စစ်တပ်က အာဏာ ထိန်းချုပ်လိုက်ခြင်းကြောင့် NCA နှင့် ငြိမ်းချမ်းရေးလုပ်ငန်းစဉ်များ ရပ်တန့်သွားရဟု RCSS ထုတ်ပြော၊ နေပြည်တော် NCA ၁၀ နှစ်ပြည့် နှစ်ပတ်လည်ပွဲသို့ RCSS ခေါင်းဆောင် ဗိုလ်ချုပ်ကြီး ရွက်ဆစ် မတက်

ရန်ကုန်၊ အောက်တိုဘာ ၁၇

အကြမ်းဖက်စစ်တပ်က တိုင်းပြည်အာဏာကို ထိန်းချုပ်လိုက်ခြင်းကြောင့် တစ်နိုင်ငံလုံးအပစ်အခတ်ရပ်စဲရေး NCA စာချုပ်နှင့် ငြိမ်းချမ်းရေးလုပ်ငန်းစဉ်များ ရပ်တန့်သွားရကြောင်း ရှမ်းပြည်ပြန်လည်ထူထောင်ရေးကောင်စီ(RCSS) က ယမန်နေ့ သတင်းထုတ်ပြန်သည်။

NCA ၁၀ နှစ်ပြည့်နှစ်ပတ်လည်အဖြစ် ထုတ်ပြန်သော RCSSS ၏ ကြေညာချက်တွင် ထိုကဲ့သို့ ထုတ်ဖော်ပြောဆိုလိုက်ခြင်းဖြစ်ပြီး နေပြည်တော်တွင် ပြုလုပ်သည့် NCA ၁၀ နှစ်ပြည့် နှစ်ပတ်လည်သို့လည်း RCSS ခေါင်းဆောင် ဗိုလ်ချုပ်ကြီး ရွက်ဆစ် တက်ရောက်ခဲ့ခြင်းမရှိသည်ကို တွေ့ရသည်။

NCA ၁၀ နှစ်ပြည့်မြောက်ခဲ့သော်လည်း အားနည်းချက်နှင့် စိန်ခေါ်မှုများကြောင့် NCA အကောင်အထည်ဖော်ခြင်းကို ရည်မှန်းထားသည့်အတိုင်း မဆောင်ရွက်နိုင်ခဲ့ခြင်းဖြစ်ကြောင်း၊ NCA အကောင်အထည်မဖော်နိုင်မှုနှင့် ပတ်သက်၍ အချက် ၅ ချက်ကို RCSS က ထောက်ပြခဲ့ပြီး ယင်းအချက်များတွင် စစ်တပ်က တိုင်းပြည် အာဏာ ထိန်းချုပ်လိုက်သည့်အတွက် ငြိမ်းချမ်းရေးလုပ်ငန်းစဉ်များ ရပ်တန့်သွားစေခဲ့ကြောင်း RCSS က ထောက်ပြထားသည်။

NCA အကောင်အထည်မဖော်နိုင်သည့် အခြားအကြောင်းအရင်းများတွင် နှစ်ဦးနှစ်ဖက်အကြား ယုံကြည်မှု မတည်ဆောက်နိုင်ခြင်း၊ နှစ်ဦးနှစ်ဖက် လက်မှတ်ရေးထိုးထားသည့် သဘောတူစာချုပ်အတိုင်း အကောင်အထည်မဖော်နိုင်ခြင်း၊ ၂၀၀၈ ဖွဲ့စည်းပုံ အခြေခံဥပဒေအောက်ရောက်ရှိရေးအတွက် အစိုးရက EAOs များကို ဖိအားပေး၍ လုပ်ဆောင်စေခြင်း၊ တိုင်းပြည်ပြုပြင်ပြောင်းလဲရေးအတွက် အစိုးရအနေဖြင့် စိတ်အားထက်သန်မှု နည်းပါးခြင်း ဆိုသော အချက်များ ပါဝင်ကြောင်း RCSS က ထုတ်ဖော်ပြောဆိုထားသည်။

NCA နှင့် ငြိမ်းချမ်းရေး လုပ်ငန်းစဉ်များ အောင်မြင်ရေးအတွက် RCSS က အချက် ၆ ချက် အကြံပြုထားပြီး ယင်းတို့ထဲတွင် စစ်တပ်အနေဖြင့် EAOs များနှင့် ယုံကြည်မှု တည်ဆောက်ခြင်းကို ပြန်လည် ဖော်ဆောင်ရွက်ခြင်း၊ ဆွေးနွေးပွဲအဆင့် ၁ တွင် စစ်တပ်နှင့် EAOs များ ဆွေးနွေးပြီး သဘောတူညီချက်များ ဦးစွာ ရယူခြင်း၊ အဆင့် ၂ တွင် နိုင်ငံရေးပါတီများက ပါဝင်တက်ရောက်ပြီး သုံးပွင့်ဆိုင် ဆွေးနွေးပွဲများ ပြုလုပ်ခြင်း၊ ဆွေးနွေးပွဲသို့ နိုင်ငံတကာအား အသိသက်သေများအဖြစ် ပါဝင်တက်ရောက်စေခြင်း၊ နိုင်ငံရေးဆွေးနွေးပွဲများတွင် ဖက်ဒရယ်မူကို အဓိကထားပြီး ဆွေးနွေးခြင်း၊ နိုင်ငံရေး ဆွေးနွေးပွဲမှ ရရှိလာသည့် သဘောတူညီချက်များကို လွှတ်တော်သို့ တင်သွင်း၍ ဥပဒေအဖြစ် အတည်ပြု ပြဋ္ဌာန်းခြင်းတို့ ဖြစ်ကြောင်း သိရှိရသည်။

ယင်းအပြင် NCA ၏ အနှစ်သာရဖြစ်သည့် ဖက်ဒရယ် ဒီမိုကရေစီ ပြည်ထောင်စု တည်ဆောက်ရေးအတွက် အဘက်ဘက်မှ ဆွေးနွေးခြင်း နည်းလမ်းဖြင့် တွေ့ဆုံ အကောင်အထည်ဖော်သွားကြရန် တိုက်တွန်းထားသည်။

ရန်ကုန်ခေတ်သစ်သတင်းဌာနက RCSS ၏ ထုတ်ပြန်ကြေညာချက်နှင့်ပတ်သက်၍ အသေးစိတ် ထပ်မံမေးမြန်းရန် ဗိုလ်မှူးခမ်းစံနှင့် ဒုတိယဗိုလ်မှူးကြီး အုမ်ခေးတို့ကို ယမန်နေ့ တစ်နေ့လုံး ဆက်သွယ်မေးမြန်းသော်လည်း ဖုန်းလက်ခံဖြေဆိုခြင်းမရှိပေ။

#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar