ရန်ကုန်၊ ဒီဇင်ဘာ ၁၈
ရန်ကုန်တွင် အသက် ၁၈ နှစ်မှ အသက် ၃၅ နှစ်အတွင်း လူငယ်များ ပျောက်ဆုံးမှုများပြားနေကြောင်း လူပျောက်ကြေညာထားသူ မိဘဆွေမျိုးတချို့က ရန်ကုန်ခေတ်သစ်သတင်းဌာနထံသို့ ပြောဆိုသည်။
သာကေတမြို့နယ်၊ အမှတ် ၉ ရပ်ကွက်တွင် နေထိုင်သူ အသက် ၂၆ နှစ်အရွယ် မောင်ကျော်စိုးသည် ရန်ကုန်မြို့အတွင်း Delivery ပို့ဆောင်ရေး အလုပ်သမားအဖြစ် လုပ်ကိုင်နေသူဖြစ်ပြီး ဒီဇင်ဘာလ ၁၄ ရက်နေ့ ညပိုင်းတွင် အလုပ်မှ ပြန်မလာတော့ဘဲ ပျောက်ဆုံးခဲ့ကြောင်း၊ မောင်ကျော်ကျော်စိုးတို့ မိသားစုသည် စစ်ကိုင်းဘက်မှ ပြောင်းရွှေ့လာသူများဖြစ်ပြီး ရန်ကုန်သို့ ရောက်သည်မှာ ၁ နှစ်ခန့်သာ ရှိသေးကြောင်း မိခင်ဖြစ်သူက ရန်ကုန်ခေတ်သစ်သတင်းဌာနထံသို့ ပြောဆိုသည်။
“မနက် ၉ နာရီဆို သားက ထွက်သွားပြီး ည ၉ နာရီလောက်ဆို ပြန်လာတာပဲ။ ဒီဇင်ဘာလ ၁၄ ရက်နေ့ကတော့ ပြန်ရောက်မလာဘူး။ သူ့ဖုန်းကိုဆက်တော့လည်း စက်ပိတ်ထားတယ်။ အိမ်ပြန်လာရင်း စစ်မှုထမ်းအဖြစ် စုဆောင်းခံရတယ်လည်း ကြားတယ်။ မေးသလောက်တော့ ဘာမှ ရေရေရာရာ မသိရသေးဘူး”ဟု မိခင်ဖြစ်သူက ရန်ကုန်ခေတ်သစ်သတင်းဌာနထံသို့ ပြောဆိုသည်။
ရန်ကုန်တိုင်းအတွင်းတွင် စစ်မှုထမ်း အပတ်စဉ် ၈ အတွက် လူပြည့်မီခြင်းမရှိသဖြင့် ပေါ်တာဆွဲ ဖမ်းဆီးမှုများ အလွန်များပြားနေကြောင်း၊ အထူးသဖြင့် ရန်ကုန်တိုင်းထွေ/အုပ်က အသက် ၁၈ နှစ်မှ အသက် ၃၅ နှစ်အတွင်း ကျန်းမာသန်စွမ်းသူ လူငယ်များသည် နိုင်ငံတော်ကာကွယ်ရေးအတွက် စစ်မှုထမ်းရန် မည်သည့်နေရာ၊ မည်သည့်အချိန်တွင်မဆို ခေါ်ယူနိုင်ကြောင်း၊ ယင်းသို့ ခေါ်ယူမှုမှာ ပြည်သူ့စစ်မှုထမ်းဥပဒေနှင့်ညီညွတ်မှုရှိကြောင်း အသိပေးညွှန်ကြားစာကို ထုတ်ပြန်ခဲ့ကြောင်း၊ ယင်းနောက် ရန်ကုန်မြို့တွင်ပင် ပေါ်တာဆွဲ ဖမ်းဆီးမှုများ သတင်းများ တောက်လျှောက်ဆိုသလို ထွက်ပေါ်လျက်ရှိကြောင်း ရန်ကုန်ခေတ်သစ်သတင်းက စုံစမ်းသိရှိရသည်။
လူမှုကွန်ရက် ဖေ့ဘုတ်တွင်လည်း လူပျောက်ကြော်ငြာများ မြင်တွေ့နေရပြီး အသက် ၃၅ နှစ်အရွယ် ဦးချစ်မျိုးညီသည် ဒီဇင်ဘာလ ၁၃ ရက်နေ့ ညနေ ၆ နာရီ ရုံးမှ အိမ်သို့ ပြန်လာရာတွင် အိမ်ပြန်မရောက်ဘဲ လမ်းတွင် ပျောက်ဆုံးသွားကြောင်း၊ ဒီဇင်ဘာလ ၁၃ ရက်နေ့ ညနေ ၆ နာရီ ၁ မိနစ်အချိန် ဖုန်းအဆက်အသွယ်ရရှိခဲ့ပြီး နောက်ပိုင်းအဆက်အသွယ်မရတော့ဘဲ ယနေ့တိုင် ပျောက်ဆုံးနေဆဲဖြစ်ကြောင်း ၊ ဒေါပုံရဲစခန်းတွင် လူပျောက်တိုင်ကြားထားကြောင်း ဇနီးဖြစ်သူ Ei Ei Chaw အကောင့်ပိုင်ရှင်က လူမှုကွန်ရက်တွင် ရေးသားထားသည်။
