ရန်ကုန်၊ မေ ၁
နေပြည်တော်တွင် နေအိမ်အကျယ်ချုပ်သို့ ပြောင်းရွှေ့ထားသော ဒေါ်အောင်ဆန်းစုကြည်ကို သူမ၏ ရှေ့နေအဖွဲ့သည် ယခုသီတင်းပတ်ကုန်တွင် တွေ့ဆုံရန် စီစဉ်နေကြောင်း ရှေ့နေအဖွဲ့၏ ကိုယ်စားလှယ်တစ်ဦးက ယနေ့ ပြောကြား သည်ဟု ရိုက်တာသတင်းတစ်ရပ်အရ သိရှိရသည်။
ရှေ့နေအဖွဲ့က အသက် ၈၀ အရွယ်ရှိ ဒေါ်အောင်ဆန်းစုကြည်နှင့် လာမည့် တနင်္ဂနွေနေ့တွင် တွေ့ဆုံရန် စီစဉ်ထားပြီး၊ သူမအတွက် လိုအပ်သည့် ထောက်ပံ့ရေးပစ္စည်းများ ပေးအပ်ရန်နှင့် သူမ၏ ရပ်တည်ချက်များကို ဆွေးနွေးရန် ရည်ရွယ်ထားသည်ဟု ရိုင်္ကတာသတင်းက ဆိုသည်။
ယခုတွေ့ဆုံမှုမှာ ပုံမှန် အကျဉ်းထောင်ဝင်စာတွေ့ခြင်းမျိုး မဟုတ်တော့ဘဲ ရှေ့နေအဖွဲ့က သွားရောက်၍ ကိစ္စရပ်များကို အသေးစိတ် ဆွေးနွေးနိုင်မည့် တွေ့ဆုံမှုမျိုး ဖြစ်လာလိမ့်မည်ဟု မျှော်လင့်ရသည်။
ဒေါ်အောင်ဆန်းစုကြည်ကို ဧပြီလ ၃၀ ရက်နေ့ ကြာသပတေးနေ့ညပိုင်းတွင် နေအိမ်အကျယ်ချုပ်သို့ ပြောင်းရွှေ့ခဲ့ခြင်းဖြစ်ပြီး၊ လက်ရှိတွင် သူမသည် နေပြည်တော်၌ပင် ရှိနေသေးကြောင်း ရှေ့နေအဖွဲ့ဝင်တစ်ဦးက အတည်ပြုသည်။
ဒေါ်အောင်ဆန်းစုကြည်ကို အကြမ်းဖက်စစ်တပ်က အဂတိလိုက်စားမှု၊ ရွေး ကောက်ပွဲ မသမာမှုနှင့် နိုင်ငံတော်လျှို့ဝှက်ချက် အက်ဥပဒေ ချိုးဖောက်မှု အစရှိသည့် စွပ်စွဲချက်များဖြင့် ထောင်ဒဏ် ၃၃ နှစ် ချမှတ်ထားခြင်းဖြစ်သည်။
ဧပြီလ ၁၇ ရက်နေ့ မြန်မာနှစ်ဆန်းတစ်ရက်နေ့ လွတ်ငြိမ်းချမ်းသာခွင့်တွင် ပြစ်ဒဏ်၏ ခြောက်ပုံတစ်ပုံကို လျှော့ပေါ့ပေးခဲ့ပြီးနောက်၊ ကြာသပတေးနေ့တွင် နေအိမ်အချုပ် မပြောင်းရွှေ့မီ နောက်ထပ် ခြောက်ပုံတစ်ပုံကို ထပ်မံလျှော့ပေါ့ပေးခဲ့သည်။
စစ်တပ်က ဒေါ်အောင်ဆန်းစုကြည်ကို ယူနီဖောင်းဝတ် ဝန်ထမ်းနှစ်ဦးနှင့်အတူ သစ်သားခုံတန်းတစ်ခုပေါ်တွင် ထိုင်နေသည့် ဓာတ်ပုံကို ထုတ်လွှင့်ခဲ့ရာ အဆိုပါ ဓာတ်ပုံမှာ ၂၀၂၁ ခုနှစ် ဖေဖော်ဝါရီလ အာဏာသိမ်းပြီးနောက်ပိုင်း သူမ၏ ပထမဆုံးသော လူထုရှေ့မှောက်ရောက်ရှိလာသည့် စစ်တပ်က ထုတ်ပြန်သော ပုံရိပ်ဖြစ်သည်။
အကြမ်းဖက် မင်းအောင်လှိုင်အနေဖြင့် ဒေါ်အောင်ဆန်းစုကြည်ကို ပြန်လွှတ် ပေးရန် အာဆီယံ အပါအဝင် နိုင်ငံတကာ၏ ဖိအားများကို ရင်ဆိုင်နေရသည်။
