ရန်ကုန်၊ ဒီဇင်ဘာ ၂၄
ယနေ့ ထုတ်ပြန်သော ပြည်သူလူထုနှင့် နိုင်ငံတကာသို့ သတင်းစကားပြောကြားခြင်း (Press Briefing) အစီအစဉ် တွင် အမျိုးသားညီညွတ်ရေးအစိုးရ သမ္မတရုံး ပြောရေးဆိုခွင့်ရှိသူ ဦးကျော်ဇော် က အထက်ပါအတိုင်း ပြောဆိုလိုက်ခြင်းဖြစ်သည်။
နိုင်ငံတကာခုံရုံးတွင် ရာဇဝတ်ကောင် တရားခံအနေဖြင့် တရားရင်ဆိုင်ရန်နီးကပ်လာနေပြီဖြစ်သည့်စစ်ကောင်စီခေါင်းဆောင်နှင့် အပေါင်းအပါများကို ၎င်းတို့ အလွန်တောင့်တနေသည့် တရားဝင်မှုကိုမပေးမိကြရန် တိုက်တွန်းလိုကြောင်း၊ မြန်မာနိုင်ငံ၏ အကျပ်အတည်းအတွက် ဖြစ်နိုင်ချေ ရှိသည့် အဖြေကို ရှာဖွေရာတွင် အိမ်နီးချင်းနိုင်ငံများ နှင့် အာဆီယံအဖွဲ့ဝင်နိုင်ငံများ၏ ကြိုးပမ်းမှုများကို ကြိုဆိုကြောင်း၊ စင်ကာပူ နိုင်ငံခြားရေး ဝန်ကြီး နှင့်ဗြိတိန်ဝန်ကြီးဟောင်း ၃ဦးတို့က ဒေါ်အောင်ဆန်းစုကြည်ကို ပြန်လွှတ်ပေးရန် တောင်းဆိုမှုအတွက် ကျေးဇူးတင်ကြောင်း ၎င်းက ဆိုသည်။
ထို့ပြင် ထိုင်းနိုင်ငံတွင် ဒီဇင်ဘာလ ၁၉ ရက်နေ့ မြန်မာ့ အိမ်နီးချင်းနိုင်ငံများ တွေ့ဆုံဆွေးနွေးမှုတွင် အကြမ်းဖက်စစ်ကောင်စီ၏ ကိုယ်စားလှယ်ကိုသာ ဖိတ်ကြားဆွေးနွေးမှုက ပြဿနာကိုမပြေလည်စေဘဲ အကြမ်းဖက် စစ်ကောင်စီ၏ အကြမ်းဖက်မှုများ ကို ပိုဆိုးရွားလာစေရန် အားပေးသလို ဖြစ်စေနိုင်သည်ကို စိုးရိမ်မိကြောင်း ၎င်းက ဆက်လက်ပြောဆိုသည်။
မြန်မာနိုင်ငံသားများ က ဦးဆောင်မှု (Myanmar-owned ၊ Myanmar-led) ဆိုသည်မှာ အကြမ်းဖက် စစ်ကောင်စီနှင့်သာ စကားပြောခြင်းကို ဆိုလိုခြင်းဖြစ် သလားဟု မေးခွန်းထုတ်စရာဖြစ်ကြောင်း၊ မြန်မာ့အရေးကို ဖြေရှင်းဖို့ကြိုးစားတဲ့အခါမှာ မတူညီသောသက်ဆိုင်သူများအားလုံး နှင့် ကျယ်ပြန့်စွာဆွေးနွေးတိုင်ပင်ရန် လိုအပ်ကြောင်း၊ သက်ဆိုင်ရာ Stakeholderများ\ ယုံကြည်မှုကိုပျက်ပြားစေမည့် လုပ်ရပ်များကို သတိထားရှောင်ကြည်ကြရန် သတိပေးလိုကြောင်း ၎င်းက ဆက်လက်ရှင်းလင်းပြောဆိုသည်။
“ဒီကြိုးပမ်းလုပ်ဆောင်မှုများဟာ ကျနော်တို့ မြန်မာပြည်သူများ၏ ဆန္ဒ အကျိုးစီးပွားနှင့် အညီ ဖြစ်သင့်ပါတယ်။ ဒီလိုမှမဟုတ်ရင်ဒီလုပ်ငန်းစဉ်ကို စစ်အာဏာရှင်တွေက သူတို့အမြဲလုပ်ခဲ့သလို သူတို့ရဲ့အကျိုးအမြတ်အတွက် ကြိုးကိုင်ခြယ်လှယ်ပြီးအဆုံးမှာ မြင်သာထင်သာတဲ့ရလဒ်တွေထွက်ပေါ်လာမှာမဟုတ်ပါဘူး။ အိမ်နီးချင်းနိုင်ငံများရဲ့ကြိုးပမ်းမှုအလဟသဖြစ်သွားနိုင်ပါတယ်” ဟု အမျိုးသားညီညွတ်ရေးအစိုးရ သမ္မတရုံး ပြောရေးဆိုခွင့်ရှိသူ ဦးကျော်ဇော် က ပြောဆိုသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