အလားတူ ရွှေပြည်သာမြို့နယ်၊ အမှတ် ၅/ ၂ ရပ်ကွက်၊ သဇင်ပန်းခြံလမ်းနေ အသက် ၂၆ နှစ်အရွယ် မောင်မြတ်မင်းသူသည် ဒီဇင်ဘာလ ၁၅ ရက်နေ့ ညနေ ၅ နာရီခွဲအချိန် မုန့်သွားဝယ်ရာမှ ပျောက်ဆုံးသွားသဖြင့် တွေ့ရှိပါက မိသားစုထံသို့ ဆက်သွယ်ရန် ဖုန်းနံပါတ်နှင့်တကွ ကြေညာထားသည်။
ထို့ပြင် မန္တလေး သပိတ်အင်အားစုကလည်း ဒီဇင်ဘာလ ၁ ရက်နေ့မှ ဒီဇင်ဘာလ ၁၅ ရက်နေ့အထိ ၂ ပတ်တာကာလအတွင်း မန္တလေး ၇ မြို့နယ်မှ လူငယ် ၁၂၅ ဦးကို စစ်တပ်က စစ်မှုထမ်းရန် စုဆောင်းသွားကြောင်း သတိပေးချက် ထုတ်ပြန်သည်။
“အောင်မြေသာဇံမြို့နယ်မှ ၂၁ ဦး၊ ချမ်းအေးသာဇံမြို့နယ်မှ ၇ ဦး၊ မဟာအောင်မြေမြို့နယ်မှ ၅ ဦး၊ ချမ်းမြသာစည်မြို့နယ်မှ ၅ ဦး၊ ပြည်ကြီးတံခွန်မြို့နယ်မှ ၃၆ ဦး၊ အမရပူရမြို့နယ်မှ ၁၇ ဦး ၊ပုသိမ်ကြီးမြို့နယ်မှ ၃၄ ဦး စုစုပေါင်း ၁၂၅ ဦး စစ်မှုထမ်းဥပဒေဖြင့် မတရားဖမ်ဆီးခံခဲ့ရကြောင်း၊ စစ်မှုထမ်းဥပဒေကို အကြောင်းပြုပြီး ဖမ်းဆီးရာတွင် တွေ့ရှိရသည်မှာ နေ့/ည မချိန်မရွေး ဖမ်းဆီးခြင်း ၊ ညအချိန်မတော် ဧည့်စာရင်း ဥပဒေကို အကြောင်းပြပြီး ဖမ်းဆီးခြင်းများကို ဆက်တိုက်ပြုလုပ်လာကြောင်း မန္တလေးသပိတ်အင်အားစုက သတိပေးထားသည်။
ထို့ကြောင့် မန္တလေးမြို့နေ လူငယ်လူထုအနေဖြင့် အချိန်မတော် နေအိမ်ပြင်ပ သို့ သွားလာခြင်း ၊ မလိုအပ်ဘဲ ခရီးသွားလာခြင်း ၊ ပျော်ပွဲရွှင်ပွဲ များသို့ သွားလာခြင်းများကို တတ်နိုင်သမျှရှောင်ကြဉ်သင့်ကြောင်း၊ အကြမ်းဖက်စစ်တပ်၏ မတရားဖမ်းဆီး စစ်မှုထမ်းခြင်း မခံရစေရန် မိမိ ပတ်ဝန်းကျင်ရှိ စစ်ကောင်စီ ယန္တရား၊ လှုပ်ရှားမှုများကို မျက်ခြေမပြတ် လေ့လာအကဲခတ်ထားပြီး အန္တရာယ်တစုံတရာ ကျရောက်လာနိုင်သောအခြေအနေရှိပါက ကြိုတင်ရှောင်ရှားထားကြရန်လိုအပ်ကြောင်း၊ မိသားစု နှင့် ခြိမ်းခြောက်အကြပ်ကိုင်ခံရခြင်း ကဲ့သို့ မလွှဲမရှောင်သာ အခြေအနေများနှင့်ကြုံတွေ့ရပြီး တပ်သားသစ် စုဆောင်းခံရမည်ဆိုပါက ကြိုတင်ပြင်ဆင်ချိန်ရသည့်အခြေအနေ တွင် လိုအပ်သော ပြင်ဆင်မှုများကို ပြင်ဆင်ထားကြပါရန်၊ မိမိတို့ နေထိုင်ရာ ပတ်ဝန်းကျင် ၊ လက်လှမ်းမီရာများတွင် မတရားဖမ်းဆီးခံရမှုများရှိပါက သတင်းပေးပို့ကြပါရန် မန္တလေးသပိတ်အင်အားစု က တိုက်တွန်းထားသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
