ရန်ကုန်၊ ဇန်နဝါရီ ၁၇
မန္တလေးမြို့ပေါ် ၊ မြို့နယ် ၇ ခုအတွင်း စစ်တပ်က ဇန်နဝါရီလ ၁၅ ရက်တာကာ လအတွင်း လူငယ် ၁၂၂ ဦးထက် မနည်းကို ပေါ်တာဆွဲဖမ်းဆီးခဲ့ကြောင်း မန္တလေး သပိတ်အင်အားစုမှ တာဝန်ရှိသူက ရန်ကုန်ခေတ်သစ်သတင်းဌာနသို့ ပြောကြားသည်။
ဇန်နဝါရီလ ၁ ရက်နေ့မှ ၁၅ ရက်နေ့အထိ နှစ်ပတ်တာ ကာလအတွင်း အောင် မြေ သာဇံမြို့နယ်မှ ၁၉ ဦး၊ ချမ်းအေးသာဇံမြို့နယ်မှာ ၁၅ ဦး၊ မဟာအောင်မြေမြို့နယ်မှ ၁၇ ဦး၊ ချမ်းမြသာစည်မြို့နယ်မှ ၁၉ ဦး၊ ပြည်ကြီးတံခွန်မြို့နယ်မှ ၁၉ ဦး၊ အမရပူရမြို့ နယ်မှ ၁၈ ဦး၊ ပုသိမ်ကြီးမြို့နယ်မှ ၁၅ ဦး စုစုပေါင်းလူငယ် ၁၂၂ ဦးဖမ်းဆီးခံခဲ့ရကြောင်း သိရှိရသည်။
“VPN နဲ့ ပတ်သက်ပြီး လမ်းတွေက ရဲခွေးတွေ၊ စစ်ခွေးတွေ၊ အဖြူကောင် (ယာဉ်ထိန်းရဲ) တွေရော လိုင်စင်စစ်ပြီးတာနဲ့ ဖုန်းထုတ်စစ်ပါတယ်။ ဖုန်းစစ်ရင်း ပါသွားတဲ့ ဖြစ်စဉ် ၅ ခုရှိပါတယ်။ ၁၂၂ ဦးသည် လက်လှမ်းမီသလောက် ကောက် ယူထားတဲ့ သတင်းဖြစ်လို့ မြေပြင်မှာ ဒီထက်ပိုများနိုင်ပါတယ်”ဟု မန္တလေးသပိတ်အင်အားစုမှ တာဝန်ရှိသူက ရန်ကုန်ခေတ်သစ်သတင်းဌာနသို့ ပြောကြားသည်။
အဆိုပါ စာရင်းသည် လက်လှမ်းမီရာနှင့် သတင်းမီဒီယာများကို အခြေခံ၍ ပြုစုထားခြင်းဖြစ်၍ မြေပြင်တွင် ထိုထက်မက များပြားနိုင်ကြောင်းလည်း မန္တလေးသပိတ်အင်အားစုက ဆက်လက်ပြောဆိုသည်။
အကြမ်းဖက်စစ်တပ်သည် စစ်မှုထမ်းဥပဒေကို အကြောင်းပြ၍ ဖမ်းဆီးရာတွင် နေ့ည မရွေးဖမ်းဆီးနေပြီး ညအချိန်မတော် ဧည့်စာရင်းဥပဒေကို အကြောင်းပြဖမ်းဆီးခြင်း၊ အလုပ်မှ ပြန်လာသည့် အခြေခံလူတန်းစား လူငယ်များကို ပစ်မှတ်ထား ဖမ်းဆီးခြင်းများအပြင် ဇန်နဝါရီလ ၁ ရက်နေ့တွင် ထုတ်ပြန်ထားသည့် ဆိုက်ဘာလုံခြုံရေးဥပဒေကို အကြောင်းပြု၍ ဖုန်းများစစ်ဆေး၍ မတရားဖမ်းဆီး ငွေတောင်းခြင်းများ နေ့စဉ် ကျူးလွန်နေကြောင်း မန္တလေးသပိတ်အင်အားစုက ဆိုသည်။
ထိုကြောင့် လူငယ်များအနေဖြင့် နေအိမ်ပြင်ပသွားလာပါက သို့မဟုတ် ဧည့်စာရင်းဝင်စစ်ဆေးပါက VPN အပါအဝင် ဖျက်သင့် ဖျက်ထိုက်သည်များ ကြိုတင်ဖျက်ထားရန်၊ ပျော်ပွဲရွှင်ပွဲ သွားလာခြင်းများကို တတ်နိုင်သမျှ ရှောင်ကြဉ်ပြီး နေအိမ်ပြင်ပထွက်ပါက သတိထားရန်၊ ပတ်ဝန်းကျင်တွင် စစ်ကောင်စီယန္တရား၊ လှုပ်ရှားမှုများကို မျက်ခြည်မပြတ်လေ့လာအကဲခတ်၍ ကြိုတင်ရှောင်ရှားရန် မန္တလေးသပိတ်အင်အားစုက ပြည်သူများကို သတိပေးထားသည်။
ထို့ပြင် မိသားစုနှင့် ခြိမ်းခြောက်အကြပ်ကိုင်ခံရခြင်းကဲ့သို့ အခြေအနေများ ကြုံတွေ့ရပြီး တပ်သားသစ် စုဆောင်းခံရမည်ဆိုပါက လိုအပ်သည့် ပြင်ဆင်မှုများ ပြင်ဆင်ရန်နှင့် ပတ်ဝန်းကျင်လက်လှမ်းမီရာတွင် မတရားဖမ်းဆီးခံရပါက တော်လှန်ရေးအဖွဲ့အစည်းများကို သတင်းပေးပို့ရန် စသည့် အချက်များကို မန္တလေးသပိတ်အင်အားစုက အသိပေးထားသည်။
ဓာတ်ပုံ – မန္တလေးတွင် စစ်အာဏာရှင်ဆန့်ကျင်ရေး သပိတ် ဆန္ဒပြသူများကို စစ်တပ်က ဖမ်းဆီးထားစဉ်။ (ပုံအဟောင်းဖြစ်ပါသည်။)
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
