ရန်ကုန်၊ ဧပြီ ၂
ရှမ်းပြည်နယ်မြောက်ပိုင်း၊ နောင်ချိုမြို့နယ်တွင် တရုတ်ကြက်ခြေနီအသင်း၏ ကူညီရေး ယာဉ်တန်းကို ကြိုတင် သတင်းပေးပို့ထားခြင်းမရှိ၍ စစ်တပ်က ပစ်ခတ်တားဆီးခဲ့ကြောင်း စစ်ကောင်စီပြောခွင့်ရ အကြမ်းဖက် ဇော်မင်းထွန်းက ဝန်ခံပြောဆိုလိုက်သည်။
စစ်ကောင်စီ၏ ဝါဒဖြန့် တယ်လီဂရန်ချန်နယ်များမှတစ်ဆင့် တရုတ်ကြက်ခြေနီ အသင်း၏ ယာဉ်တန်းပစ်ခတ်ခံရမှုနှင့်ပတ်သက်၍ အကြမ်းဖက် ဇော်မင်းထွန်းက ထိုသို့ ရှင်းလင်းချက် ထုတ်ပြန်လာခြင်းဖြစ်သည်။
ယမန်နေ့ ဧပြီလ ၁ ရက်နေ့ ညနေ ၉ နာရီ ၃၀ မိနစ်အချိန် နောင်ချိုမြို့နယ်၊ အုမ္မတီးကျေး ရွာအနီးသို့ ရောက်ရှိလာသော တရုတ်ကြက်ခြေနီအသင်း၏ ကူညီကယ်ဆယ်ရေး ယာဉ်တန်းကို ပစ်ခတ်တားဆီးခဲ့ကြောင်း၊ အဆိုပါ ယာဉ်တန်းသည် ဝင်ရောက်မည်ကို ကြိုတင် အကြောင်းကြားထားခြင်းမရှိကြောင်း ၎င်းက ဆိုသည်။
“အခုဖြစ်ခဲ့တဲ့ အဖွဲ့အနေနဲ့ မြန်မာနိုင်ငံကိုရော သက်ဆိုင်ရာ စစ်သံရုံးကိုရော အကြောင်းကြားထားခြင်းမရှိဘူးဆိုတာ ပထမဦးစွာ သိရပါတယ်။ ဖြစ်စဉ်အနေနဲ့ကတော့ ဖြစ်တဲ့နေရာကတော့ နောင်ချိုမြို့နယ် အုမ္မတီးရွာအနီးမှာ ဖြစ်ခဲ့တာဖြစ်တယ်။ အဲဒီနေရာမှာလည်း တပ်မတော်နဲ့ TNLA တို့အကြား တိုက်ပွဲတွေဖြစ်ပွားနေတာကို ကျနော်တို့အားလုံး သတင်းများ သိရှိနိုင်ပါတယ်။ ဖြစ်စဉ်မှာ ဧပြီလ ၁ ရက်နေ့ည ၉ နာရီခွဲလောက်မှာ နောင်ချိုဘက်ကနေပြီး ယာဉ်တန်း ၉ စီးလောက်ပါတယ်လို့ ပြောပါတယ်။ အုမ္မတီးရွာနားမှာ ကျနော်တို့ တပ်မ တော်လုံခြုံရေးအဖွဲ့ရှိပါတယ်။ တပ်မတော်လုံခြုံရေးအဖွဲ့အနေနဲ့ ဒီယာဉ်တန်းကို တွေ့တဲ့အခါမှာ တားဆီးပါတယ်။ တားဆီးလို့မရတဲ့အခါမှာ မီတာ ၁၀၀ အကွာ လောက်ကတည်းက မီးထိုးပြီးတော့ တားဆီးတယ်။ မီတာ ၁၀၀ လောက် မှာတော့ မိုးပေါ်ထောင်ပြီး သေနတ် ၃ ချက် ပစ်ဖောက်ခဲ့တယ်လို့ သိရပါတယ်။ ဒါနဲ့ နောင်ချို ဘက်ကို ပြန်သွားတယ်လို့ အကြမ်းဖျဉ်းသိရပါတယ်။ ကားတွေက မြန်မာနိုင်ငံနံပါတ်တွေရဲ့ ကားတွေပဲဖြစ်ပါတယ်” ဟု အကြမ်းဖက် ဇော်မင်းထွန်းက ဝန်ခံသည်။
TNLA ၏ သတင်းထုတ်ပြန်ချက်တွင်မူ စစ်ကောင်စီကို ကြိုတင် သတင်းပေးပို့ထားသော်လည်း တရုတ်ကြက်ခြေနီ အသင်း၏ ငလျင်ဘေးသင့်ပြည်သူများ ထောက်ပံ့ရေး ကား ၉ စီးကို စစ်တပ်က နောင်ချိုမြို့နယ်တွင် ပစ်ခတ်ခဲ့ကြောင်း သိရှိရသည်။
ယမန်နေ့ ဧပြီလ ၁ ရက်နေ့ ည ၉ နာရီ ၂၁ မိနစ် အချိန် တရုတ်နိုင်ငံကြက် ခြေနီအသင်းက မြန်မာနိုင်ငံ ငလျင်ဘေးသင့်ပြည်သူများအတွက် ထောက်ပံ့ရေးပစ္စည်းများ သယ်ဆောင်လာသည့် ယာဉ်တန်း ၉ စီးကို စစ်ကောင်စီတပ်က စက်လက်သေနတ်ဖြင့် ပစ်ခတ်ခဲ့ကြောင်း၊ အဆိုပါယာဉ်တန်းမှာ မန္တလေးမြို့သို့ ခရီးဆက်ရာတွင် နောင်ချိုမြို့နယ် အုမ္မတီးကျေးရွာတွင် စစ်ကောင်စီတပ်၏ အသင့် စောင့်ဆိုင်း ပစ်ခတ်ခြင်းကို ခံခဲ့ရကြောင်း သိရှိရသည်။
တရုတ်ကြက်ခြေနီအသင်း၏ အကူအညီပေးရေး ယာဉ်တန်းသည် မန္တလေးမြို့သို့ ခရီးဆက်သွားမည့်အကြောင်းကိုလည်း စစ်ကောင်စီထံ သတင်းပေးပိုခဲ့ပြီးဖြစ်သော်လည်း ယခုကဲ့သို လမ်းခရီးတွင် ပစ်ခတ်ခံခဲ့ရပြီး နောင်ချိုမြိုသို ပြည်လည်ဆုတ်ခွာ လာခဲ့ရကြောင်း သိရှိရသည်။
တရုတ်နိုင်ငံကြက်ခြေနီအသင်း၏ မြန်မာနိုင်ငံ ငလျင်ဘေးသင့်ပြည်သူများအတွက် ထောက်ပံ့ရေးပစ္စည်းများ သယ်ဆောင်လာသည့် ယာဉ်တန်းကို TNLA က ကာကွယ်စောင့်ရှောက်ပေးထားပြီး ၎င်းတို့လိုရာခရီးကို ဆက်လက်ပို့ ဆောင် သွားမည်ဟု TNLA က ထုတ်ပြန်ကြေညာသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
