စစ်ကောင်စီ၏ ပိတ်ပင်အရေးယူမှုများ ရှိနေသော်လည်း ဘန်ကောက်တွင် ၂၀၂၄ ခုနှစ် ပထမ ၆ လအတွင်း မြန်မာနိုင်ငံသားများက ထိုင်းဘတ်ငွေ ၃ ဒသမ ၂၄ ဘီလီယံတန်ဖိုးရှိ ကွန်ဒိုအခန်းပေါင်း ၆၃၈ ခန်း စံချိန်တင်ဝယ်ယူခဲ့

ရန်ကုန်၊ စက်တင်ဘာ ၂၄

ထိုင်းနိုင်ငံ၊ ဘန်ကောက်မြို့တွင် ၂၀၂၄ ခုနှစ် ပထမ ၆ လအတွင်း မြန်မာနိုင်ငံသားများက ထိုင်းဘတ်ငွေ ၃ ဒသမ ၂၄ ဘီလီယံတန်ဖိုးရှိ ကွန်ဒို အခန်းပေါင်း ၆၃၈ ခန်း စံချိန်တင်ဝယ်ယူခဲ့ကြကြောင်း ဘန်ကောက်ပို့စ်က ယနေ့ သတင်းဖော်ပြသည်။

ယခု ၂၀၂၄ ခုနှစ် ပထမ ၆ လအတွင်း မြန်မာနိုင်ငံသားများ၏ ကွန်ဒိုဝယ်ယူမှုသည် ယခင်နှစ်ထက် ပိုမို စံချိန်တင် များပြားလာကြောင်း၊ ထိုင်းဘတ်ငွေ ၃ ဒသမ ၂၄ ဘီလီယံ တန်ဖိုးရှိ ကွန်ဒိုအခန်း ၆၃၈ ခန်းကို ဝယ်ယူ လွှဲပြောင်းရယူခဲ့ကြကြောင်း ထိုင်းနိုင်ငံ၊အိမ်ခြံမြေသတင်းအချက်အလတ်ဌာန (REIC) ၏ အစီရင်ခံစာတွင် ဖော်ပြထားသည်။

ယမန်နှစ် ၂၀၂၃ ခုနှစ် တစ်နှစ်လုံးတွင် မြန်မာနိုင်ငံသားများက ထိုင်းဘတ်ငွေ ၃ ဒသမ ၇ ဘီလီယံတန်ဖိုးရှိ ကွန်ဒိုခန်း ၅၆၄ ခန်း၊ ၂၀၂၂ ခုနှစ်တွင် ထိုင်းဘတ်ငွေ ၂ ဒသမ ၅၅ ဘီလီယံတန်ဖိုးရှိ ကွန်ဒိုခန်း ၃၄၉ ခန်း၊ ၂၀၂၁ ခုနှစ်တွင် ထိုင်းဘတ်ငွေ ၂၇၄ သန်းတန်ဖိုးရှိ ကွန်ဒိုခန်း ၃၀ သာ ဝယ်ယူခဲ့ကြကြောင်း သိရှိရသည်။

REIC ယာယီညွန်ကြားရေးမှူးချုပ် Vichai Viratkapan က “ မြန်မာတွေက အရင်နှစ်တွေမှာ တစ်နှစ်ကို ကွန်ဒိုခန်း ၂၀ ကနေ ၅၀ ခန်းအထိပဲ ဝယ်ခဲ့ကြရာကနေ ၂၀၂၂ ခုနှစ်ကစ​ပြီး ထိုင်းမှာ ကွန်ဒို ဝယ်ယူတဲ့ ထိပ်တန်း နိုင်ငံ ၁၀ ခုစာရင်းမှာ ပထမဆုံးပါဝင်လာခဲ့တယ်” ဟု ပြောဆိုသည်။

၂၀၂၂ ခုနှစ်တွင် ထိုင်းနိုင်ငံရှိ ကွန်ဒိုအခန်းများ ဝယ်ယူသော နိုင်ငံများစာရင်းတွင် မြန်မာနိုင်ငံက နံပါတ် ၆ နေရာတွင် ရပ်တည်ခဲ့ပြီး ယခုအခါ ထိုင်းကွန်ဒိုအခန်းများကို ဒုတိယအများဆုံး ဝယ်ယူသော နိုင်ငံဖြစ်လာကြောင်း၊ ထိုင်းကွန်ဒိုများကို ပထမ အများဆုံးဝယ်ယူသော နိုင်ငံမှာ တရုတ်နိုင်ငံသားများဖြစ်ပြီး မြန်မာနိုင်ငံက ရုရှားကိုကျော်တက်ကာ ဒုတိယအဆင့်ဖြစ်လာခြင်းဖြစ်ကြောင်း သိရှိရသည်။

မြန်မာစစ်ကောင်စီက ထိုင်းနိုင်ငံတွင် ကွန်ဒိုဝယ်ယူမှုများကို အရေးယူမှုများ လုပ်ဆောင်မှုကြောင့် ၂၀၂၄ ခုနှစ် အစပိုင်းတွင် လျော့ကျသွားခဲ့ကြောင်း သိရှိရသည်။

#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar