်လုံးဖြင့် တိုက်ခိုက်ခဲ့ကြောင်း၊ စစ်ကူရောက်ရှိလာသော စစ် ကားတန်းကို ည ၇ နာရီ ၂၀ မိနစ်အချိန် တွင် ၄၀ မမ ၁လုံး၊အဝေးထိန်းဗုံး ၄လုံး ဖြင့်ထပ်မံတိုက်ခိုက်ခဲ့ကြောင်း ကားတစ်စီး ပျက်စီး ပြီး စစ်သား ၁၀ ဦးခန့် သေဆုံးနိုင်ဟု ခန့်မှန်းထုတ်ပြန်သည်။
ထို့ပြင် ဖေဖော်ဝါရီလ ၁၉ ရက်နေ့ မွန်းလွဲ ၁ နာရီဝန်းကျင် ရန်ကုန်တိုင်း၊ သာကေတမြို့နယ် မြင်တော်သာလမ်းမပေါ်တွင် ကင်းလှည့်နေသော စစ်ကောင်စီတပ်ဖွဲ့၏ ယာဉ်တစ်စီးကို လက်ပစ်ဗုံးဖြင့် ပစ်ခတ်ပြီး သေနတ်များဖြင့် ပစ်ခတ်သဖြင့် ရဲ ၂ ဦး ဒဏ်ရာအပြင်းအထန် ရရှိပြီး သေဆုံးဖွယ်ရှိကြောင်း ဒေသခံများက ပြောဆိုထားသည်။
ဓာတ်ပုံ- အကြမ်းဖက်စစ်ကောင်စီတပ်ဖွဲ့ဝင်များ။
Photo – AFP
