ထိုင်းအများပိုင်ကုမ္ပဏီတွင် မြန်မာစစ်လက်နက်ပွဲစား ကျော်မင်းဦး ကုမ္ပဏီများက ရှယ်ယာလွှဲပြောင်း ရင်နှီးမြှုပ်နှံရန် ခွင့်ပြုလိုက်မှု ထိုင်းအာဏာပိုင်များက တားမြစ်ပိတ်ပင် စုံစမ်းစစ်ဆေးရန် JFM တောင်းဆို

ရန်ကုန်၊ မေ ၁

ထိုင်းအများပိုင်ကုမ္ပဏီတွင် မြန်မာစစ်လက်နက်ပွဲစား ကျော်မင်းဦး၏ ကုမ္ပဏီများက ရှယ်ယာလွှဲပြောင်း ရင်နှီးမြှုပ်နှံရန် ခွင့်ပြုလိုက်မှုအပေါ် ထိုင်းအာဏာပိုင်များက တားမြစ်ပိတ်ပင် စုံစမ်းစစ်ဆေးရန် Justice For Myanmar- JFM က တောင်းဆိုသည်။

ဧပြီလ ၂၇ ရက်နေ့တွင် ထိုင်းစတော့အိတ်ချိန်းစာရင်းဝင်ကုမ္ပဏီ Advanced Connection Corporation Public Company Limited (ACC) ၏ ရှယ်ယာရှင်များက ကျော်မင်းဦး ဦးဆောင်လုပ်ကိုင်နေသည့် မြန်မာစစ်လက်နက်ပွဲစားကွန်ရက် Sky Aviator ၏ ကုမ္ပဏီနှစ်ခုထံသို့ ကြီးမားသော အစုရှယ်ယာ ပမာဏတစ်ရပ်ကို ရောင်းချရန် အတည်ပြုခဲ့ကြသည်။

အဆိုပါ သီးသန့်ရှယ်ယာလွှဲပြောင်းရောင်းချမှုဆိုင်ရာ ဆုံးဖြတ်ချက်ကို ထောက်ခံမဲ ၈၇ ဒသမ ၁၆ ရာခိုင်နှုန်း၊ ကန့်ကွက်မဲ ၁၂ ဒသမ ၈၄ ရာခိုင်နှုန်းဖြင့် အတည်ပြုခဲ့ခြင်းဖြစ်သည်။ ငွေကြေးခဝါချမှုဆိုင်ရာ စိုးရိမ်ချက်များ၊ ရင်းနှီးမြှုပ်နှံသူများ၏ အမှန်တကယ် အကျိုးခံစားခွင့်ရှိသူပိုင်ရှင်များအပေါ် မရှင်းလင်းနိုင်သေးသည့် မေးခွန်းများ၊ ကုမ္ပဏီ၏ ဘဏ္ဍာရေးအကြံပေးမှ အတည်မပြုရန် အကြံပြုထားချက်များနှင့် ထိုင်းနိုင်ငံ ချေးငွေသက်သေခံလက်မှတ်နှင့် လဲလှယ်ရေးကော်မရှင် (SEC) မှ ရှယ်ယာရှင်များနှင့် ပတ်သက်သော လုံလောက်သည့် အချက် အလက်များ ထပ်မံပေးအပ်ရန် ACC သို့ ညွှန်ကြားထားချက်များ ရှိနေသည့်ကြားမှ ယင်းဆုံးဖြတ်ချက်ကို အတည်ပြုခဲ့ခြင်းဖြစ်သည်။

ACC နှင့် Sky Aviator ကွန်ရက်တို့အကြားရှိ အရောင်းအဝယ် ကိစ္စရပ်ကို Justice For Myanmar က အသေးစိတ် ထုတ်ပြန်လိုက်ပြီး စင်ကာပူအခြေစိုက် ကုမ္ပဏီများဖြစ်သော Sky Avia Trading Pte. Ltd. နှင့် Heli Asia Trading Pte. Ltd. တို့က ၎င်းတို့နှင့်အမည်တူပေးထားသော မကြာသေးမီကမှ တည်ထောင်ထားသည့် ၎င်းတို့၏ လက်အောက်ခံ ထိုင်း အမည်ခံဟန်ပြကုမ္ပဏီများမှတစ်ဆင့် ACC တွင် အကြီးမားဆုံး ရှယ်ယာရှင်အစုအဖွဲ့ ဖြစ်လာမည်ဖြစ်သည်။

ထိုင်းစည်းကမ်းထိန်းသိမ်းရေးအဖွဲ့က ကြားဝင်ဟန့်တားဆောင်ရွက်ခြင်း မပြုလုပ်ပါက Sky Aviator ကွန်ရက်ရှိ ကုမ္ပဏီနှစ်ခုသည် ဘတ် ၃၀၀ မီလီယံ အမေရိကန်ဒေါ်လာအားဖြင့် ဒေါ်လာ ၉ ဒသမ ၃ သန်း တန်ဖိုးရှိသော စုပေါင်းရှယ်ယာ ၂၃ ဒသမ ၂၅ ရာခိုင်နှုန်း ကို ရယူပိုင်ဆိုင်သွားမည်ဖြစ်သည်။

ယင်းရှယ်ယာရောင်းချမှုသည် ထိုင်းနိုင်ငံသား တစ်သီးပုဂ္ဂလရင်းနှီးမြှုပ်နှံသူ Wichai Wanavit ပါဝင်သည့် စုစုပေါင်း ဘတ် ၃၅၀ မီလီယံ (အမေရိကန်ဒေါ်လာ ၁၀ ဒသမ ၈ သန်း) တန်ဖိုးရှိ သီးသန့်ရှယ်ယာ လွှဲပြောင်းရောင်းချမှုအားလုံး၏ တစ်စိတ်တစ်ပိုင်းဖြစ်သည်။

Sky Avia Trading နှင့် Heli Asia Trading ကုမ္ပဏီများမှာ ကျော်မင်းဦး ပိုင်ဆိုင်သည့် Sky Aviator ကုမ္ပဏီကွန်ရက်၏ အစိတ်အပိုင်းများဖြစ်ပြီး၊ ယင်းကုမ္ပဏီကွန်ရက်၏ မြန်မာလေတပ်ထံ ရုရှားထုတ် တိုက်ခိုက်ရေးလေယာဉ်အစိတ်အပိုင်းများ ရောင်းချပေးသည့် စီးပွားရေးလုပ်ငန်းသည် စစ်အုပ်စု လက်ရှိကျူးလွန်လျက်ရှိသော စစ်ရာဇဝတ်မှုများနှင့် လူသားမျိုးနွယ်အပေါ် ကျူးလွန်သော ရာဇဝတ်မှုများကို ပံ့ပိုးကူညီလျက်ရှိသည်။

မြန်မာစစ်အုပ်စုက စာသင်ကျောင်းများ၊ ဘုန်းတော်ကြီးကျောင်းများနှင့် ဆေးရုံဆေးခန်းများအပေါ် မဆင်မခြင် လေကြောင်းတိုက်ခိုက်မှုများမှတဆင့် အရပ်သားပြည်သူများအား ပစ်မှတ်ထားသည့် အကြမ်းဖက်လေကြောင်းစစ်ဆင်ရေးများ လုပ်ဆောင်နိုင်ရန် ၎င်းတို့၏ ရုရှားလေယာဉ်အုပ်ကို အဓိကထားအသုံးပြုနေခြင်းဖြစ်သည်။

စာရွက်စာတမ်း အထောက်အထားများအရ Sky Avia Trading Pte. Ltd. နှင့် Heli Asia Trading Pte. Ltd. တို့ကို စင်ကာပူနိုင်ငံသား Wee Lee Lian က ပိုင်ဆိုင်ကြောင်း ဖော်ပြထားသည်။ Wee Lee Lian သည် ကျော်မင်းဦး၏ ကာလရှည် အမည်ခံ ဒါရိုက်တာတစ်ဦးဖြစ်သည်။

မြန်မာစစ်တပ်၏ လက်နက်ပွဲစား လုပ်ငန်းများအပေါ် ပြည်သူအများက စောင့်ကြည့်ဝေဖန်မှုများ ထွက်ပေါ်လာခဲ့ပြီးနောက်ပိုင်း ကျော်မင်းဦးက ၎င်း၏စင်ကာကုမ္ပဏီများကို ၂၀၂၂ ခုနှစ်တွင် ပြန်လည်ဖွဲ့စည်းခဲ့သည့်အချိန်မှစ၍ Wee Lee Lian မှာ စင်ကာပူနှင့် ထိုင်းနိုင်ငံများရှိ Sky Avia Trading နှင့် Heli Asia Trading ကွန်ရက်၏ တစ်ဦးတည်းသောဒါရိုက်တာ ဖြစ်လာခဲ့သူဖြစ်သည်။

