ရန်ကုန်၊ မေ၂
မကွေးတိုင်း စလင်းမြို့နယ် အရှေ့ဘက်ခြမ်း ဧရာဝတီမြစ်နားတစ်လျှောက်ရှိ ကျေးရွာများကို စစ်တပ်စစ် ကြောင်းက မေလ ၁ ရက်နေ့တွင် စစ်ကြောင်းထိုး စီးနင်းခဲ့ပြီး စစ်တပ်၏ စီးနင်းမှုကြောင့် ဒေသခံပြည်သူအချို့ သေဆုံးခဲ့ရပြီး ကျေးရွာ ၃ ရွာမှာလည်း မီးလောင်ပျက်စီးခဲ့ရကြောင်း ဒေသပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုသည်။
စစ်တပ်စစ်ကြောင်းက ဧရာ၀တီမြစ်ကြောင်းတစ်လျှောက်ရှိ ကျေးရွာများကို စစ်တပ်က ပတ်စိတ်တိုက်စစ်ကြောင်းထိုးခဲ့ပြီး သနပ်ကုန်းကျေးရွာ၊ ထနောင်းကုန်းကျေးရွာ၊ ကန်ဆွယ်ကျေးရွာတို့ကို မီးရှို့ဖျက်ဆီးသွားကြောင်း သိရှိရသည်။
စစ်တပ်၏ စစ်ကြောင်းထိုး ဝင်ရောက်ပစ်ခတ်မှုကြောင့် ဒေသခံပြည်သူများအတွင်း လူသေဆုံးမှု ရှိခဲ့ပြီး ကျေးရွာများကို မီးရှို့ဖျက်ဆီးခဲ့သည့်အတွက် နေအိမ်များအပြင် ဒေသခံများ မွေးမြူထားသည့် ဝက်နှင့် နွား အများအပြား လည်း မီးလောင်သေဆုံးခဲ့ရသည်။
“စလင်းမြို့အရှေ့ဘက် ဧရာ၀တီမြစ်နားတကြောရွာတွေကို စစ်ကြောင်းပတ်ထိုးပြီး ရွာတွေမီးရှို့သွားတယ်။ ရွာ ၃ ရွာ ပြာကျသွားတယ်။ သနပ်ကုန်း၊ ထနောင်းကုန်း၊ ကန်ဆွယ်ရွာတွေမှာ ပြည်သူတချို့ သေဆုံးတဲ့အပြင် ဝက်၊ နွားတွေလည်း အများပြားသေဆုံးပါတယ်။ အခုတော့ ပြည်သူတွေအားလုံး ထွက်ပြေး စစ်ဘေးရှောင်နေရတယ်” ဟု စလင်းဒေသတင်းရင်းမြစ်က ပြောဆိုသည်။
လက်ရှိတွင် စစ်တပ်စစ်ကြောင်းမှာ ကျေးရွာများအတွင်း လှည့်လည်တိုက်ခိုက်နေသဖြင့် ဒေသခံပြည်သူများသည် ဘေးလွတ်ရာသို့ အရေးပေါ် ထွက်ပြေးတိမ်းရှောင်နေကြရပြီး ထိခိုက်သေဆုံးသူ အရေအတွက်နှင့် ပျက်စီးဆုံးရှုံးမှု အသေးစိတ်ကို ဆက်လက် အတည်ပြုနေဆဲ ဖြစ်ကြောင်း သိရှိရသည်။
ဓာတ်ပုံ- စစ်တပ်၏ မီးရှို့ဖျက်ဆီးခံထားရသည့် ကျေးရွာတစ်ခု။ (ပုံအဟောင်းကို အသုံးပြုထားပါသည်။)
