နောင်ချိုနှင့် မိုးကုတ်တို့တွင် တိုက်ပွဲများ ဆက်လက် ပြင်းထန်နေပြီး စစ်သား အလောင်း ၂၀ နှင့် လက်နက်ခဲယမ်းများ သိမ်းဆည်းရရှိ
ရန်ကုန်၊ ဇူလိုင် ၂၂
ရှမ်းပြည်နယ်၊ နောင်ချိုမြို့နယ်နှင့် မန္တလေးတိုင်း၊ မိုးကုတ်မြို့နယ်တို့တွင် တိုက်ပွဲများ ဆက်လက် ပြင်းထန်နေပြီး အကြမ်းဖက် စစ်သား အလောင်း ၂၀ နှင့် လက်နက်ခဲယမ်းများ သိမ်းဆည်းရရှိခဲ့ကြောင်း TNLA က ပြောဆိုသည်။
မိုးကုတ်မြို့ (အရှေ့ပိုင်း) ပန်မထိပ်ရွာအနီးနှင့် အကျဉ်းထောင်ရှိ အကြမ်းဖက် စစ်တပ်စခန်းကို တအာင်းအမျိုးသား လွတ်မြောက်ရေးတပ်မတော် TNLA နှင့် PDF (မိုးကုတ်ဗျူဟာ) ပူးပေါင်းတပ်ဖွဲတို့က တိုက်ခိုက် သိမ်းပိုက်လိုက်ပြီး အကြမ်းဖက် စစ်သား အလောင်း ၂၀ နှင့် လက်နက်ခဲယမ်းများ သိမ်းဆည်းရရှိခဲ့ကြောင်း သိရသည်။
ယင်း တိုက်ပွဲအတွင်း အကြမ်းဖက် စစ်တပ်ထံမှ လက်နက်ငယ် ၅ လက်၊ ဒရုန်း ၁ စီးနှင့် အခြား စစ်အသုံးအဆောင်ပစ္စည်းများသိမ်းဆည်းရမိခဲ့ခြင်းဖြစ်ကြောင်း သိရှိရသည်။
အလားတူ နောင်ချိုမြို့နယ်တွင်လည်း အကြမ်းဖက် စစ်တပ် စခန်းများကို တအာင်းအမျိုးသား လွတ်မြောက်ရေး တပ်မတော် TNLA နှင့် MDY-PDF ပူးပေါင်းတပ်ဖွဲ့များက ဆက်လက် တိုက်ခိုက်ပြီး တိုက်ပွဲဖြစ်ပွားလျက်ရှိကြောင်း သိရသည်။
ဇူလိုင် ၂၂ ရက်နေ့ မွန်းလွဲ ၁ နာရီ ၁၁ မိနစ်ခန့်တွင် နောင်ချိုမြို့နယ် တဲခေါ်ရွာရှိ အကြမ်းဖက် စစ်ကောင်စီ တပ်စခန်းများကို ထိုးစစ်ဆင်တိုက်ခိုက်ခြင်းဖြစ်ကြောင်း၊ ထို့ပြင် ကျောက်မဲမြို့နယ်ရှိ အေးရှားဝေါဂိတ်နှင့် နမ့်ဆီလင်းဘုန်းကြီးကျောင်းတွင် တပ်စွဲထားသော အကြမ်းဖက် စစ်ကောင်စီ တပ်သားများကိုလည်း တအာင်းတပ်မတော် TNLA တပ်ဖွဲက လိုက်လံရှင်းလင်းရာ တိုက်ပွဲဖြစ်ပွားခဲ့ကြောင်း သိရှိရသည်။
