မြောက်ပိုင်းမဟာမိတ် ၃ ဖွဲ့က တစ်ဖက်သတ် အပစ်ရပ်သော်လည်း စစ်တပ်က နောင်ချိုမြို့နယ်နှင့်သပိတ်ကျင်းမြို့နယ်တို့တွင် ထိုးစစ်ဆင်ပြီး စစ်အင်အားဖြည့်တင်းခြင်း၊ လေကြောင်းတိုက်ခိုက်မှုများ လုပ်နေဟု TNLA ပြော
ရန်ကုန်၊ ဧပြီ ၃
မြောက်ပိုင်းညီနောင်မဟာမိတ် ၃ ဖွဲ့က တစ်ဖက်သတ် အပစ်ရပ်သော်လည်း စစ်ကောင်စီက နောင်ချိုမြို့နယ်သို့ ထိုးစစ်ဆင်ပြီး စစ်အင်အားဖြည့်တင်းမှုများ လုပ်နေကြောင်း တအာင်းTNLAက ယနေ့ညပိုင်း ထုတ်ပြန် ပြောဆိုသည်။
ယနေ့ ဧပြီလ ၃ ရက်နေ့ မွန်းလွဲ ၁၂ နာရီအချိန် စစ်ယာဉ်တန်း ၇ စီးနှင့် လူအင်အားဖြည့်တင်းပြီး အင်တောမှ ကျောက်ဂူ၊ တောင်ချေ၊ အမတ ၉၀၂ သို့ စစ်ကူအင်အားဖြည့်တင်းနေခဲ့ကြောင်း၊ ထို့ပြင် သပိတ်ကျင်းမြိုနယ် ၇ မိုင်တွင်လည်း လေကြောင်း ဂျက်ဖိုက်တာဖြင့် ၄ ကြိမ်၊ ဗုံး ၈လုံး လာရောက်ကျဲချ တိုက်ခိုက်ခဲ့ကြောင်း သိရှိရသည်။
စစ်ကောင်စီတပ်ဘက်တွင်လည်း ဧပြီလ ၂ ရက်နေ့မှ ၂၀ ရက်နေ့ထိ အပစ်ရပ်သည်ဟု ကြေညာခဲ့ပြီး နိုင်ငံတော်အဆင့် ဝမ်းနည်းခြင်းအထိမ်းအမှတ်နေ့ရက်ဟု ထုတ်ပြန်ကြေညာသော်လည်း လေကြောင်းဖြင့် နေစဉ် အသုံးပြုတိုက်ခိုက်နေကြောင်း သိရှိရသည်။
မြောက်ပိုင်းညီနောင်မဟာမိတ် ၃ ဖွဲ့ က ငလျင်ဒဏ်သင့်ပြည်သူများနှင့် လူထု၏ အခက်အခဲများကို စာနာထောက် ထားသောအားဖြင့် တိုက်ပွဲဖြစ်ပွားလျက်ရှိသောနေရာများတွင် ထိုးစစ်များကို ပြုလုပ်မည်မဟုတ်ဘဲ တစ်လတာ တစ်ဖက်သတ် အပစ်ရပ်ကြောင်း ဧပြီလ ၁ရက်နေ့တွင် ထုတ်ပြန်ကြေညာခဲ့သည်။
အလားတူ စစ်ကောင်စီက ကချင်ပြည်နယ်၊ စစ်ကိုင်းတိုင်းနှင့် မကွေးတိုင်း၊ မန္တလေးတိုင်း အပါအဝင် နိုင်ငံတစ်ဝန်းတွင် ထိုးစစ်များ ဆက်လက် ဆင်နွှဲလျက်ရှိကြောင်း သိရှိရသည်။
