စစ်ကောင်စီ၏ ဖိတ်ခေါ်မှုဖြင့် ရုရှားက ရင်းနှီးမြှုပ်နှံရန် ရှိနေသည့် ထားဝယ်ရေနက် စီမံကိန်းကြောင့် တရုတ်အတွက် ကြီးမားသော စိတ်အနှောင့်အယှက် ဖြစ်နေ

စစ်ကောင်စီ၏ ဖိတ်ခေါ်မှုဖြင့် ရုရှားက ရင်းနှီးမြှုပ်နှံရန် ရှိနေသည့် ထားဝယ်ရေနက် စီမံကိန်းကြောင့် တရုတ်အတွက် ကြီးမားသော စိတ်အနှောင့်အယှက် ဖြစ်နေ

ရန်ကုန်၊ မေ ၁၉

ထားဝယ်ရေနက်ဆိပ်ကမ်းအတွက် ဖြစ်နိုင်ခြေလေ့လာမှုကို ယခင်က တရုတ်က လုပ်ဆောင်ခဲ့ဖူးသော်လည်း အိန္ဒိယက တည်ဆောက်ထားသော စစ်တွေဆိပ်ကမ်းအနီးရှိ ကျောက်ဖြူရေနက်ဆိပ်ကမ်းသို့ ၎င်းက အာရုံစိုက်ခဲ့သည်။

မကြာသေးမီက မြန်မာနိုင်ငံသည် ထားဝယ် ရေနက်ဆိပ်ကမ်း တည်ဆောက်ရေး အတွက် ရုရှားကို ရွေးချယ်ခဲ့ပြီး ယင်းဆုံးဖြတ်ချက်က ထားဝယ်ရေနက်ဆိပ်ကမ်းကို စိတ်ဝင်စားနေသော တရုတ်နှင့် ဆက်ဆံရေး တင်းမာစေမှုများဖြစ်ပေါ်လာစေသည်။

ဆိပ်ကမ်းသည် ထိုင်းနိုင်ငံနှင့် ထိစပ်နေသော မြန်မာနိုင်ငံ၏ အရှေ့ဘက်ကမ်းရိုးတန်းတွင် တည်ရှိပြီး အဆိုပါ စီမံကိန်းကို ထိုင်းနှင့် မြန်မာ အစိုးရတို့ ပူးပေါင်းပိုင်ဆိုင်သည့် နှစ်နိုင်ငံ စီးပွားရေး ပူးပေါင်းဆောင်ရွက်ရေး စီမံကိန်းအဖြစ် ၂၀၀၈ ခုနှစ်တွင် စတင်ခဲ့သည်။

ထားဝယ်ရေနက်ဆိပ်ကမ်း စီမံကိန်းနှင့် ပတ်သက်၍ မြန်မာနှင့် ရုရှားကြား ဆွေးနွေးမှုများ ပြုလုပ်နေပြီး တရုတ်၏ သြဇာလွှမ်းမိုးမှုကို တန်ပြန်ရန်အတွက် မော်စကိုနှင့် ဆက်ဆံရေး ခိုင်မာစေရန် စစ်ကောင်စီက ကြိုးပမ်းလျက်ရှိသည်။

စီမံကိန်းအတွက် အဆိုပြုထားသော အစီအစဉ်များတွင် တန်ချိန် ၁၀ သန်းရှိ ဆိပ်ကမ်းတစ်ခု တည်ဆောက်ခြင်းနှင့် တစ်နေ့လျှင် စည်ပေါင်း ၁၀၀,၀၀၀ ထုတ်လုပ်နိုင်သည့် ရေနံချက်စက်ရုံတစ်ခု တည်ဆောက်ခြင်းလည်း ပါဝင်သည်။

မြန်မာနိုင်ငံ ဆိပ်ကမ်းကဏ္ဍတွင် ရုရှား၏ ပါဝင်ပတ်သက်လာခြင်းက ကျောက်ဖြူမြို့ရှိ ၎င်း၏ ကိုယ်ပိုင် ပရောဂျက်များကို ထိခိုက်စေနိုင်ပြီး ဒေသတွင်း ကမ္ဘာ့ကုန်သွယ်ရေး အရှိန်အဟုန်ကို ထိခိုက်စေနိုင်သည်ဟု တရုတ်နိုင်ငံက စိုးရိမ်လျက်ရှိသည်။

မော်စကိုနှင့် ၎င်း၏ ဆက်ဆံရေးကို မြှင့်တင်ရန် ကြိုးပမ်းနေသည့် စစ်ကောင်စီက ဆိပ်ကမ်းစီမံကိန်းအတွက်သာမက ရေနံချက်စက်ရုံ အပါအဝင် အထူးစီးပွားရေးဇုန်အတွက် ရုရှားရင်းနှီးမြှုပ်နှံမှုကို တက်ကြွစွာ လိုက်ရှာနေသည်။

