ရန်ကုန်၊ ဇန်နဝါရီ ၁
အကြမ်းဖက် စစ်ခေါင်းဆောင် မင်းအောင်လှိုင်က တိုင်းပြည်တိုးတက်အောင် သူ့အနေနဲ့ ဆောင်ရွက်နိုင်ခဲ့ပေမယ့်လည်း တိုင်းရင်းသားခေါင်းဆောင် တချို့က ပြည်ထောင်စုပြိုကွဲအောင် ဦးတည်ဆောင်ရွက်နေတယ်လို့ ပြောဆိုလိုက်ပါတယ်။
ဒီနေ့ မင်းအောင်လှိုင်က နှစ်သစ်ကူးအဖြစ် ထုတ်ပြန်ပြောဆိုတဲ့ ပြောဆိုချက်မှာ အဲဒီလို ထည့်သွင်းပြောဆိုလာတာဖြစ်ပါတယ်။
မင်းအောင်လှိုင်က သူ့အနေနဲ့ တိုင်းပြည်ကို အတိုင်းအတာတစ်ခု အထိတိုးတက် အောင်ဆောင်ရွက်နိုင်ခဲ့ကြောင်း၊ ၂၀၂၄ ခုနှစ် လူဦးရေနဲ့ အိမ်အကြောင်းအရာ သန်းခေါင်စာရင်းကို အောင်မြင်စွာ ကောက်ယူနိုင်တာ၊ ၅ ကြိမ်မြောက် အားကစားပွဲတော်ကြီးကို အောင်မြင်စွာ ကျင်းပနိုင်တာတွေက သူရဲ့ တိုင်းပြည်ကို တိုးတက် အောင်လုပ်ဆောင်မှုတွေ ဖြစ်တယ်လို့ မင်းအောင်လှိုင်က ဆိုပါတယ်။
သူက တိုင်းပြည်တိုးတက်အောင် ဆောင်ရွက်နိုင်ခဲ့ပေမယ့်လည်း တိုင်းရင်းသားလက်နက်ကိုင်ခေါင်းဆောင်တချို့ဟာ ပြည်ထောင်စုပြိုကွဲအောင် ဆောင်ရွက်နေတယ်လို့ အပြစ်တင်ပြောဆိုပါတယ်။
“လက်နက်ကိုင်အဖွဲ့ ခေါင်းဆောင်များအနေနဲ့ ခေါင်းစဉ်အမျိုးမျိုးပြပြီး ဒီမိုကရေစီစနစ်ကို လိုလားတယ်လို့ ပြောနေပေမယ့် လက်တွေ့မှာတော့ ကိုယ်ကျိုးအတ္တကို အခြေခံတဲ့ လိုအင်ဆန္ဒသက်သက်နဲ့ လက်နက်ကိုင်ပဋိပက္ခကိုသာ ဖနတီးနေကြတာကို တွေ့မြင်ရမှာဖြစ်ပါတယ်။ ထို့အတူပဲ အချို့သော တိုင်းရင်းသားခေါင်းဆောင်များဟာ ဖက်ဒရယ် အခွင့်အရေး၊ တိုင်းရင်းသားအခွင့်အရေးလို့ ပြောနေကြသော်လည်း ဒီမိုကရေစီရဲ့ သဘောသဘာ၀ကို မျက်ကွယ်ပြုပြီး ပြည်ထောင်စုပြိုကွဲအောင် ဦးတည်ဆောင်ရွက်နေကြတာလည်းတွေ့နေရပါတယ်” လို့ မင်းအောင်လှိုင်က ဆိုပါတယ်။
လာမယ့် ၂၀၂၅ ခုနှစ်မှာ ရွေးကောက်ပွဲ ကျင်းပမယ်လို့ မင်းအောင်လှိုင်က ပြောဆိုလိုက်ပြီး ရွေးကောက်ပွဲ အောင်မြင်အောင် ၀ိုင်းဝန်းဆောင်ရွက်ပေးကြဖို့ မင်းအောင်လှိုင်က ပြောဆိုပါတယ်။
လက်ရှိမှာတော့ မင်းအောင်လှိုင်က လက်နက်ကိုင်ပဋိပက္ခတွေကို နိုင်ငံရေးနည်းလမ်းနဲ့ ဖြေရှင်းဖို့ ဖိတ်ခေါ်ထားပေမယ့်လည်း လက်တွေ့မှာတော့ စစ်လေယာဉ်တွေနဲ့ နိုင်ငံတစ်ဝန်း ဗုံးကျဲ သတ်ဖြတ်မှုတွေကို ဆက်လက်လုပ်ဆောင်လျက်ရှိနေတာကိုလည်း မြင်တွေ့ရပါတယ်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
