ရန်ကုန်၊ ဧပြီ ၂၅
တနင်္သာရီတိုင်း၊ ဘုတ်ပြင်းမြို့နယ်၊ KNU တပ်မဟာ ၄ နယ်မြေရှိ စစ်တပ်၏ ဘိုဒါးစခန်းကို တိုက်ခိုက်သိမ်းပိုက်လိုက်ပြီး ကရင်ပြည်နယ်၊ မြ၀တီမြို့နယ်အတွင်း ရှိ ဝေါ်လေဗျူဟာကုန်းတိုက်ပွဲမှာလည်း အလွန်ပြင်းထန်နေကြောင်း KNU ၏ သတင်းထုတ်ပြန်ချက်နှင့် KNU စစ်ရေး သတင်းရင်းမြစ်၏ ပြောဆိုချက်အရ သိရှိရသည်။
ဧပြီလ ၂၀ ရက်နေ့မှစတင်၍ KNU ကော်သူလေး အုပ်ချုပ်ရေးနယ်မြေ၊ မြိတ်-ထားဝယ်ခရိုင်၊ လယ်ကဆောမြို့နယ်၊ ဘုတ်ပြင်းမြို့နှင့်ပြည်ကြီးမဏ္ဍိုင်မြို့ အကြား ပြည်ထောင်စုလမ်းမပေါ်ရှိ ဘိုဒါးကျေးရွာအတွင်းတွင် စစ်တပ်က ၂ နှစ်ကျော်အကြာ တပ်စွဲထားသော ဘိုဒါးစခန်းကို KNLA ဦးဆောင်သော တော်လှန်ရေးတပ်များက တိုက်ခိုက်ခဲ့ကြောင်း၊ ယမန်နေ့ ဧပြီလ ၂၄ ရက်နေ့ ညနေ ၃ နာရီအချိန် အဆိုပါ စခန်းမှ အကြမ်းဖက်စစ်တပ် တပ်ဖွဲ့ဝင်အားလုံး ထွက်ပြေးသွားသဖြင့် စခန်းကို အပြီး သတ် သိမ်းပိုက်နိုင်ခဲ့ကြောင်း သိရှိရသည်။
အလားတူ ကရင်ပြည်နယ်၊ မြ၀တီမြို့နယ်၊ KNU တပ်မဟာ ၆ နယ်မြေအတွင်းရှိ KNLA ဦးဆောင်သည့် တော်လှန်ရေးတပ်များက ၀ိုင်းဝန်းပိတ်ဆို့ထားသော စစ်တပ်၏ ဝေါ်လေဗျူဟာကုန်းတွင်လည်း တိုက်ပွဲများ ပြင်းထန်နေကြောင်း သိရှိရသည်။
၂၀၂၅ ခုနှစ် ဇူလိုင်လကတည်းက အဆိုပါ ဝေါ်လေ ဗျူဟာကုန်း စစ်တပ်စခန်းကို တော်လှန်ရေးတပ်ဖွဲ့များ က ယခုရက်ပိုင်းအတွင်း ထိုးစစ်တိုးမြှင့်၍ တိုက်ခိုက်ခဲ့ရာ စစ်တပ်ကာကင်းစခန်းများကို သိမ်းပိုက်နိုင်ခဲ့ကြောင်း သိရှိရသည်။
“ဝေါ်လေမှာတော့ တိုက်ပွဲတွေ ပြင်းထန်နေတယ်။ ကာကင်းစခန်းတွေတော့ တောက်လျှောက် ရတာရှိတယ်။ ဒီနေ့မှာ တိုက်ပွဲ အတော်ကို ပြင်းထန်တယ်။ သူတို့ဘက်က လေကြောင်းကင်းထောက်တာတွေရှိနေတော့ လေယာဉ်နဲ့ ဗုံးကျဲတာတွေ ဖြစ်လာနိုင်တယ်” ဟု KNU စစ်ရေး သတင်းရင်းမြစ်က ပြောဆိုသည်။
အကြမ်းဖက်စစ်တပ်က ကရင်ပြည်နယ်၊ မြ၀တီမြို့နယ်နှင့် ထိုင်း-မြန်မာနယ်စပ်တစ်လျှောက်ကို ထိန်း ချုပ်နိုင်ရေးအတွက် ထိုးစစ်များ တိုးမြှင့်နေပြီး KNLA ဦးဆောင်သော တော်လှန်ရေးတပ်များကလည်း ခုခံစစ်အပြင် စခန်းသိမ်းတိုက်ပွဲများကို တိုးမြှင့်တိုက်ခိုက်လျက်ရှိကြောင်း သိရှိရသည်။
