ဆားလင်းကြီး၊ ထန်းတောဆိပ်ရွာကို စစ်တပ်က မီးတင်ရှို့နေပြီး ကျေးရွာ ၁၀ ရွာကျော်မှ သောင်းနှင့်ချီသော ပြည်သူများ ဘေးလွတ်ရာသို့ ထွက်ပြေးတိမ်းရှောင်နေရ
ရန်ကုန်၊ ဧပြီ ၂၇
စစ်ကိုင်းတိုင်း၊ ဆားလင်းကြီးမြို့နယ်၊ ထန်းတောဆိပ်ရွာကို အကြမ်းဖက် စစ်တပ်က မီးတင်ရှို့နေကြောင်း ဒေသပြည်သူများက ရန်ကုန်ခေတ်သစ် မီဒီယာသို့ ပြောဆိုသည်။
ဧပြီလ ၂၇ ရက်နေ့ မွန်းလွဲ ၃ နာရီခန့်တွင် အကြမ်းဖက် စစ်တပ်က ဆားလင်းကြီးမြို့နယ်၊ ထန်းတောဆိပ်ရွာကို ဝင်ရောက် စီးနင်း မီးရှို့နေခြင်းဖြစ်ကြောင်း၊ ထို့ပြင် ကျေးရွာပေါင်း ၁၀ ရွာကျော်မှ သောင်းနှင့်ချီသော ပြည်သူများသည် ဘေးလွတ်ရာသို့ ထွက်ပြေး တိမ်းရှောင် နေရကြောင်း သိရသည်။
” ချင်းတွင်းမြစ် အနောက်ဘက်ကမ်း ညောင်ပင်ကြီးရဲစခန်းနားက ထန်းတောဆိပ်ရွာကို စစ်ခွေးတွေ ဝင်ရောက် စီးနင်းပြီး မီးတင်ရှို့နေတယ်။ ခုထိတော့ မီးမငြိမ်းသေးဘူး။ ကျေးရွာ ၁၀ ရွာက သောင်းနဲ့ချီတဲ့ ပြည်သူတွေ ဘေးလွတ်ရာကို ထွက်ပြေး တိမ်းရှောင်နေရတယ်” ဟု ပြည်သူ တစ်ဦးကပြောဆိုသည်။
