ရန်ကုန်၊ မတ် ၆
ပဲခူးတိုင်း၊ ပြည်မြို့နယ်တွင် AA နှင့် PDF များ ထိုးစစ်ဆင်လာနိုင်သည်ဟုဆိုကာ ရဲစခန်း၊ ကင်းစခန်းနှင့် စစ်တပ်အထိုင်စခန်းများကို ဘန်ကာများ၊ ဝါးချွန်များ၊ ကွန်ကရစ်ဘန်ကာများဖြင့် လုံခြုံရေးတိုးမြှင့်လျက်ရှိကြောင်း တပ်သတင်းရင်းမြစ်နှင့်ဒေသသတင်းရင်းမြစ်များက ပြောဆိုသည်။
ယခုမတ်လပိုင်းမှ စတင်၍ ပဲခူးတိုင်း၊ ပြည်မြို့နယ်အတွင်း အကြမ်းဖက် စစ်ကောင်စီ တပ်သားများ တပ်စွဲထားသော နေရာများ၊ ခရိုင်ထွေအုပ်ရုံးနှင့် အမှတ် ၁ ရဲစခန်း တို့တွင် ဘန်ကာများ၊ ဝါးချွန်များဖြင့် ခံစစ် ပြင်ဆင်နေကြောင်း၊ စစ်တပ်နှင့်ရဲများက ရဲစခန်း၊ ကင်းစခန်း၊ အထိုင်စခန်းများ အပါအဝင် တပ်စွဲထားသော နေရာများအားလုံးတွင် ဘန်ကာများ၊ ဝါးချွန်များ တပ်ဆင်ခြင်း၊ ခံစစ်မြောင်းများတူးခြင်း၊ ဗုံးခိုကျင်းများ တိုးချဲ့ခြင်း အစရှိသည်ဖြင့် ခံစစ်ပြင်ဆင်နေကြောင်း၊ ထို့ပြင် ပျူစောထီး သင်တန်းဆင်းပြီးသား သူများကို ခေတ်မီလက်နက်များ တပ်ဆင်ပေးမည်ဟု အသိပေးလာကြောင်း သိရှိရသည်။
ထို့ပြင် စစ်တပ်က ပြည်မြို့အဝင်အထွက် နေရာများကို တင်းကျပ်စွာ စစ်ဆေးမှုများ လုပ်ဆောင်လာနေပြီး ညပိုင်းအချိန် မြို့ပေါ် ရပ်ကွက်များကို ဧည့်စာရင်းစစ်ဆေးခြင်းများ တိုးမြှင့်လုပ်ဆောင်လာကြောင်း၊ ကင်းလှည့်စစ်ကြောင်းများကို ယခင်ထက် ပိုမိုတိုးချဲ့လာပြီး စစ်ကောင်စီ တပ်သားများကို ပုံစံမျိုးဖြင့် မြို့အနှံ့တွင် နေရာချထားကြောင်း၊ ပြည်မြို့တွင် စက်တပ်လေထီးများ ပျံသန်း လေ့ကျင့်မှုများလည်း ဆက်တိုက် ပြုလုပ်နေကြောင်း သိရှိရသည်။
“ပြည်မြို့နယ်အတွင်း အခုရက်ပိုင်းမှာ မြို့အဝင် အထွက်နေရာတွေကို အစစ်အဆေးတင်းကျပ်မှုတွေ လုပ်ဆောင်နေတယ်။ ခရိုင်ထွေအုပ်ရုံးနဲ့ အမှတ် ၁ ရဲစခန်းတွေမှာ ဘန်ကာ၊ ဝါးချွန်တွေ ပြုလုပ်ထားပြီး ခံစစ်ပြင်ဆင်နေတယ်။ ညပိုင်းမှာလည်း ဧည့်စာရင်းစစ်တာတွေ စက်တပ် လေထီးတွေ ပျံသန်းတာတွေ ဆက်တိုက်လုပ်နေတယ်။ စစ်ခွေးတွေ ကြောက်လန့်နေတာ မြို့ပေါ်မှာလည်း ကင်းတွေ တောက်လျှောက်လှည့်နေပါတယ်။ စခနဲ့ ရခလည်း နေရာအနှံ့မှာ တွေ့မြင်နေရတယ်” ဟု ပြည်မြို့အခြေစိုက် ဒေသသတင်းရင်းမြစ်က ပြောဆိုသည်။
ပြည်ခရိုင်အတွင်း စစ်ကောင်စီလက်အောက်ခံ ပျူစောထီးများကိုလည်း လက်ရွေးစင်ထပ်ဆင့် ရွေးချယ်ကာ အထူး စစ်သင်တန်းပေးနေကြောင်း၊ သင်တန်းဆင်းလာသူများကို လက်နက် ခဲယမ်းများ တပ်ဆင်ပေးရန် သက်ဆိုင်ရာ မြို့အလိုက် မြို့စောင့်တပ်အဖြစ် ထားရှိရန် လုပ်ဆောင်နေကြောင်း သိရှိရသည်။
” ပြည်ခရိုင်အတွင်းမှာရှိတဲ့ ပထမ ပြည်သူ့စစ်သင်တန်းပေးပြီးသားကောင်တွေကို ထပ်ဆင့် စစ်ခွေး သစ္စာခံ ရွေးချယ်ပြီး အထူးစစ်သင်တန်းပေးနေတယ်လို့ သိရပါတယ်။ သင်တန်းဆင်းလာရင် သူ့တို့ကို စစ်သားတွေ နည်းတူ လက်နက်နဲ့ ခဲယမ်းတွေ အမြဲပေးထားပြီး သက်ဆိုင်ရာ နေထိုင်ရာ မြို့အလိုက် မြို့စောင့်ခွေးများ အဖြစ် ထားရှိသွားမယ်လို့ သိရတယ်” ဟု ၃၆၀၂ တပ်ရင်း သတင်းပြန်ကြားရေး တာဝန်ခံရဲဘော် Red Star က ရန်ကုန်ခေတ်သစ်သတင်းဌာနထံသို့ ပြောဆိုသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
