ရန်ကုန်၊ ဧပြီ ၄
မန္တလေးရှိ အမှတ် ၂ စစ်တပ် ပရိဘောဂစက်ရုံ ငလျင်ဒဏ်ကြောင့် ပြိုကျပျက်စီးမှုဖြစ်ပွားခဲ့ပြီး ၃ ဦးသေဆုံးကာ ၉ ဦးဒဏ်ရာရရှိကြောင်း စက်ရုံမှ သတင်းရင်းမြစ်က ပြောဆိုသည်။
မတ်လ ၂၈ ရက်နေ့ မွန်းလွဲပိုင်း လှုပ်ခတ်ခဲ့သော ပြင်းအား ၇ ဒသမ ၇ အဆင့်ရှိ ငလျင်ကြောင့် မန္တလေး၊ တမာတန်းအနီးရှိ အမှတ် ၂ တပ်မတော် ပရိဘောဂစက်ရုံမှာလည်း ပြိုကျပျက်စီးသွားခဲ့ကြောင်း၊ အဆိုပါ စက်ရုံ ပြိုကျမှုကြောင့် စက်သမား ဦးအေးဇော်၊ ပစ္စည်းထိန်းလုပ်သား ဦးမြင့်နိုင် ၊ အခြားအလုပ်သမားတစ်ဦး စုစုပေါင်း ၃ ဦးသေဆုံးခဲ့ကြောင်း သိရှိရသည်။
ထိခိုက်ဒဏ်ရာရရှိသူများအနေဖြင့် စက်လုပ်သားနှင့် နေ့စား လုပ်သားများဖြစ်သည့် အောင်စိုးမင်း၊ အောင်မိုးဟိန်း၊ မကြူကြူသင်း၊ ဦးခင်မောင်လွင်၊ ဦးဝင်းညွန့် အပါအဝင် ၉ ဦး ဒဏ်ရာရရှိခဲ့ကြောင်း သိရှိရသည်။
ငလျင်ကြောင့် အမှတ် ၂ တပ်မတော် ပရိဘောဂစက်ရုံဝင်းအတွင်းရှိ ဝန်ထမ်းအိမ်ရာများလည်း ပြိုကျပျက်စီးသွားပြီး ကူညီသူမဲ့ကြောင်း၊ စက်ရုံ၏ စက်ရုံမှူး ဗိုလ်မှူး ခွန်အုန်းလွင်မှာလည်း တစ်စုံတစ်ရာ အကူအညီပေးမှုမရှိကြောင်း သိရှိရသည်။
“အမှတ် ၂ တပ်မတော် ပရိဘောဂစက်ရုံကို နန်းတွင်းထဲက GEဆိုတဲ့ ဆောက်လုပ်ရေးတပ်က ဗိုလ်မှုး ခွန်အုန်းလွင်က အုပ်ချုပ်မှုတာဝန်အရာရှိအဖြစ် တာဝန်ယူ အုပ်ချုပ်ပါတယ်။ ဗိုလ်မှူး ခွန်အုန်းလွင်ကပဲ ထောက်ပံ့မှု တွေကို ကိုယ်ကျိုးတွက်သုံးနေတာလား၊ ပရိဘောဂစက်ရုံမှာရှိတဲ့ အရပ်သား တာဝန်ခံ ဝင်းညွန့်ကပဲ တစ်ဖက်မှာ ပိုက်ဆံတွေကောက်ခံပြီး ထောက်ပံ့မှုတွေကိုကိုယ်ကျိုးတွက်သုံးနေတာလား မသိဘူး။ ငလျင်ဒဏ်သင့်သူတွေကတော့ ဘာအကူအညီမှ မရကြဘူး” ဟု သတင်းရင်းမြစ်က ဆိုသည်။
လက်ရှိ စက်ရုံအတွင်း ငလျင်ဒဏ်သင့် ဝန်ထမ်းမိသားစုများမှာ ရေပြတ်၊ မီးပြတ်၊ အစားအသောက်စားစရာမရှိဘဲ ခက်ခဲကျပ်တည်းနေကြောင်း၊ ဝန်ထမ်းအိမ်ရာများမှာလည်း ပျက်စီးနေသဖြင့် နေထိုင်ရေးပါ ခက်ခဲနေကြောင်း သိရှိရသည်။
ဓာတ်ပုံ – ငလျင်ကြောင့် ပြိုကျပျက်စီးနေသော နေပြည်တော်မှ ဝန်ထမ်းအိမ်ရာတစ်ခု။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