Justice For Myanmar က ၂၀၂၆ ခုနှစ်၊ ဖေဖော်ဝါရီ ၁၀ ရက်နေ့တွင်လည်းကောင်း၊ ထပ်မံ၍ ဖေဖော်ဝါရီ ၁၈ ရက်နေ့တွင်လည်းကောင်း ACC ကုမ္ပဏီထံ စာရေးသားပေးပို့ခဲ့ပြီး၊ အဆိုပါ သီးသန့်ရှယ်ယာလွှဲပြောင်းရောင်းချမှုနှင့် ပတ်သက်၍ စိုးရိမ်ချက်များကို ထိုင်းချေးငွေသက်သေခံလက်မှတ်နှင့် လဲလှယ်ရေးကော်မရှင် (SEC)၊ ထိုင်းစတော့အိတ်ချိန်း (SET) နှင့် ငွေကြေးခဝါချမှုတိုက်ဖျက်ရေးရုံး (Anti-Money Laundering Office) တို့ထံလည်း အစီရင်ခံ တိုင်ကြားခဲ့သည်။

အဆိုပါ ရှယ်ယာအရောင်းအဝယ်ကို အပြီးသတ်၍ Sky Aviator စစ်လက်နက်ပွဲစားကွန်ရက်က ACC ၏ အကြီးဆုံးရှယ်ယာရှင်အုပ်စု ဖြစ်လာမည့်အရေးကို ယခုအချိန်တွင် တားဆီးနိုင်ရန်မှာ ထိုင်းအာဏာပိုင်များ၏ တာဝန် ဖြစ်လာပြီ ဖြစ်သည်ဟု JFM က ထောက်ပြထားသည်။

Sky Aviator ကွန်ရက်နှင့် အဓိကလူပုဂ္ဂိုလ်များအပေါ် လက်ရှိဒဏ်ခတ်ပိတ်ဆို့မှုများသည် တစ်ပြေးညီဖြစ်မနေဘဲ ဟာကွက်များရှိနေပြီး၊ အဆိုပါကွန်ရက်သည် ယင်းဟာကွက်များကို အခွင့်ကောင်းယူကာ ယခုကဲ့သို့ ထိုင်းနိုင်ငံတွင် ရင်းနှီးမြှုပ်နှံမှုပြုလုပ်ရန် ကြိုးပမ်းနေခြင်းဖြစ်သည်။

အမေရိကန်ပြည်ထောင်စု၊ ယူကေ၊ အီးယူ၊ ကနေဒါနှင့် ဩစတြေးလျနိုင်ငံတို့အနေဖြင့် Sky Aviator ကုမ္ပဏီကွန် ရက်တစ်ခုလုံးရှိ ကုမ္ပဏီများနှင့် လူပုဂ္ဂိုလ်အားလုံးအပေါ် ပစ်မှတ်ထား ဒဏ်ခတ်ပိတ်ဆို့မှုများကို ညှိနှိုင်းချမှတ် အကောင်အထည်ဖော်ခြင်းဖြင့် တုန့်ပြန်ဆောင်ရွက်သင့်ကြောင်း JFM က အကြံပြုထားသည်။

Justice For Myanmar ၏ ပြောရေးဆိုခွင့်ရှိသူ မရတနာမောင်က “ACC စီမံခန့်ခွဲမှုအဖွဲ့ဟာ အလွန်ဆိုးရွားလှတဲ့ ငွေကြေးခဝါချမှုဆိုင်ရာ စိုးရိမ်ချက်တွေကို ဖြစ်ပေါ်စေတဲ့ Sky Aviator ကုမ္ပဏီ တွေနဲ့ ရှယ်ယာလွှဲပြောင်းရောင်းချမှုကို ဆက်လက်လုပ်ဆောင်ဖို့ တွန်းအားပေးနေပါတယ်။ ကျော်မင်းဦးရဲ့ အဓိကစီးပွားရေးလုပ်ငန်းက သေကျေပျက်စီးစေမှုနဲ့ ဖျက်ဆီးမှုတွေအပေါ်မှာ အခြေခံထားတာဖြစ်ပြီး၊ တရားမဝင်စစ်အုပ်စုရဲ့ အရပ်သားပြည်သူတွေအပေါ် ရည်ရွယ်ချက်ရှိရှိ လေကြောင်းတိုက်ခိုက်မှုတွေကနေ အကျိုးအမြတ် ရရှိနေတဲ့ စီးပွားရေးလုပ်ငန်း ဖြစ်ပါတယ်။ ကျော်မင်းဦးနဲ့ သူ့ရဲ့အပေါင်းအပါတွေဟာ စစ်အုပ်စုရဲ့ နိုင်ငံတကာရာဇဝတ်မှုတွေကို အားပေးကူညီမှုအတွက် မဖြစ်မနေတာဝန်ခံရမှာဖြစ်ပြီး၊ သူတို့ရဲ့ သွေးစွန်းစီးပွားရေးလုပ်ငန်းတွေကနေ ရရှိလာတဲ့ ငွေကြေးအကျိုးအမြတ်တွေကို ထိုင်းနိုင်ငံကတဆင့် ခဝါချခွင့် လုံးဝမပေးသင့်ပါဘူး” ဟု ပြောဆိုသည်။