ပြည်ပမှ ခွင့်ဖြင့် ပြန်လာပြီး ပြန်လည်ထွက်ခွင့်မရသော မြန်မာအလုပ်သမားအရေအတွက် ၁၀၀၀ နီးပါးရှိလာ
ရန်ကုန်၊ မေ ၅
ပြည်ပနိုင်ငံများတွင် အလုပ်လုပ်ကိုင်နေသည့် PJ (Passport for Job) ကိုင်ဆောင်ထားသော မြန်မာလုပ်သားများ နေရပ်ပြန်လာရာတွင် “ခွင့်ပြန်အလုပ်သမား” အစစ်အမှန်ဖြစ်ကြောင်း သေချာစေရန် စိစစ်မှုများ ပြုလုပ်နေကြောင်း စစ်တပ်လက် အောက်ခံ အလုပ်သမားဝန်ကြီးဌာနက ယမန်နေ့ မေလ ၄ ရက်နေ့ တွင် ထုတ်ပြန်ကြေညာသည်။
ပြည်ပနိုင်ငံများမှ ခွင့်ဖြင့် မြန်မာနိုင်ငံပြန်လာမည့် အလုပ်သမားများသည် ၂၀၂၆ ခုနှစ်၊ မေလ ၁ ရက်နေ့မှစတင်၍ အလုပ်ရှင်ထံမှ ခွင့်စာ (Letter of Permission for Leave) အပြင် သက်ဆိုင်ရာ မြန်မာသံရုံး၊ အဖွဲ့ရုံး သို့မဟုတ် ကောင်စစ်ဝန်ချုပ်ရုံးများမှ မှန်ကန်ကြောင်း စိစစ်ထောက်ခံချက်ကို ရယူရမည်ဖြစ်ကြောင်း၊ ၎င်းအပြင် သတ်မှတ်စာရွက်စာတမ်းများနှင့်အတူ သက် ဆိုင်ရာမှ ထုတ်ပေးသော ထောက်ခံချက်များကို ပူးတွဲ၍ ပြည်ပသို့ ပြန်လည်ထွက်ခွာခွင့် လျှောက်ထားရမည်ဖြစ်ကြောင်း စစ်တပ်က ဆိုသည်။
ပြည်ပနိုင်ငံအများစုတွင် မီးဖွားခွင့်၊ မိသားစုစောင့်ရှောက်ခွင့်နှင့် နာမကျန်းခွင့်မှအပ နှစ်ပတ်လည်ခွင့် အပါအဝင် သာမန်ခွင့်များကို အများဆုံး ၁ လသာ ခွင့်ပြုထားသည်ဟု သိရှိရသဖြင့် အမှန်တကယ် ခွင့်ပြန်လာသူဖြစ်ကြောင်း သေချာစေရန် စိစစ်ရခြင်းဖြစ်ကြောင်း စစ်တပ်က ပြောဆိုသည်။
၂၀၂၆ ခုနှစ် မေလ ၁ ရက်နေ့မတိုင်မီ မြန်မာနိုင်ငံသို့ ရောက်ရှိနေသည့် အလုပ်သမားများအနက် ခွင့်ကာလ ၁ လထက်ကျော်လွန်သူများနှင့် OWIC (Overseas Worker Identification Card) တွင် ဖော်ပြထားသော နိုင်ငံ သို့မ ဟုတ် လုပ်ငန်းခွင် ကွဲလွဲသူများသည် ခွင့်ကာလ တစ်လကျော်ယူရသည့် အကြောင်းပြချက်နှင့် အထောက် အထားများကို ခိုင်လုံစွာ တင်ပြရမည်ဖြစ်သည်ဟု စစ်တပ်က တင်းကျပ်သော စည်းကမ်းချက်များ ထပ်မံချမှတ်ထားသည်။
ပြည်ပနိုင်ငံသို့ ပြန်လည် ထွက်ခွာမည့် ခွင့်ပြန်များ၏ အထောက်အထား ပြည့်စုံသော လျှောက်လွှာများကို ရုံးပိတ် ရက်အပါအဝင် ရက်သတ္တပတ် တစ်ပတ်အတွင်း ပြည်ပထွက်ခွာခွင့်နှင့် OWIC အသစ်လဲလှယ်နိုင်ရေးတို့ကို အမြန်ဆုံး စိစစ်ဆောင်ရွက်ပေးသွားမည်ဟု စစ်တပ်ကဆိုသည်။
သို့သော်လည်း မြေပြင်တွင် ခွင့်ပြန်လာသည့် အလုပ်သမား အများအပြားမှာ ပြန်လည်ထွက်ခွာခွင့် ကန့်သတ်ခံထားရသဖြင့် ၎င်းတို့၏ အလုပ်အကိုင်များ ထိခိုက်မည်ကို စိုးရိမ်ပူပန်မှုများ မြင့်တက်နေကြရကြောင်း၊ ယခုအခါ ပြညတွင်းသို့ ခွင့်ဖြင့် ပြန်လာပြီး ပြည်ပထွက်ခွင့် မရသော မြန်မာအလုပ်သမားအရေအတွက် ၁၀၀၀ ကျော် ရှိနေပြီဖြစ်ကြောင်း ပြည်ပအလုပ်အကိုင်အေဂျင်စီအသိုင်းအ၀ိုင်းက ပြောဆိုသည်။
“အခု ပြည်ပကနေ ခွင့်နဲ့ပြန်လာပြီးတော့ ပြည်ပကို ပြန်ထွက်ခွင့်မရတာ ၁၀၀၀ ကျော်လောက်ရှိနေပြီ။ အဓိက သူတို့က သင်္ကြန်ကာလမှာ မြန်မာနိုင်ငံကို ပြန်လာကြတာ။ ပြန်လာပြီးတော့ အလုပ်သမားဝန်ကြီးဌာနက ပြောတဲ့ အထောက်အထားအပြည့်အစုံနဲ့ ပြန်ပြီး ထွက်ဖို့ တင်ပြတာ။ အဲဒါကို ထွက်ခွင့် ကျမလာတာ။ ပြည်ပထွက်ခွင့်မရဘဲ ပြည်တွင်းမှာပဲ သောင်တင်ကုန်တာ။ ဂျပန်၊ ထိုင်း၊ မလေးရှား၊ ထိုင်ဝမ်၊ ကိုရီးယား နိုင်ငံအစုံပဲ။ ပြည်ပကို ပြန်မထွက်စေချင်တာလား၊ ဘာလို့ အဲဒီလောက်ကြီး တင်းကျပ်နေရသလဲဆိုတာကို နားမလည်နိုင်တော့တာ” ဟု ရန်ကုန်အခြေစိုက် ဂျပန်နိုင်ငံသို့ သင်တန်သား အလုပ်သမားပို့ဆောင်နေသော ပြည်ပအလုပ်အကိုင်ပိုင်ရှင်တစ်ဦးက ရှင်းပြသည်။
