ရန်ကုန်၊ ဧပြီ ၂၉
မန္တလေးတိုင်း၊ မြင်းခြံမြို့နယ်နှင့် နွားထိုးကြီးမြို့နယ်အတွင်းရှိ ကျေးရွာ ၁၆ ခုကို စစ်ကြောင်းထိုးမီးရှို့ပြီး ပစ္စည်းများ လိုက်လံ ခိုးယူနေသည့် အကြမ်းဖက် စစ်တပ်ကို တိုက်ခိုက်ရာ စစ်သား ၂၀ ကျော်သေဆုံးပြီး စစ်ဝတ်စုံများ သိမ်းဆည်းရရှိခဲ့ကြောင်း Natogyi People Defence Force မြင်းခြံခရိုင်အမှတ်(၄-၁၀)တပ်ရင်းမှ ပြောရေးဆိုခွင့်ရှိသူ ဆရာစိုးက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဧပြီလပိုင်းမှ စတင်ပြီး မြင်းခြံမြိုနယ်အတွင်းရှိ ပျားရွာ၊ ထိန်ပန်းရွာ၊ ရွာသစ်ရွာ၊ ကျီးပင်ကန်ရွာ၊ တူရွင်းဘိုရွာ၊ ပျိုးကန်ရွာ၊ ဆိတ်ကုန်းရွာ၊ ဒူလဘိုရွာ၊ နွားကူးအိုင်ရွာ၊ ဖက်ပင်အိုင်ရွာ၊ ရွှေဘုံသာရွာ၊ ရဲတိုင်ရွာ၊ မြိုကြီးကုန်းရွာ၊ အိုင့်မရွာ၊ ဖက်ရင်းရွာနှင့် ကျောင်းဖြူကန်ရွာ တို့ကို အကြမ်းဖက် စစ်တပ်က စစ်ကြောင်းထိုးပြီး ကျေးရွာများအတွင်းရှိ ပြည်သူပိုင် ပစ္စည်းဥစ္စာများ ခိုးယူကာ နေအိမ်များကို မီးရှို့ဖျက်ဆီးခြင်းများ လုပ်ဆောင်နေသောကြောင့် တော်လှန်ရေးတပ်ဖွဲ့များနှင့် ထိတွေ့ တိုက်ပွဲများ ဖြစ်ပွားခဲ့ကြောင်း သိရသည်။
“ရန်သူရဲ့ထိုးစစ်ကာလ ဖြစ်တဲ့အတွက် ပြည်သူတွေ မီးရှို့ခံထားရတာတွေ အသတ်ခံရတွေလည်း ရှိတယ်။ ဒါကြောင့်မို့ အခုချိန်မှာတော့ စစ်ကောင်စီက မြို့ပေါ်တွေမှာတော့ ပျော်ပွဲရွှင်ပွဲတွေလုပ်ပြီး ပြည်သူကိုအယုံသွင်းပေမယ့် ဒီလိုမျိုး ကျနော်တို့ အညာဒေသ ကျေးလက်ဒေသတွေကိုတော့ ရက်ရက်စက်စက် မီးရှို့သတ်ဖြတ်နေတာတွေ ရှိတယ်ပေါ့။ ဒါကြောင့် အခုချိန်မှာ မြို့ပေါ်က ပြည်သူလူထုတွေ အနေနဲ့လည်း အရမ်းကြီး ရန်သူကို ယုံကြည်နေတာမျိုးတွေ မဖြစ်စေချင်ပါဘူး။ အတက်နိုင်ဆုံး သတိဝီရိယလေးနဲ့ ဆင်ဆင်ခြင်ခြင်နေကြထိုင်ကြဖို့လည်း ကျနော်အနေနဲ့ ပြောလိုပါတယ်။ စစ်ကောင်စီ စုရပ်လုပ်တဲ့နေရာတွေ သူတို့စုဝေးတဲ့နေရာတွေ အထိုင်ချတဲ့ စခန်းနေရာတွေနဲ့လည်း ဝေးဝေးမှာ ရှောင်ကြဖို့ ကျနော်အနေနဲ့ ပြောကြားလိုပါတယ်” ဟု Natogyi People Defence Force မြင်းခြံခရိုင်အမှတ်(၄-၁၀)တပ်ရင်းမှ ပြောရေးဆိုခွင့်ရှိသူ ဆရာစိုးက ပြောဆိုသည်။
ဧပြီလ ၂၄ ရက်နေ့ နံနက် ၆ နာရီ ၃၀ မိနစ်ခန့်တွင် နွားထိုးကြီးမြို့နယ်၊ ခံစပ်ကုန်း(န)ရွာကို အင်အား ၃၀၀ ကျော်ပါ စစ်ကြောင်းသည် စစ်ကြောင်း ၂ ကြောင်းခွဲ၍ စစ်ကြောင်းထိုးလာစဉ် တော်လှန်ရေးတပ်ဖွဲ့များနှင့် တနေကုန်နီးပါး တိုက်ပွဲ ဖြစ်ပွားခဲ့ကြောင်း၊ တိုက်ပွဲအတွင်း အကြမ်းဖက် စစ်တပ်ဘက်မှ ဒရုန်း ၊ လက်နက်ကြီး အများအပြား အသုံးပြုတိုက်ခိုက်ခဲ့ပြီး စစ်သား ၅ ဦး သေဆုံးကာ ၁၀ ဦးထက်မနည်း ထိခိုက်ဒဏ်ရာရရှိခဲ့ကြောင်း သိရှိရသည်။
