မကွေးတိုင်း၊ မင်းလှမြို့နယ်တွင် အင်အား ၆၀ ခန့်ပါ စစ်တပ်စစ်ကြောင်းနှင့် တော်လှန်ရေးတပ်များအကြား တိုက်ပွဲဖြစ်ပွားပြီး စစ်တပ်ဘက်မှ ၁၂ ဦးသေဆုံးကြောင်း ပြည်သူ့ကာကွယ်ရေးတပ်မတော်၊ မင်းဘူးခရိုင် အမှတ် ၂ တပ်ရင်းမှ ဆရာကျောင်းက ရန်ကုန်ခေတ်သစ်သတင်းဌာနထံသို့ ပြောဆိုသည်။
အောက်တိုဘာလ ၁၆ ရက်နေ့ ညနေ ၃ နာရီ ၃၀ မိနစ်အချိန် မလွန်ကပစ ၂ မှ တပ်အပြောင်းအလဲလုပ်ရန် ထွက်လာသော အင်အား ၆၀ ခန့်ပါသော စစ်ကား ၂ စီးကို မင်းလှမြို့နယ်၊ လက်ပံတံခါးကျေးရွာ၊ သရက်အုပ်လမ်းခွဲ ၊ စာသင်ကျောင်းအနီးတွင် ဒုတပ်ခွဲမှူး ၀ဿန် ဦးဆောင်သော တော်လှန်ရေးတပ်ဖွဲ့က ကြားဖြတ်တိုက်ခိုက်ခဲ့ကြောင်း၊ တိုက်ပွဲမှာ ညနေ ၄ နာရီ ၅ မိနစ်အချိန်အထိ ဖြစ်ပွားခဲ့ကြောင်း ၊ အဆိုပါ တိုက်ပွဲတွင် စစ်တပ်ဘက်မှ ၁၂ ဦးသေဆုံးပြီး ၂၆ ဦး ထိခိုက်ဒဏ်ရာရရှိကာ စစ်ကား ၂ စီးလည်းပျက်စီးသွားကြောင်း သိရှိရသည်။
အဆိုပါ တိုက်ပွဲတွင် ဒုတပ်ခွဲမှူး ဝဿန်မှာ ဒဏ်ရာရရှိထားပြီး မပြေးနိုင်တော့သဖြင့် လက်အောက်ငယ်သား တော်လှန်ရေးရဲဘော်များကို တပ်ပြန်ဆုတ်ခိုင်းခဲ့ကြောင်း၊ ဒဏ်ရာ အပြင်းအထန်ရရှိ၍ မပြေးနိုင်တော့သည့် ဒုတပ်ခွဲမှူး ၀ဿန်က စစ်တပ်ထံတွင် အဖမ်းမခံတော့ဘဲ လက်ပစ်မိုင်းကို ဖောက်ခွဲ၍ မိမိကိုယ်ကို အဆုံးစီရင်သွားကြောင်း သိရှိရသည်။
” ဒုတပ်ခွဲမှူး ၀ဿန်က လက်ပစ်မိုင်းကို စနက်တံဖြုတ်ပြီး ကိုယ့်ကိုကိုယ်အသေ ခံသွားတာ။ ကျန်ရဲဘော်တွေကို သူ့မှာပါတဲ့သေနတ်ကိုပေးပြီး မိုးကလည်း အရမ်းရွာ၊ မထနိုင်တော့ သူ့ ရဲဘော်တပ်စိတ်မှူးကို သေနတ်ပေးပြီး ဗိုက်အောက် မှာ မိုင်းထားပြီးဖောက်ခွဲခဲ့တာပါ။ အာဇာနည်သူရဲကောင်းတစ်ဦးအဖြစ် မြင့်မြတ်စွာကျဆုံးခဲ့ရတာပါ” ဟု ပြည်သူ့ကာကွယ်ရေးတပ်မတော်၊ မင်းဘူးခရိုင် အမှတ် ၂ တပ်ရင်းမှ ဆရာကျောင်းက ရန်ကုန်ခေတ်သစ်သတင်းဌာနထံသို့ ပြောဆိုသည်။
စစ်တပ်ဘက်တော်သား လော်ဘီတယ်လီဂရမ်များတွင် မင်းလှတိုက်ပွဲအတွင်း PDF ၁ ဦးမှာ စစ်တပ်၏ RPG ကျည်ထိမှန်၍ ခန္ခာကိုယ် အစိတ်အမွှာအမွှာ ဖြစ်ပြီး သေဆုံးသည်ဟု ဓာတ်ပုံနှင့်တကွ လိမ်လည်သတင်းထုတ်ပြန်ထားကြောင်း မင်းဘူးခရိုင် အမှတ် ၂ တပ်ရင်းမှ ဆရာကျောင်းက ရှင်းပြသည်။
