ရန်ကုန်၊ ဧပြီ ၁၃
ကချင်ပြည်နယ်၊ မြို့တော်မြစ်ကြီးနားမြို့တွင် ခရိုင်ကြံ့ဖွတ်ရုံး ယနေ့ နံနက် ၁၁ နာရီခွဲတွင် ဗုံးပေါက်ကွဲပြီး ကားတချို့ပျက်စီးသွားကြောင်း သိရှိရသည်။
ဧပြီလ ၁၃ ရက်နေ့ သင်္ကြန်အကြိုနေ့တွင် စစ်ကောင်စီ၏ မြစ်ကြီးနား လမ်းလျှောက်သင်္ကြန်မုခ်ဦးကို မီးရှို့မှု ဖြစ်ပွားခဲ့သည်။
မြစ်ကြီးနားတစ်မြို့လုံးရှိ ပြည်သူများက စစ်ကောင်စီ၏ သင်္ကြန်တွင် ပါဝင်ခြင်းမပြုဘဲ သပိတ်မှောက် တော်လှန်နေကြသည့်အတွက် တစ်မြို့လုံး ရေပက်မည့်သူ ၊ ရေပက်ခံမည့်သူမရှိဘဲ တိတ်ဆိတ်ခြောက်ကပ်လျက်ရှိကြောင်း ဒေသခံများထံမှ သိရှိရသည်။
“မြစ်ကြီးနားမှာ မဏ္ဍပ်က ပြည်နယ်အစိုးရရုံးရှေ့နဲ့ မြို့တော်ခန်းမရှေ့ နှစ်ခုပဲရှိတယ်။ အဲဒါလည်း သူတို့ဟာ သူတို့ စစ်ခွေးတွေ ကနေကြတာ။ ကတာ ၂၀ လောက် လုံခြုံရေးက ၅၀ ၊ ၆၀ လောက်ရှိတယ်။ လမ်းဆုံလမ်းခွတိုင်းမှာလည် စစ်ခွေး ရဲခွေးတွေချည်းပဲ။ ပြည်သူတွေက ဘယ်သူမှ ရေမပက်ဘူး၊ ရေပက်ခံ မထွက်ဘူး။ တော်လှန်သင်္ကြန်ဆင်နွှဲနေကြတာ” ဟု မြစ်ကြီးနားဒေသခံတစ်ဦက ပြောဆိုသည်။
