ရန်ကုန်၊ ဧပြီ ၂၄
စစ်ကိုင်းတိုင်း ၊ ခင်ဦးမြို့နယ် ရွာသာရွာကို အကြမ်းဖက်စစ်ကောင်စီဝင်များ ဧပြီလ ၂၃ ရက်နေ့ နံနက်အစောပိုင်းတွင် PDF အယောင်ဆောင်ကာ ဝင်ရောက်ပြီး ပြည်သူများ နေအိမ် ၆၂ လုံးကို မီးရှို့ဖျက်ဆီးသွားပြီး ပြည်သူတစ်ဦးကို သေနတ်ဖြင့် ပစ်သတ်ခြင်းနှင့် ဓားစာခံဖမ်းဆီးထားသူ တစ်ဦးကို ခေါင်းဖြတ်သတ်ခြင်းတို့ ပြုလုပ်ခဲ့ကြောင်း ဒေသခံများက ရန်ကုန်ခေတ်သစ်သို့ ပြောကြားသည်။
စစ်တပ်၏ ရက်စက်စွာ သတ်ဖြတ်ခြင်းခံရသူ ၂ ဦးမှာ ကိုအောင်နိုင်စိုးနှင့် ကိုငြိမ်းကျော်တို့ဖြစ်ကြောင်း သိရှိရသည်
“မနက် ဝေလီဝေလင်းအချိန်မှာ PDF ပုံစံနဲ့ ဝင်လာတာ။ ကျွန်တော်တို့ကလည်း ရွာထဲက ခါတိုင်းလို ကင်းလှည့်တယ် ထင်တာ။ နောက်မှ သေနတ်ပုံတွေ မတူမှ ပြေးကြရတာ။ အင်အား ၄၀ လောက်ပဲ။ ရွာတွေထဲ ဝင်မွှေကြတာ။ အိမ်ခြေ ၆၂ လုံး ရှို့သွားတာပဲ ။ အိမ်ကြီး အိမ်ကောင်းက များတယ် ” ဟု ဒေသခံတစ်ဦးက ပြောကြားသည်။
စစ်တပ်က နေအိမ်ရှိပစ္စည်းများကို ပြန်ယူရန် ပြန်မောင်းလာသည့် ကိုအောင်နိုင်စိုးကိုလည်း နောက်ကျောဘက်မှ သေနတ်နှင့် ပစ်သတ်ခံရခဲ့ကြောင်း ဒေသခံများထံမှ သိရှိရသည်။
ထို့ပြင် စစ်တပ်က ဓားစာခံအဖြစ် ကိုငြိမ်းကျော်ကို ဖမ်းဆီးပြီး ဓားဖြင့် လည်ပင်းဖြတ်ကာ သတ်ခဲ့ကြောင်း ဒေသခံများက ပြောကြားသည်။
“ကိုအောင်နိုင်စိုးကို အစက ကြောက်လန့်ပြီး တက်သေတယ် မှတ်တာ။ ကျည်က ပေါက်ထွက်မသွားဘူး။ လူကလည်း ဝတော့ နောက်မှ နောက်ကျောဘက်ကနေ သွေးတွေ စိမ့်ထွက်လာမှ သေနတ်နဲ့ ပစ်လိုက်မှန်း သိတာ။ ကိုငြိမ်းကျော်က ရွာအကြောင်း ဘာမှ မသိဘူး ။ လနဲ့ချီရှိပြီ ရွှေတောဘက် သွားလုပ်နေတာ။ အဲဒါ သူ့ကို ဖမ်းမိပြီး လက်မောင်းတွေကို Gas မီးနဲ့ မှုတ်တယ်။ သူ့ရဲ့ အသားကို ထိလိုက်ရင်ကို အရေခွံတွေ ကွာလိုက်နေတာ။ ပုခုံးကိုလည်း ဓားချွန်နဲ့ ထောက် ထားတာ တွေ့တယ်။ နားထင်ကိုလည်း ထုထားပုံရတယ် ချိုင့်နေတယ်။ အဲလိုတွေ ဖြစ်ပြီးမှ ဇက်ဖြတ်ပုံရတယ်” ဟု ဒေသခံတစ်ဦးက မတရား သတ်ဖြတ်ခံရသူများ၏ ဖြစ်စဉ်ကို ပြောပြသည်။
လက်ရှိအချိန်အထိ ရွာသာရွာတွင် အကြမ်းဖက် စစ်ကောင်စီများ ရှိနေဆဲ ဖြစ်ပြီး ထပ်တိုးအင်အား ၂၀၀ ဝန်းကျင်ခန့် ချီတက်လာသည်ကို တွေ့ရကြောင်း၊ ကျေးရွာမှ ပြည်သူများ ထွက်ပြေးပုန်းရှောင်ကြကြောင်း ဒေသခံများထံမှ သိရှိရသည်။