ထားဝယ်ရေနက်ဆိပ်ကမ်းအတွက် ဖြစ်နိုင်ခြေလေ့လာမှုကို ယခင်က တရုတ်က လုပ်ဆောင်ခဲ့ဖူးသော်လည်း အိန္ဒိယမှ တည်ဆောက်ထားသော စစ်တွေဆိပ်ကမ်းအနီးရှိ ကျောက်ဖြူရေနက်ဆိပ်ကမ်းသို့ အာရုံစိုက်ခဲ့သည်။ ရုရှားဘက်သို့ စစ်ကောင်စီ၏မျက်နှာသာပေးမှုက တရုတ်ကို ဒေါသ ထွက်စေသည်ဟု သတင်းများ ထွက်ပေါ်နေပြီး ထားဝယ်စီမံကိန်းတွင် ရုရှား၏ ပူးပေါင်းပါဝင်မှုကို တရုတ်ကို ဘေးဖယ်ထားသည်ဟု ကျွမ်းကျင်သူများက သုံးသပ်ကြသည်။

ထားဝယ်ဆိပ်ကမ်း၏ မဟာဗျူဟာမြောက် အရေးပါမှု

———————————————————–

ကပ္ပလီပင်လယ်ပြင်တစ်လျှောက် မြန်မာ့အရှေ့ဘက်ကမ်းရိုးတန်းရှိ တနင်္သာရီတိုင်းဒေသကြီးတွင် တည်ရှိသည့် ထားဝယ်ဆိပ်ကမ်းသည် မဟာဗျူဟာအရ အရေးပါသော အချက်ဖြစ်သည်။ မဲခေါင်မြစ်ဝှမ်းဒေသ (GMS) နိုင်ငံများသို့ ဝင်ပေါက်အဖြစ် ဆောင်ရွက်လျက် ရှိပြီး ဘန်ကောက်နှင့် နီးကပ်သောကြောင့် ထိုင်းနိုင်ငံ၏ ကွန်တိန်နာ ကုန်သွယ်ခြင်းအတွက် အရေးပါသော ဆိပ်ကမ်း ဖြစ်လာနိုင်ခြေရှိသည်။

ယင်းစီမံကိန်း ပြီးစီးပါက ထားဝယ်သည် အရှေ့တောင်အာရှ၏ အရေးကြီးသော ဆိပ်ကမ်းများထဲမှ တစ်ခု ဖြစ်လာမည်ဖြစ်သည်။ မလက္ကာရေလက်ကြားကို ဖြတ်သန်းစရာမလိုဘဲ အိန္ဒိယသမုဒ္ဒရာ၊ အရှေ့အလယ်ပိုင်း၊ ဥရောပနှင့် အာဖရိကနိုင်ငံများသို့ ချိတ်ဆက်ပေးမည်ဖြစ်သည်။ နှစ်စဉ် ကုန်စည်စီးဆင်းမှု မက်ထရစ်တန် ၁၀၀ ကျော်ကို ကိုင်တွယ်နိုင်စွမ်းရှိမည်ဖြစ်သည်။

မြန်မာနိုင်ငံတွင် ရုရှား၏ ပါဝင်ပတ်သက်မှုသည် စီးပွားရေးနှင့် ကာကွယ်ရေး ပူးပေါင်းဆောင်ရွက်မှုထက် ကျော်လွန်နေသည်။ ၎င်းသည် နှစ်နိုင်ငံအကြား သန်းနှင့်ချီ၍ တန်ဖိုးရှိသော သဘောတူညီချက်များနှင့်အတူ စစ်ရေးလေ့ကျင့်မှုနှင့် ကိရိယာများ ထောက်ပံ့ပေးခြင်းအထိ တိုးချဲ့ဆောင်ရွက်မည်ဖြစ်သည်။

ရုရှားက စနိုက်ပါနှင့် ဒရုန်းလေ့ကျင့်ရေးတွင် အကူအညီပေးထားပြီး မြန်မာနိုင်ငံသို့ အသေးစား မော်ဂျူလာ ဓာတ်ပေါင်းဖိုများ ပေးအပ်ရန် စဉ်းစားနေကြောင်း Economic Times က ဖော်ပြသည်။

ထို့ပြင် မြန်မာနိုင်ငံနှင့် ရုရှားနိုင်ငံတို့၏ ပူးပေါင်းဆောင်ရွက်မှုသည် နျူကလီးယားနည်းပညာဆိုင်ရာ သတင်းအချက်အလက်စင်တာကို ရန်ကုန်မြို့တွင် ဖွင့်လှစ်နိုင်ခဲ့သည်။

အိန္ဒိယအတွက် အကျိုးဖြစ်ထွန်းမှု

—————————————

မြန်မာနိုင်ငံ၏ အခြေခံအဆောက်အအုံနှင့် စွမ်းအင်စီမံကိန်းများတွင် ရုရှားပါဝင်လာခြင်းကို အိန္ဒိယအနေဖြင့် တရုတ်နိုင်ငံပါဝင်နေမှုထက် ပို၍ နှစ်သက်နိုင်သည်။

မြန်မာနှင့် ရုရှားအကြား ပူးပေါင်းဆောင်ရွက်မှုက ဘင်္ဂလားပင်လယ်အော် လုံခြုံရေးအတွက် ကာလကြာရှည် အထူးအာရုံစိုက်နေရသည့် အိန္ဒိယအတွက် အကျိုးရှိစေမည်ဖြစ်သည်။

(Swarayja တွင်ဖော်ပြထားသည့် China’s Frustration Grows As Myanmar Seeks Russian Partnership For Dawei Strategic Port Project ကို ဆီလျှော်အောင် ဘာသာပြန်ဆိုထားပါသည်။)