ရန်ကုန်၊ မေ ၆
ရှမ်းပြည်နယ်၊ တောင်ကြီးမြို့သို့ ရဲချုပ် ဗိုလ်ချုပ်စိုးလှိုင် ရောက်ရှိနေသည့် အချိန်အတွင်း ရက်စက်ကြမ်းကြုတ်သော လူသတ်မှုတစ်ခု ဖြစ်ပွားခဲ့ရာ ပြည်သူများအကြား သတင်းမပြန့်နှံ့စေရန် ပြည်နယ်ရဲတပ်ဖွဲ့က ဖုံးဖိထားကြောင်း ရဲသတင်းရင်းမြစ်နှင့် ဒေသခံများထံမှ သိရှိရသည်။
မေလ ၄ ရက်နေ့ ညပိုင်းတွင် တောင်ကြီးမြို့၊ ပြည်တော်သာရပ်ကွက်ရှိ “Perer” ဘားနှင့် စားသောက်ဆိုင်တွင် အလုပ်လုပ်ကိုင်နေသည့် အသက် ၁၆ နှစ်အရွယ် ဝန်ထမ်းအမျိုးသမီးငယ် မဖူးပွင့်ဝေကို ဆိုင်ပိုင်ရှင်ဖြစ်သူ အောင်မျိုးသူက ရိုက်နှက်သတ်ဖြတ်ခဲ့ခြင်း ဖြစ်သည်။
ဖြစ်စဉ်မှာ ဧည့်သည်တစ်ဦးက မဖူးပွင့်ဝေကို ပေးခဲ့သည့် မုန့်ဖိုးငွေ ၅,၀၀၀ ကျပ်အား ဆိုင်ပိုင်ရှင်ကို အသိမပေးခြင်းကြောင့် ဆိုင်ပိုင်ရှင် အောင်မျိုးသူက ဒေါသထွက်ကာ လက်သီးဖြင့်ထိုးခြင်း၊ စားပွဲနှင့် ဦးခေါင်းကို ဆောင့်ရိုက်ခြင်းနှင့် ခြေထောက်ဖြင့် ကန်ခြင်းစသည့် ပြင်းထန်သော ရိုက်နှက်မှုများကို ပြုလုပ်ခဲ့ခြင်းဖြစ်သည်။ အဆိုပါ ရိုက်နှက်ဒဏ်ရာများကြောင့် မဖူးပွင့်ဝေမှာ ရရှိဒဏ်ရာများဖြင့် သေဆုံးသွားခဲ့ရသည်။
အဆိုပါအမှုဖြစ်ပွားချိန်မှာ ရဲချုပ်က တောင်ကြီးမြို့သို့ ရောက်ရှိနေချိန်တွင် အသက်မပြည့်သေးသည့် အမျိုးသမီးငယ်တစ်ဦး ရက်စက်စွာ သတ်ဖြတ်ခံရပြီး တရားခံမှာလည်း လွတ်မြောက်နေခြင်းကြောင့် အထက်လူကြီးများ၏ ပြစ်တင်ဝေဖန်မှုကို ကြောက်လန့်ကာ ရဲတပ်ဖွဲ့က သတင်းကို အတတ်နိုင်ဆုံး ဖုံးကွယ်ခဲ့ခြင်းဖြစ်သည်။
“ရဲချုပ်ရောက်နေချိန်မှာ သတင်းမပြန့်အောင် အတတ်နိုင်ဆုံး ဖုံးဖိခဲ့ကြတယ်။ သတင်းဂျာနယ်တွေရဲ့ မေးမြန်းမှုတွေကိုလည်း ဖြေဆိုခြင်းမရှိဘဲ ငြင်းဆိုခဲ့တယ်”ဟု ရဲသတင်းရင်းမြစ်က ရှင်းပြသည်။
သေဆုံးသူအား သုဿာန်သို့ တိတ်တဆိတ် ပို့ဆောင်ရန် စီစဉ်နေစဉ်အတွင်း တိုင်ကြားမှုကြောင့်သာ ရဲတပ်ဖွဲ့မှ သိရှိခဲ့ရခြင်းဖြစ် သည်။ ရဲတပ်ဖွဲ့က သွားရောက်စစ်ဆေးရာတွင် သေဆုံးသူ မဖူးပွင့်ဝေ၏ မျက်နှာ၊ လက်နှင့် ဝမ်းဗိုက်တို့တွင် ရိုက်နှက်ခံထားရသော ဒဏ်ရာများစွာ တွေ့ရှိခဲ့သည်။
လူသတ်မှုကျူးလွန်သူ ဆိုင်ပိုင်ရှင် အောင်မျိုးသူသည် မေလ ၅ ရက်နေ့ နံနက် ၄ နာရီခန့်တွင် ဆိုင်မှ မော်တော် ဆိုင်ကယ်ဖြင့် ထွက်ပြေးလွတ်မြောက်သွားခဲ့သည်။ လက်ရှိတွင် ရဲတပ်ဖွဲ့က တရားခံကို ဖမ်းဆီးရမိရန် အပူတ ပြင်း ရှာဖွေနေသည်ဟု ဆိုသော်လည်း ရဲတပ်ဖွဲ့က သတင်းမထုတ်ပြန်ဘဲ ဖုံးဖိထားသည်။