ဧပြီလ ၂၆ ရက်နေ့ နံနက် ၈ နာရီခန့်တွင်လည်း နွားထိုးကြီးမြိုနယ် ၊ ခံစပ်ကုန်းရွာ (တောင်ရှေ့ကန်)မှ ထွက်လာသော အင်အား ၃၀၀ ကျော်ပါ စစ်ကြောင်းသည် စစ်ကြောင်း ၃ ကြောင်းခွဲ၍ နွားထိုးကြီးမြို့နယ်၊ ညောင်ဇင်ရွာ နှင့် ကဒေါင်းရွာကို ဦးတည်စစ်ကြောင်းထိုးလာသောကြောင့် စစ်တပ်နှင့် မြင်းခြံခရိုင် အမှတ်(၄)တပ်ရင်း ၊ မြင်းခြံခရိုင် အမှတ်(၁၀)တပ်ရင်း၊ မြင်းခြံခရိုင်အထူးလှုပ်ရှားစစ်ကြောင်း၊ မန္တလေးခရိုင် အမှတ်(၃)တပ်ရင်း ၊ MGN – 35 ၊ ပြည်သူ့ကြယ်တစ်ပွင့်တပ်ဖွဲ့တို့ ထိတွေ့တိုက်ပွဲဖြစ်ပွားခဲ့ကြောင်း သိရသည်။
ညောင်ဇင်ရွာအနီး တိုက်ပွဲအတွင်း အကြမ်းဖက် စစ်တပ်ဘက်မှ ၁၀ ဦးခန့်သေဆုံးကာ ထိခိုက်ဒဏ်ရာ အများအပြားရရှိခဲ့ကြောင်း၊ တိုက်ပွဲဖြစ်ပွားပြီးနောက် စစ်တပ်က ညောင်ဇင်ရွာကို ဝင်ရောက်ပြီး ပြည်သူပိုင် နေအိမ်များကို မီးရှို့ဖျက်ဆီးခဲ့ကြောင်း၊ ထိုသို့ နေအိမ်များကို မီးရှို့နေသော အကြမ်းဖက် စစ်တပ်၏ ဒရုန်းကား ၂ စီး နှင့် ရိက္ခာကား ၁ စီးကို တော်လှန်ရေး ပူးပေါင်းတပ်က ဒရုန်းဖြင့် ဗုံးချတိုက်ခိုက်ခဲ့ရာ ဒရုန်းကား ၁ စီးနှင့် ရိက္ခာကား ၁ စီးတို့ မီးလောင်ပျက်စီးခဲ့ပြီး ကျန်ဒရုန်းကား ၁ စီးသည် ဗုံးစထိမှန်ခဲ့ကြောင်း သိရှိရသည်။
ကဒေါင်းရွာ အနီး ဖြစ်ပွားခဲ့သော တိုက်ပွဲအတွင်း အကြမ်းဖက် စစ်တပ်ဘက်မှ ၁၀ ဦးသေဆုံးကာ ထိခိုက်ဒဏ်ရာ အများအပြားရရှိခဲ့သောကြောင့် စစ်ကြောင်းသည်မှာ ပြန်လည်ဆုတ်ခွာသွားသော်လည်း အင်အားသုံး၍ ထပ်မံ စစ်ကြောင်းထိုးလာသောကြောင့် တော်လှန်ရေးတပ်ဖွဲ့များ ပြန်လည် ဆုတ်ခွာပေးလိုက်ရပြီး ကဒေါင်းရွာကို စစ်တပ် စစ်ကြောင်း ဝင်ရောက်သွားကြောင်း သိရသည်။
ထို့ပြင် တိုက်ပွဲအတွင်း ထိခိုက်ဒဏ်ရာရရှိခဲ့သော စစ်သားများကို နွားထိုးကြီးမြို့နယ်၊ ကဒေါင်းရွာကို ခေါ်ဆောင်သွားပြီး ကျေးရွာအရောက်တွင် ထပ်မံသေဆုံးမှုများလည်းရှိကြောင်း၊ ထိုမှ တဆင့် စစ်ကြောင်းသည် နွားထိုးကြီးမြို့သို့ ဦးတည်ထွက်ခွာလာစဥ် ထပ်မံသေဆုံးသော စစ်သားအလောင်းများကို နွားလှည်း၊ ဆိုင်ကယ်များဖြင့် သယ်ဆောင်သွားကြောင်း၊ တိုက်ပွဲ ဖြစ်ပွားစဥ်အတွင်း အကြမ်းဖက် စစ်သား အလောင်း ၁ လောင်း ၊ ခဲယမ်းအချို့ ၊ ပြန်လည်အသုံးပြုနိုင်သော ကား ၁ စီး နှင့် ဒရုန်းကား ၁ စီး ၊ ရိက္ခာကား ၁ စီးတို့ကို မီးရှို့ဖျက်ဆီးနိုင်ခဲ့ကြောင်း သိရှိရသည်။
