ငလျင်ဒဏ်သင့် မြန်မာပြည်သူများမှာ စစ်တပ်၏ နေ့စဉ် မရပ်မနား ဗုံးကျဲနေသော လူလုပ်ကပ်ဘေးကိုလည်း ခံနေရ၍ စစ်အာဏာရှင်စနစ်ဆိုးကို ချေမှုန်းရန် NUG ယာယီသမ္မတ တိုက်တွန်း

ရန်ကုန်၊ ဧပြီ ၂

ငလျင်ဒဏ်သင့် မြန်မာပြည်သူများမှာ စစ်တပ်၏ နေ့စဉ် မရပ်မနား ဗုံးကျဲနေသော လူလုပ်ကပ်ဘေးကိုလည်း ခံနေရ၍ စစ်အာဏာရှင်စနစ်ဆိုးကို ချေမှုန်းရန် အမျိုးသားညီညွတ်ရေးအစိုးရ-NUG ယာယီသမ္မတဒူဝါလရှီးလက တိုက်တွန်းပြောဆိုသည်။

ယမန်နေ့ ပြုလုပ်သော အမျိုးသားညီညွတ်ရေးအစိုးရ၏ ၁၀ / ၂၀၂၅ အစိုးရအဖွဲ့အစည်းအဝေးတွင် ယာယီသမ္မတ ဒူဝါလရှီးလ က အထက်ပါအတိုင်းပြောဆိုခြင်းဖြစ်သည်။

“သဘာဝဘေးအန္တရာယ်တွင်းထဲ ကျရောက်နေတဲ့ မြန်မာပြည်သူလူထုတွေဟာ စစ်အာဏာရှင် စနစ်ဆိုးက ဖန်တီးလိုက်တဲ့ လူလုပ်ကပ်ဘေးကြီးနဲ့လည်း ကြုံတွေ့နေကြောင်း၊ နိုင်ငံတကာနိုင်ငံ အသီးသီးကို လက်တွေ့ မျက်မြင် သိစေချင်ပါတယ်။ အထူးသဖြင့် အကြမ်းဖက် စစ်ကောင်စီက နေ့စဉ် မရပ်မနား ဗုံးကြဲတိုက်ခိုက်နေတာတွေဟာ ပြည်သူတစ်ရပ်လုံး ခံစားနေရတဲ့ လူလုပ်ကပ်ဘေးတစ်ခုလို ဖြစ်နေတာကို မေ့ထားလို့ မရပါဘူး။ ဒီစစ်အာဏာရှင်စနစ်ဆိုးကို အမြန်ဆုံး မချေမှုန်းနိုင်သရွေ့၊ ပြည်သူလူထုခံစားရတဲ့ ဒုက္ခတွေဟာ တတိတိနဲ့ တစိမ့်စိမ့် ခံစားနေရသလို ဖြစ်နေမယ်လို့ ယူဆပါတယ်” ဟု NUG ယာယီသမ္မတက ပြောဆိုသည်။

စစ်ကောင်စီက ပြည်သူလူထုကို နေ့စဉ် ဗုံးကျဲတိုက်ခိုက်ရာတွင် ကချင်လွတ်မြောက်ရေးတပ်မတော်၏ တပ်မဟာ ၈ နယ်မြေရှိ သင်တန်းကျောင်းကို မတ်လ ၃၁ ရက် ညပိုင်း လေယာဉ်ဖြင့် ဗုံးကျဲတိုက်ခိုက်ခဲ့ရာ လူငယ် ၃၆ ဦး သေဆုံးပြီး ၂၀ ကျော် ဒဏ်ရာ ပြင်းထန်စွာ ရရှိကြောင်း၊ စစ်တပ်အနေဖြင့် အာဏာတည်မြဲရေးအတွက် ဘာမဆို လုပ်ရဲသည်ကို နားလည်သဘောပေါက်နေကြပြီဖြစ်ကြောင်း NUG ယာယီသမ္မတက ဆက်လက်ပြောဆိုသည်။

“အကြမ်းဖက် စစ်အုပ်စုဟာ အာဏာတည်မြဲရေးအတွက်ဆိုရင် ဘယ်အရာကိုမဆို လုပ်ရဲတယ်ဆိုတာကို ပြည်သူတစ်ရပ်လုံးက နားလည်သဘောပေါက်နေပြီး ဖြစ်ပါတယ်။ ဒါ့ကြောင့် ကျွန်တော့်အနေနဲ့ နိုင်ငံတကာအသိုင်း အဝိုင်း နဲ့ ဒေသတွင်း အိမ်နီးချင်းနိုင်ငံ တွေကို အထူး မေတ္တာရပ်ခံလိုတာကတော့ – စစ်မှန်တဲ့ လူထုအစိုးရနဲ့သာ နိုင်ငံ့အတွင်းက ပြည်သူတို့ရဲ့ ဒုက္ခတွေကို အပြီးဆုံးတိုင် လွတ်မြောက် အောင် လုပ်ဆောင်နိုင်မှာ ဖြစ်ကြောင်း သိစေချင်ပါတယ်။ ပြည်သူလူထုတရပ်လုံး ခံစားနေရတဲ့ ဘေးဒုက္ခတွေဟာ လတ်တလော အနာသက်သာရုံ၊ “ဆေးမြီးတိုနည်းလောက် နဲ့” အမှန်တကယ် မပျောက်နိုင်ဘူးဆိုတာ နိုင်ငံတကာအသိုင်းအဝိုင်း တစ်ခုလုံး နဲ့ ဒေသတွင်းနိုင်ငံအားလုံးကို အလေးအနက်ထား သိစေချင်ပါတယ်” ဟု ၎င်းက ဆက်လက်ပြောဆိုသည်။

NUG အနေဖြင့် ငလျင်ဒဏ်သင့်ပြည်သူများကို ကူညီရေးအတွက် တတ်စွမ်းသမျှ ကြိုးစားသွားမည်ဖြစ်ပြီး နိုင်ငံ တကာအထောက်အပံ့များကိုလည်း အောက်ခြေပြည်သူလူထုဆီသို့ အဖိတ်အစင်မရှိဘဲ ပြည့်ပြည့်ဝဝ တိုက်ရိုက် ရောက်ရှိနိုင်စေရန်လိုအပ်ကြောင်း၊ ကူညီကယ်ဆယ်ရေးအတွက် လုပ်ဆောင်ပေးနေသော ကျွမ်းကျင်ပညာရှင်များနှင့် နိုင်ငံတကာကိုလည်း အမျိုးသားညီညွတ်ရေးအစိုးရက ကျေးဇူးတင်ကြောင်း NUG ယာယီသမ္မတက ထုတ်ဖော်ပြောဆိုသည်။

#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar