ဆီဆိုင်မြို့ကို စစ်တပ်က ဒရုန်း၊ လက်နက်ကြီး အလုံး ၁၀၀ ကျော် အပါအဝင် ဓာတုအဆိပ်ဗုံးပါ ကျဲချ တိုက်ခိုက်မှု နေအိမ် ၁၀ လုံးကျော် ပျက်စီး
ရန်ကုန်၊ မတ် ၉
ရှမ်းပြည်နယ်တောင်ပိုင်း၊ ဆီဆိုင်မြို့ကို အကြမ်းဖက် စစ်တပ်က ဒရုန်း၊ လက်နက်ကြီး အလုံး ၁၀၀ ကျော် အပါအဝင် ဓာတုအဆိပ်ဗုံးပါ ကျဲချ တိုက်ခိုက်မှု နေအိမ် ၁၀ လုံးကျော် ပျက်စီးခဲ့ကြောင်း PNLA သတင်းနှင့်ပြန်ကြားရေးဌာနက ထုတ်ပြန်သည်။
ယမန်နေ့ မတ်လ ၈ ရက်နေ့တွင် ဆီဆိုင်မြို့ကို အကြမ်းဖက်စစ်ကောင်စီတပ်က လက်နက်ကြီး၊ ဒရုန်းများ ကို အသုံးပြုပြီး အကြိမ် ၁၀၀ ကျော် ပစ်ခတ်တိုက်ခိုက်ခဲ့သည့်အပြင် ဓာတုအဆိပ်ငွေ့ဗုံး ၁ လုံးကို လည်း ဒရုန်းဖြင့် ကျဲချတိုက်ခိုက်ခဲ့ကြေင်း သိရသည်။
ထိုသို့ လက်နက်ကြီး၊ ဒရုန်းများဖြင့် ဗုံးကျဲတိုက်ခိုက်မှုကြောင့် ဆီဆိုင်မြို့တွင်းရှိ ပြည်သူလူထု၏ နေအိမ် ၁၀ အိမ်ခန့် ထိခိုက်ပျက်စီးခဲ့ရသည့်အပြင် ဓာတုအဆိပ်ငွေ့ဗုံးကြောင့် PNLA ရဲဘော်များ နှာခေါင်းသွေးယိုစီးခြင်း၊ အရေပြားယားယံခြင်း ၊ မူးဝေခြင်း၊ အသက်ရှူမြန်ဆန်ခြင်း၊ မအီမသာ ခံစားရခြင်း၊ စိတ်လှုပ်ရှားမှု မြန်ဆန်ခြင်း၊ မောပန်းခြင်းနဲ့ အောက်စီဂျင်ကျခြင်းများကို ပုံစံတူ ခံစားခဲ့ ကြရကြောင်း သိရသည်။
ဓာတုအဆိပ်ငွေ့မိသည့် ရဲဘော်များနှင့် ပြည်သူများကို ဆေးဝါးကုသပေးနေရဆဲဖြစ်ကြောင်း၊ မတ်လ ၆ ရက်နေ့ကလည်း ဆီဆိုင်မြို့ကို အကြမ်းဖက်စစ်တပ်က ဓာတုအဆိပ်ငွေ့ဗုံးကျဲချတိုက်ခိုက်ခဲ့ပြီး ယခုသည် ၂ ကြိမ်မြောက် အဆိပ်ငွေ့ဗုံးအသုံးပြုကာ တိုက်ခိုက်ခဲ့ခြင်းဖြစ်ကြောင်းသိရသည်။
ယမန်နေ့မတ်လ ၈ ရက်နေ့တွင် ဟိုပုံးမြို့နယ် မဲနယ်တောင်ဒေသ ကျောက္ကဆားကျေးရွာကို စစ် ကောင်စီမှ ဂျက်ဖိုက်တာဖြင့် ၂ ကြိမ် ဗုံးကျဲတိုက်ခိုက်ခဲ့ရာ ဒေသနေပြည်သူ ဦးခွန်ထွန်း ထိခိုက် သေဆုံးခဲ့ပြီး နေအိမ် ၆ အိမ်ထက်မနည်းလည်း ထိခိုက်ပျက်စီးခဲ့သည်။
