လားရှိုးမြို့ကို လျှပ်စစ် ဓာတ်အား ပြန်လည် ပေးဝေနိုင်ရန် 33KV ပင်မလိုင်းအား ပြုပြင်ခြင်း၊ ဓာတ်တိုင်များ အစားထိုးခြင်းနှင့် ဗို့အားမြင့်လိုင်းများ ပြန်လည် သွယ်တန်းခြင်းများ MNDAA က လုပ်ဆောင်နေ
ရန်ကုန်၊ ဩဂုတ် ၂၉
ရှမ်းပြည်နယ်၊ လားရှိုးမြို့ကို လျှပ်စစ် ဓာတ်အား ပြန်လည် ပေးဝေနိုင်ရန် 33KV ပင်မလိုင်းအား ပြုပြင်ခြင်း၊ ဓာတ်တိုင်များ အစားထိုးခြင်းနှင့် ဗို့အားမြင့်လိုင်းများ ပြန်လည် သွယ်တန်းခြင်းများ MNDAA က လုပ်ဆောင်နေကြောင်း သိရသည်။
လားရှိုးတိုက်ပွဲ အပြီးတွင် ပြည်ထောင်စုမြန်မာနိုင်ငံ၏ အထူးဒေသ (၁) အုပ်ချုပ်မှုကော်မတီသည် စစ်ပြီးခေတ် လားရှိုးတွင် ပြန်လည် ထူထောင်ရေးလုပ်ငန်းများ စတင်ရန်အတွက် လုပ်ငန်းအဖွဲ့ကို ချက်ချင်း ဖွဲ့စည်းခဲ့ကြောင်း၊ ယခင်စစ်ဒဏ်ကြောင့် လားရှိုးမြို့ လျှပ်စစ်ဓာတ်အား ပေးဝေမှုစနစ်သည် လက်ရှိတွင် ပြတ်တောက်နေပြီး ဓာတ်အားပြန်လည်ရရှိရေးသည် စစ်ပြီးခေတ် ပြန်လည်တည်ဆောက်ရေး အတွက် ထိပ်တန်းဦးစားပေး လုပ်ငန်းတစ်ခု ဖြစ်လာကြောင်း သိရှိရသည်။
လတ်တလောတွင် လားရှိုးမြို့ လျှပ်စစ်ဓာတ်အား အမြန်ဆုံး ပြန်လည်ရရှိရေးနှင့် လားရှိုးမြို့ ပြည်သူများ၏ လျှပ်စစ်ဓာတ်အား လိုအပ်ချက်နှင့် ကိုက်ညီစေရန် အတွက် အထူးဒေသ ၁ ရေနှင့် လျှပ်စစ် ကုမ္ပဏီမှ ဝန်ထမ်း ၁၀ ဦးကို လားရှိုးမြို့မှ ဒေသ ဝန်ထမ်းများနှင့် လားရှိုးမြို့တွင် 33KV ပင်မလိုင်းကို ပြုပြင်ရန် ပူးပေါင်းဆောင်ရွက်နေကြောင်း၊ အိုမင်းပျက်စီးသွားသော တိုင်များကိုလည်း အစားထိုးပြီး ဗို့အားမြင့်လိုင်းများ ပြန်လည် သွယ်တန်းပေးမည်ဖြစ်ကာ သက်ဆိုင်ရာ လုပ်ငန်းများကို ရက်အနည်းငယ်အတွင်း ပြီးစီးနိုင်မည်ဖြစ်ကြောင်း သိရသည်။
ထို့ပြင် လျှပ်စစ် ဓာတ်အားရရှိရေး အပြည့်အဝ အာမခံရန်အတွက် ရေအားလျှပ်စစ် ကုမ္ပဏီမှ အနည်အနှစ် စွန့်ထုတ်မှု၊ ရေလမ်းကြောင်း သန့်ရှင်းရေးနှင့် နန်မဲချောင်း အဆင့် ၂ ရေအား လျှပ်စစ်စခန်းအတွက် တာဘိုင်စမ်းသပ်လည်ပတ်ခြင်းစသည့် ပဏာမပြင်ဆင်မှုများကို ဆောင်ရွက်သွားမည်ဖြစ်ကြောင်း သိရှိရသည်။
အထူးဒေသ ရေအားလျှပ်စစ် ကုမ္ပဏီမှ ဓာတ်အားလိုင်းများ ပြုပြင်ခြင်း ပြီးစီးပါက မကြာမီ လားရှိုးမြို့ လျှပ်စစ်ဓာတ်အား ပြန်လည်ရရှိမည်ဖြစ်ကာ ပြုပြင်နေသည့် ကာလအတွင်း လားရှိုး ပြည်သူများအနေဖြင့် ၎င်းတို့၏ အိမ်တွင်းရှိ ဓာတ်ကြိုးများ နှင့် Circuit Breaker များကို စစ်ဆေး ပြီး ပြင်ဆင်သင့်ကြောင်း၊ ပြတ်တောက်နေသည့် ဝါယာကြိုးများကဲ့သို့သော ပြဿနာများရှိပါက လျှပ်စစ်ဖွင့်ပြီးနောက် မလိုလားအပ်သော မတော်တဆမှုများ မဖြစ်စေရန် ၎င်းတို့အား အချိန်မီ အစားထိုးပြင်ဆင် သင့်ကြောင်း MNDAA က သိပေးထားသည်။
 အုပ်ချုပ်မှုကော်မတီသည် စစ်ပြီးခေတ် လားရှိုးတွင် ပြန်လည် ထူထောင်ရေးလုပ်ငန်းများ){kind=link}